ރާއްޖެއިން ބޭރުގައި ދިރިއުޅޭ ދިވެހި ކުދިންނަށް ދިވެހިބަހާއި އިސްލާމީ ތަރުބިއްޔަތު ކިޔަވައިދިނުމުގެ އޮންލައިން ޕްރޮގްރާމު "ރިވެލި" ލޯންޗުކޮށްފިއެވެ.
ރޭ މި ޕްރޮގްރާމު ލޯންޗު ކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ. މި ޕްރޮގްރާމް ލޯންޗުކުރެއްވީ އެކުވެރި އަރަބި އިމާރާތް (ޔޫއޭއީ)ގައި ދިރިއުޅޭ ދިވެހި ރައްޔިތުންނާއި ބައްދަލުކުރެއްވުމަށް ރޭ ބޭއްވި ހަފްލާގެ ތެރެއިންނެވެ.
"ރިވެލި" ލޯންޗުކުރުމަށް ބޭއްވި ހަފްލާގައި ތައުލީމާ ބެހޭ ވަޒީރު ޑރ. އިސްމާއިލް ޝަފީއު އާއި ހާރިޖީ ވަޒީރު މޫސާ ޒަމީރުގެ އިތުރުން، ދައުލަތުގެ އެހެން ވަޒީރުންނާއި ޔޫއޭއީގައި ދިރިއުޅެމުންދާ ދިވެހި ބައެއް ރައްޔިތުންވެސް ބައިވެރިވެވަޑައިގެންނެވިއެވެ.
އެޑިއުކޭޝަން މިނިސްޓްރީން ބުނެފައިވަނީ، ދިވެހި އަދި އިސްލާމް، މި ދެމާއްދާއަކީ ހަމައެކަނި ރާއްޖޭގައި ކިޔަވާ ދަރިވަރުންނަށް އުނގަންނައި ދޭންޖެހޭ މާއްދާތަކެއް ނޫން ކަމަށާއި ރާއްޖޭން ބޭރުގައި ތިބި ދިވެހިންނަށް ވެސް މި މާއްދާ އުނގަންނައިދޭން ޖެހޭނެ ކަމަށެވެ.
އިންޑިއާ އަދި ސްރީލަންކާގައި ތިބޭ ދިވެހި ކުދިންނަށް މީގެކުރިންވެސް އަންނަނީ ދިވެހި އަދި އިސްލާމް ކިޔަވާ ދެމުންނެވެ. އެހެންނަމަވެސް މެލޭޝިއާގައި ތިބޭ ދިވެހި ކުދިންނަށް މީގެ ކުރިން މި ޕްރޮގްރާމް އެކަށީގެންވާ ގޮތެއްގައި ހިންގިފައެއް ނުވެއެވެ.
