ރައްޔިތުން އެދޭ ބާރު މިނުގައި ނަތީޖާ ނެރުމުގައި ކުރިއަށް ދެވޭނެ މަގު ރައްޔިތުންގެ މަޖިލިހުގެ ތެރެއިން ފަހިވުމަކީ ބުއްދިވެރި ގޮތް ކަމުގައި ރައީސް ޑރ. މުހައްމަދު މުއިއްޒު ވިދާޅުވިއެވެ.
ދެކުނުގެ ހަތަރު އަތޮޅަކަށް ރައީސް ޑރ. މުއިއްޒު ކުރައްވަމުން ގެންދަވާ ދަތުރުފުޅުގައި ގދ. މަޑަވެއްޔަށް ވަޑައިގެން އެ ރަށުގެ ރައްޔިތުންނާ ބައްދަލު ކުރައްވައި ރައީސް ޑރ. މުއިއްޒު ވިދާޅުވީ ރާއްޖޭގެ ނިޒާމު ރޭވިފައި އޮތް ގޮތުން ސަރުކާރަކަށް ކަމެއް ކުރެވެން އަންނަނީ ރައްޔިތުން ދެ ފަހަރަށް ގޮތް ނިންމައިގެން ކަމަށެވެ.
ރައީސް އެ ފާހަގަ ކުރެއްވީ ރިޔާސީ އިންތިހާބު ކާމިޔާބުވުމުގެ އިތުރުން ރައްޔިތުންގެ މަޖިލިހުގެ މެޖޯރިޓީ ވެސް ސަރުކާރަށް ލިބުމެވެ. ދެ އިންތިހާބު އެއްކޮށް އޮތް ނަމަ، ވަރަށް ފަސޭހަވެގެން ދިޔައީސް ކަމަށް އެމަނިކުފާނު ވިދާޅުވިއެވެ.
ރައީސް ޑރ. މުއިއްޒު ވިދާޅުވީ ސަރުކާރެއް ވަކި މިސްރާބަކުން ގެންދިއުމުގައި ރައްޔިތުންގެ މަޖިލިހަކީ މުހިންމު ތަނެއް ކަމަށެވެ. ރައީސް ސިފަ ކުރެއްވި ގޮތުގައި މަޖިލިހަކީ ވަރަށް މުހިންމު ކޮންޓްރޯލިން ޕަވަރެކެވެ.
"މަސްހުނި ނިޒާމެއް، މުޅިން ރިޔާސީއެއް ނުވޭ، ބަރުލަމާނީއެއް ނުވާ މަސްހުނި ނިޒާމެއް ރާއްޖޭގައި މިއޮތީ." ރައީސް ވިދާޅުވިއެވެ.
ރައީސް ޑރ. މުއިއްޒު ވިދާޅުވީ މަޖިލިހުގެ ބޭނުން ނަހަމަ ގޮތުގައި ކުރާ ނަމަ، މި ނިޒާމު އިންތިހާ އަށް ބޮއްސުންލައިގެން ހިނގައިދާނެ ކަމަށާއި މިހާރު ވެސް އެ މަންޒަރު ފެންނަމުންދާ ކަމަށެވެ.
ރައީސް ވިދާޅުވީ ރައްޔިތުންގެ މަޖިލިހަށް މެމްބަރުން ހޮވުމުގެ ބާރު ރައްޔިތުންގެ މަޖިލިހަށް އޮންނަ އިރު، އަންނަ މަހުގެ 17 ވަނަ ދުވަހު އެ ފުރުސަތު ރައްޔިތުންނަށް އަނެއްކާ ވެސް ލިބިގެންދާނެ ކަމަށެވެ.
"އެހެންވީމަ އެ ދުވަހުގެ ވޯޓުގައި ރައްޔިތުން އެބަ ޖެހޭ ގޮތް ނިންމައި ދޭން. ރައްޔިތުން އަޅުގަނޑާ ހަވާލު ކުރި ޒިންމާ ރައްޔިތުން އެދިވަޑައިގަންނަވާ ބާރު ސްޕީޑްގައި ނަތީޖާ ނެރުމުގައި ކުރިއަށް ދެވޭނެ މަގު މި ދެންނެވި ފަދަ އިން ރައްޔިތުންގެ މަޖިލިހުގެ ތެރެއިން ވެސް ފަހިވެގެން ދާނެ ގޮތަށް ބޭއްވުމަކީ ބުއްދިވެރި ނިންމުމަކަށް ވާނެ،" ރައީސް ވިދާޅުވިއެވެ.
ރައީސް ޑރ. މުއިއްޒު ވިދާޅުވީ އެމަނިކުފާނުގެ ސަރުކާރުން ރައްޔިތުން އެދޭ ހުރިހާ ކަމެއް ކުރައްވާނެ ކަމަށެވެ. އެކަމަކު، އެކަންކަން ކުރަން ދަތިތަކެއް ހުރި ނަމަވެސް އެ ގޮންޖެހުންތަކުން އަރައިގަންނާނެ ކަމަށް ވެސް އެމަނިކުފާނު ވިދާޅުވިއެވެ.
