ރާއްޖޭގެ އެކިކަންކޮޅުތަކުގައި މި އަހަރު ފަށަން ހުރި މަޝްރޫއުތައް މި އަހަރު ކުރިއަށްދާނެ ކަމުގެ ޔަގީންކަން ރައީސް ޑރ. މުހައްމަދު މުއިއްޒު މިއަދު ދެއްވައިފިއެވެ.

ރ. އަތޮޅާއި ބ. އަތޮޅުގެ ބައެއް ރަށްތަކަށް ރައީސް ފެއްޓެވި ދަތުރުފުޅުގައި އަލިފުށީގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން އެމަނިކުފާނު ވިދާޅުވީ ރާއްޖޭގެ ރަށްރަށުގައި ކަންކަން ކުރެވޭނީ ވަރަށް ގިނަ ކަންކަން ހައްލުކޮށްގެން ކަމަށެވެ. މި ސަރުކާރު ވެރިކަމާ ހަވާލުވި އިރު، ބޭރުގެ ދަރަނި 120 ބިލިއަން ރުފިޔާ އަށް އަރާފައިވާ ކަމަށާއި އެތެރޭގެ ދަރަނި ވެސް ނުވަ ބިލިއަން ރުފިޔާ އަށް ވުރެ މައްޗަށް އަރާފައިވާ ކަމަށް އެމަނިކުފާނު ވިދާޅުވިއެވެ.

ނަމަވެސް، މި ސަރުކާރުން އެ ދަރަނިތައް ދައްކަމުން އަންނަ ކަމުގައި ރައީސް ވިދާޅުވިއެވެ. އަދި ފައިސާ ޗާޕް ކުރުން ހުއްޓާލައި، ބަދަލުގެ ގޮތުގައި ފައިސާ ދެމުން އައި ސެޓަލްމަންޓް ކޮމިޓީ ވެސް އުވާލާފައި ވާނެ ކަމުގައި ރައީސް ވިދާޅުވިއެވެ.

ރައީސް ޑރ. މުއިއްޒު ވިދާޅުވީ އެމަނިކުފާނު ވެވަޑައިގެންނެވި ހުރިހާ ވައުދުތައް ފުއްދެވުމަށް ހުރިހާ މަޝްރޫއަކަށް ފައިސާ ހިމަނައި ދިނުމަށް އެދި ޓްރާންސިޝަނަލް މުއްދަތުގައި ފޮނުއްވާފައި ވާނެ ކަމަށެވެ. އެކަމަކު، މަޖިލިހުގެ މެޖޯރިޓީ އޮތް އެމްޑީޕީން ފާސް ކުރީ އެ ޕާޓީގެ މެމްބަރުން ބޭނުންވާ ކަންކަން އުނިކޮށްފައި ކަމަށް ރައީސް ވިދާޅުވިއެވެ. އޭގެއިތުރުން މަޝްރޫއުތަކަށް ބޭނުންވާ ފައިސާ ބަޖެޓުގައި ހިމަނާފައި އޮތީ ވަރަށް މަދުން ކަމަށް ވިދާޅުވިއެވެ.

"މިސާލަކަށް އަޅުގަނޑު ވައުދުވެފައި އޮތީ ރަށެއްގައި ބަނދަރެއް ހަދަން. އެ ބަނދަރުގެ މަޝްރޫއު، މަޝްރޫއެއްގެ ގޮތަށް ހިމެނިޔަސް، ފަސް ލައްކަ ރުފިޔާ، އެއް މިލިއަން ރުފިޔާ ޖަހާފައި ފާސްކޮށްފައި އޮތީ. އެގޮތަށް ބަޖެޓު ފާސްކޮށްފައި އޮތީ. ދެން ހިނގަމުންދާ މަޝްރޫއެއް ނިންމަން ބަލާއިރުގައި މިސާލަކަށް މަގެއް ހަދަން ބަލާއިރުގައި ދެބައިކުޅަ އެއްބައި ނިމިފައި ބާކީ މަޝްރޫއު ސާޅީހަކަށް މިލިއަން ބޭނުންވާ ކަމަށްވާ ނަމަ، ހިމަނާފައި އޮވެދާނެ ފަސް މިލިއަން ރުފިޔާ. މިއީ ދުވަހަކު ވެސް ރާއްޖޭގައި ބަޖެޓު ފާސް ކުރި ގޮތެއް ނޫން. އަމުދުން ނިންމަން ހުރި މަޝްރޫއަށް އެއްކޮށް ފައިސާ ހިމަނާނީ." ރައީސް ވިދާޅުވިއެވެ.

ރައީސް ޑރ. މުއިއްޒު ވިދާޅުވީ އެމްޑީޕީން އެގޮތަށް ބަޖެޓް ފާސްކޮށްފައި އޮތް ކަމުގައި ވިޔަސް، އެމަނިކުފާނު ވައުދުވެވަޑައިގެންނެވި ހުރިހާ މަޝްރޫއުތަކެއް ކުރިއަށް ގެންދަވާނެ ކަމަށެވެ.

"އެއީ އަޅުގަނޑުމެންނަށް އެނގޭ މި ހާލަތުން އަރައިގަތުމަށްޓަކައި ކަންކަން ކުރަން ވާނެ ގޮތް. އެހެންވީމަ ފުރަތަމަ ދުވަހުން ފެށިގެން އިގްތިސާދު ވަރުގަދަ ކުރުމުގެ މަސައްކަތް ފަށައިގަނެގެން މިއުޅެނީ. ކަންކަން ކުރަމުން މި ގެންދަނީ އެ މަގުން. އިރާދަކުރެއްވިއްޔާ ހުރިހާ މަޝްރޫއެއް ވެސް ރަށްރަށުގައި ހުއްޓިފައި ހުރި، ލަސް ލަހުން ހިނގާ މަޝްރޫއުތައް ބާރު ސްޕީޑްގައި ކުރިއަށް ގެންދެވޭނެ ގޮތް ހަމަޖެހުމުން މިދަނީ،" ރައީސް ވިދާޅުވިއެވެ.