އިންޑިއަން އޯޝަން ކޮންފަރެންސްގައި ފޮރިން މިނިސްޓްރީގެ ސްޓޭޓް މިނިސްޓަރު ޝެރީނާ ސަމަދް ބައިވެރިވެ ވަޑައިގެންފިއެވެ.
އިންޑިއަން އޯޝަން ކޮންފަރެންސް މިއަހަރު ބާއްވަނީ އޮސްޓްރޭލިއާގެ ޕާތް ސިޓީގައެވެ. މިއީ މިފަދަ ކޮންފަރެންސެއް ބައިވެރިވާ ހަތް ވަނަ ފަހަރެވެ.
މި ކޮންފަރެންސްގައި ރާއްޖޭގެ އިތުރުން އޭޝިއާ ސަރަހައްދުގެ ގިނަ ގައުމުތަކުން ބައިވެރިވާއިރު، މި ކޮންފަރެންސްގައި، ކޮންމެ ގައުމެއްގެ ވެސް ސަރަޙައްދީ ރައްކާތެރިކަމާއި، ގައުމުތައް އިތުރަށް ތަރައްގީ ކުރުމަށް ކުރެވިދާނެ ކަންތައްތަކާއި ބެހެގޮތުން އަންނަނީ މަޝްވަރާކުރައްވަމުންނެވެ.
އިންޑިއަން އޯޝަން ކޮންފަރެންސްގައި މިފަހަރު ރާއްޖޭގެ ފަރާތުން ސްޓޭޓް މިނިސްޓަރެއް ބައިވެރިވެވަޑައިގަންނަވާ އިރު، އިންޑިއާގެ ފަރާތުން ބައިވެރިވެވަޑައިގަންނަވަނީ އެ ގައުމުގެ އެކްސްޓާނަލް އެފެއާޒް މިނިސްޓަރު އެސް ޖައިޝަންކަރެވެ. އަދި ސްރީލަންކާގެ ފަރާތުން ބައިވެރިވެވަޑައިގަންނަވަނީ އެ ގައުމުގެ ބޮޑުވަޒީރު ރަނިލް ވިކްރަމަސިންހައެވެ.
އިންޑިއަން އޯޝަން ކޮންފަރެންސް ކުރިއަށްދާނީ މިމަހުގެ 9 އިން 10 ގެ ނިޔަލަށެވެ.
