ގއ. ކޮލަމާފުށީގެ ބިން ހިއްކުމުގެ މަޝްރޫއުގެ އަމަލީ މަސައްކަތް މިއަހަރު ފައްޓަވާނެ ކަމަށް ރައީސް ޑރ. މުހައްމަދު މުއިއްޒު އެ ރަށުގައި މިއަދު ވިދާޅުވެއްޖެއެވެ.
ކޮލަމާފުށީގެ ރައްޔިތުންނާ ބައްދަލު ކުރެއްވުމަށް ބޭއްވެވި ޖަލްސާގައި ރައީސް ޑރ. މުއިއްޒު ވިދާޅުވީ ކުރީގެ ސަރުކާރުގެ ފިނޭންސް މިނިސްޓަރު އިބްރާހިމް އަމީރު، މި އަހަރަށް ލަފާ ކުރާ ބަޖެޓު ހުށަހެޅުއްވި އިރުގައި ބިން ހިއްކުމުގެ މަޝްރޫއުގެ މަސައްކަތް ބަޖެޓްގައި ހިމެނިފައި އޮތީ ނަމަކަށް ކަމަށެވެ. އެގޮތުން އެ މަޝްރޫއުއަށް ބަޖެޓް ކަނޑައަޅާފައިވަނީ ވަރަށް ކުޑަ އަދަދެއް ކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ އެ ރަށުގައި ކުރިއަށް ގެންދިޔުމަށް ނިންމި އިންޓަގްރޭޓަޑް ޓޫރިޒަމް މަޝްރޫއު ހަގީގަތަކަށް ހައްދަވައިދެއްވާނެ ކަމަށެވެ. އަދި އިންވެސްޓަރުން ގެނެސް، މަޝްރޫއުގެ މަސައްކަތް އަމަލީ ގޮތުން ފެށިގެންދާ މަންޒަރު އެ ރަށުގެ ރައްޔިތުންނަށް ފެންނާނެ ކަމަށް ވިދާޅުވިއެވެ.
"ހުރިހާ ކަމަކީ ބަޖެޓަށް ބަރޯސާވެގެން ކުރެވޭނެ ކަންތައްތަކެއް ނޫން، ޕްރައިވެޓް ސެކްޓަރު ލީޑް ކުރާ އިންވެސްޓަރު ފައިނޭންސިންގ މަޝްރޫއުތަކަށް ޖާގަ ދިނުމުން އިގްތިސާދު ފުޅާވާނީ، މި މަގުން އަޅުގަނޑުމެން މަސައްކަތް ކުރަން ނިންމާފައިވަނީ" ރައީސް ވިދާޅުވިއެވެ.
ރަށު ކައުންސިލާއެކު މިއަދު ބޭއްވި ބައްދަލުވުމުގައި ތަރައްގީ އާއި ކުރިމަގަށް ބޭނުންވާ ކަންކަން ކައުންސިލުން ހިއްސާކުރެއްވި ކަމަށް ވެސް ރައީސް ވިދާޅުވިއެވެ.
