އިންޑިއާގެ ބޮޑުވަޒީރު ނަރެންދުރަ މޯދީ ފެބްރުއަރީ މަހުގެ 13 އިން 14 އަށް ޔުނައިޓެޑް އަރަބް އެމިރޭޓްސް (ޔޫއޭއީ) އަށް ކުރައްވާ ދެ ދުވަހުގެ ރަސްމީ ދަތުރުފުޅުގައި އަބޫދާބީގެ ފުރަތަމަ ހިންދޫ ޓެމްޕަލް ހުޅުވުމަށް ނިންމައިފިއެވެ.
އިންޑިއާގެ އެކްސްޓާނަލް އެފެއާޒް މިނިސްޓްރީން ނެރުނު ނޫސްބަޔާނެއްގައި ބުނީ މޯދީ ޔޫއޭއީގެ ރައީސް ޝެއިޚް މުހައްމަދު ބިން ޒައިދު އަލް ނަހްޔާންއާ އެކު ބައިލެޓަރަލް ބައްދަލުވުމެއް ބޭއްވުމަށް ހަމަޖެހިފައިވާ ކަމަށާއި ވޯލްޑް ގަވަމެންޓް ސަމިޓް 2024 ގައި ވެސް މޯދީ ބައިވެރިވެވަޑައިގަންނަވާނެ ކަމަށެވެ.
"ބޮޑުވަޒީރު ނަރެންދުރަ މޯދީ 2024 ވަނަ އަހަރުގެ ފެބްރުއަރީ މަހުގެ 13 އިން 14 އަށް ޔުނައިޓެޑް އަރަބް އެމިރޭޓްސް (ޔޫއޭއީ) އަށް ރަސްމީ ދަތުރުފުޅެއް ކުރައްވާނެ،" އެމްއީއޭގެ ބަޔާނުގައި ވެ އެވެ.
މިއީ 2015 ވަނަ އަހަރުގެ ފަހުން މޯދީ ޔޫއޭއީއަށް ކުރައްވާ ހަތްވަނަ ދަތުރުފުޅެވެ. ބޮޑުވަޒީރުގެ މި ދަތުރުފުޅުގައި ޔޫއޭއީގެ ރައީސް ޝެއިޚް މުހައްމަދު ބިން ޒައިދު އަލް ނަހްޔާންއާ ބައްދަލުކުރެއްވުމަށް ވަނީ ހަމަޖެހިފައެވެ. މި ބައްދަލުކުރެއްވުމުގައި ދެ ޤައުމުގެ ދެމެދުގައި ވާ ސްޓްރެޓެޖިކް ޕާޓްނަރޝިޕް އިތުރަށް ހަރުދަނާކޮށް ފުޅާކުރުމާއި، ދެޤައުމުގެ މަސްލަހަތު ހިމެނޭ ސަރަޙައްދީ އަދި ބައިނަލްއަޤްވާމީ ކަންކަމުގައި ޚިޔާލު ބަދަލުކުރެއްވުމާ ބެހޭގޮތުން ދެބޭފުޅުން މަޝްވަރާކުރައްވާނެ ކަމަށްވެސް ބަޔާނުގައި ވެއެވެ.
މީގެ އިތުރުން ޔޫއޭއީގެ ނައިބު ރައީސް، ބޮޑުވަޒީރު އަދި ޑިފެންސް މިނިސްޓަރު ޝެއިހް މުހައްމަދު ބިން ރާޝިދު އަލް މަކްތޫމްއާ ވެސް މޯދީ ބައްދަލު ކުރައްވާނެ އެވެ. ބޮޑުވަޒީރުގެ ދައުވަތަކަށް ދުބާއީގައި ބޭއްވުމަށް ހަމަޖެހިފައިވާ ވޯލްޑް ގަވަރމަންޓް ސަމިޓް 2024 ގައި ޝަރަފުވެރި މެހެމާނެއްގެ ގޮތުގައި ބައިވެރިވެވަޑައިގެން ސަމިޓުގައި ޚާއްޞަ ކީނޯޓް ތަޤްރީރެއް މޯޑީ ކުރެއްވުމަށް ވަނީ ހަމަޖެހިފައެވެ.
އިންޑިއާ އާއި ޔޫއޭއީއަކީ ސިޔާސީ، ސަގާފީ އަދި އިގްތިސާދީ ގޮތުން ބަދަހި ގުޅުމެއް އޮންނަ ދެ ގައުމު ކަމަށް އިންޑިއާގެ އެކްޓާނަލް މިނިސްޓްރީން ވަނީ ބުނެފައެވެ.
ފާހަގަކޮށްލެވޭ ގޮތުގައި އިންޑިއާ އާއި ޔޫއޭއީއަކީ 2022-23 ވަނަ އަހަރު ގާތްގަނޑަކަށް 85 ބިލިއަން ޑޮލަރުގެ ބައިލެޓަރަލް ވިޔަފާރީގެ މުއާމަލާތްތައް ކޮށްފައިވާ ދެ ގައުމެވެ. ޔޫއޭއީ އަކީ 2022-23 ވަނަ އަހަރު ފޮރިން ޑައިރެކްޓް އިންވެސްޓްމަންޓްތަކަށް ބަލާއިރު އިންޑިއާގެ އެންމެ ބޮޑު ހަތަރު އިންވެސްޓަރުންގެ ތެރޭގައި ހިމެނޭ ގައުމެކެވެ.
ޔޫއޭއީގައި އޮންނަ ގައުމުން ބޭރުމީހުންގެ އެންމެ ބޮޑު އާބާދީއަކީ އިންޑިއާ މީހުންނެވެ. އެއީ ގާތްގަނޑަކަށް 3.5 މީހުންނެވެ.
