އަންނަ މާޗް މަހު އޮންނަ ރައްޔިތުންގެ މަޖިލިހުގެ އިންތިހާބުގައި ޖުމްހޫރީ ޕާޓީ (ޖޭޕީ) ގެ ފަރާތުން 10 ދާއިރާއަކަށް ކެންޑިޑޭޓުން ނެރުމަށް ނިންމައިފިއެވެ. އެ ހުރިހާ ކެންޑިޑޭޓުން ވެސް ވަނީ މަޖިލިހުގައި ވާދަކުރެއްވުމަށް އިލެކްޝަންސް ކޮމިޝަން (އީސީ) އަށް ހުށަހަޅައިފައެވެ.
އޭގެތެރެއިން ފާހަގަކޮށްލެވޭ ބައެއް ބޭފުޅުންނަކީ ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމާއި އޭނާގެ އަނބިކަނބަލުން އަދި ކުރީގެ ޓްރާންސްޕޯޓް މިނިސްޓަރު އައިޝަތު ނަހުލާއެވެ. ގާސިމް ހަތަރު ވަނަ ދައުރަކަށް މާމިގިލީ ދާއިރާއަށް ވާދަކުރައްވާ އިރު، ޖޭޕީގެ ޑެޕިއުޓީ ލީޑަރު ކަން ވެސް ކުރައްވަމުން ގެންދަވާ ނަހުލާ ވާދަކުރައްވަނީ ހުޅުމާލެ ދެކުނު ދާއިރާއަށެވެ.
ހެންވޭރު ހުޅަނގު ދާއިރާ އަށް ވާދަކުރައްވަނީ ޖޭޕީގެ ޑެޕިއުޓީ ލީޑަރު ޑރ. އަމީން އިބްރާހިމެވެ. ކުރީގެ ހެލްތު މިނިސްޓަރު އަބްދުﷲ އަމީން، އުނގޫފާރު ދާއިރާއަށް ވާދަކުރައްވާ އިރު، ކުރީގެ ހޯމް މިނިސްޓަރު އަޒްލީން އަހުމަދު ވާދަކުރައްވަނީ ދުވާފަރު ދާއިރާއަށެވެ.
ޖޭޕީގެ ޓިކެޓުގައި ކެންދޫ ދާއިރާ އަށް ވާދަކުރައްވަނީ މިހާރު ވެސް އެ ދާއިރާގެ މެމްބަރު އަލީ ހުސެއިނެވެ.
- މާމިގިލީ ދާއިރާ – ގާސިމް އިބްރާހިމް
- ހުޅުމާލެ ދެކުނު ދާއިރާ – އައިޝަތު ނަހުލާ (ކުރީގެ ޓްރާންސްޕޯޓް މިނިސްޓަރު)
- ކެންދޫ ދާއިރާ – އަލީ ހުސައިން (މިހާރުގެ ވެސް މެމްބަރު)
- ހެންވޭރު ހުޅަނގު ދާއިރާ – ޑރ.އަމީން އިބްރާހިމް (ޕާޓީގެ ޑެޕިއުޓީ ލީޑަރު)
- އުނގޫފާރު ދާއިރާ – އަބްދުﷲ އަމީން (ކުރީގެ ހެލްތު މިނިސްޓަރު)
- ދުވާފަރު ދާއިރާ – އަޒްލީން އަހުމަދު (ކުރީގެ ހޯމް މިނިސްޓަރު)
- ތިނަދޫ އުތުރު ދާއިރާ – އަބްދުﷲ އަހުމަދު (ތިނަދޫ ދެކުނު ދާއިރާގެ ކުރީގެ މެމްބަރު)
- ނޮޅިވަރަމް ދާއިރާ – ހުސައިން ޝަހުދީ (ކުރީގެ ހަނިމާދޫ ދާއިރާގެ މެމްބަރު)
- ދާންދޫ ދާއިރާ – ނިޝާމާ މުހައްމަދު
- އޭދަފުށީ ދާއިރާ – މުހައްމަދު ނާސިރު
ރައްޔިތުންގެ މަޖިލީހުގެ އިންތިހާބަށް ވާދަކުރައްވަން ފޯމް ހުށަހެޅުމުގެ މުއްދަތު މިއަދު ވަނީ ހަމަވެފައެވެ. މާޗް 17 ވަނަ ދުވަހު ބޭއްވުމަށް ހަމަޖެހިފައިވާ އިންތިހާބުގައި 93 ދާއިރާއަކަށް މެމްބަރުން އިންތިހާބު ކުރާނެއެވެ. މިފަހަރުގެ އިންތިހާބު ރޯދަ މަހާ ދިމާވާތީ ރޯދަ މަސް ނިމޭތާ 10 ދުވަސް ފަހުން އިންތިހާބު ބޭއްވުމަށް އިންތިހާބުތަކާ ބެހޭ އާންމު ގާނޫނަށް އިސްލާހު ގެނައުމުގެ ބިލް ރައްޔިތުންގެ މަޖިލިހުން ވަނީ ފާސްކޮށްފައެވެ.
މަޖިލިހުން ފާސް ކުރި ނަމަވެސް ރައީސް ޑރ. މުހައްމަދު މުއިއްޒު އެ ބިލް އަދި ތަސްދީގު ކުރައްވާފައެއް ނުވެއެވެ.
