ރައީސް ސާލިހުގެ ދައުރުގައި ރާއްޖޭގައި އޭރުގެ އިނދިކޮޅު ފަރާތްތަކުން ކުރިޔަށް ގެންދިޔަ "އިންޑިއާ އައުޓު" ކެމްޕޭން ހުއްޓުވަން ރައީސް ސާލިހު ނެރުއްވި ގަރާރު މި ސަރުކާރުން އުވާލާފައި ނުވާތީ ރައީސް ޔާމިން ފާޑު ވިދާޅުވެއްޖެއެވެ.
"އިންޑިއާ އައުޓު" ގަރާރު ބާތިލް ކޮށްފައި ނުވާތީ ޔާމިން ފާޑު ވިދާޅުވެފައިވަނީ، އެމަނިކުފާނު އުފައްދާ ޕީއެންއެފްގެ އޮފީހުގައި ރޭ ބޭއްވި ޖަލްސާގައި ވާހަކަ ދައްކަވަމުންނެވެ.
އާންމު އުސޫލުން ޔާމިން ރޭވެސް ވާހަކަ ދައްކަވާފައިވަނީ، ޕޯޑިއަމްގައި ވާހަކަ ދެއްކެވި ބޭފުޅެއްގެ ވާހަކައަށް ކުރެއްވި ކޮމެންޓެއްގެ ގޮތުގައެވެ.
ރޭގެ ޖަލްސާގައި ޔާމިން ވިދާޅުވީ އިންޑިއާއަށްވެސް ބަލައި ނުގަނެވުނު ކަމަކީ ސަރުކާރުގެ 3 ޑެޕިއުޓީ މިނިސްޓަރަކު ބޭއަދަބީކޮށް އިންޑިއާގެ ވެރިންނަށް ނިސްބަތްކޮށް ވާހަކަ ދެއްކެވި ދެއްކެވުން ކަމުގައެވެ. ރައީސް ޔާމިން ވިދާޅުވީ 3 ޑެޕިއުޓީ މިނިސްޓަރުން އިންޑިއާގެ ވެރީންނަށް ފާޑުކިޔާފައިވަނީ އިޖުތިމާއީ މިންގަޑުތައް ފަހަނައަޅާ ދާ މިންވަރަށް ކަމަށާއި އެއީ އެމަނިކުފާނަށްވެސް ގަބޫލު ކުރެވޭ މިންގަޑެއް ނޫން ކަމުގައެވެ.
އަދި ރައީސް ޔާމިން ވިދާޅުވީ އިންޑިއާ ސިފައިން ރާއްޖޭގައި ތިބެގެން ނުވާނެކަމަށް އިންޑިއާ ރައްޔިތުންވެސް ގަބޫލުކުރާ ކަމުގައެވެ.
އެހެންވީމަ މި އުޅޭ މައްސަލަތައް އުފެދިގެން އައިސް މިހާ ހިސާބަށް މި ދިޔައީ ހަގީގަތުގައި، އަދި ބަޔެއްގެ ފަރާތުން އެކަން ގޯސްވެގެން މި ދެންނެވި ގޮތަށް ތިން ނައިބު މިނިސްޓަރުން މިކަހަލަ ވާހަކަ ދެއްކިޔަސް, އަސްލުގައި މި މައްސަލަ ގޯސްވެގެން މި ދިޔަ ހިސާބަކީ އަޅުގަނޑުމެން ކުރަން ނުޖެހޭ ކަމެއް ކުރީމައި.
ޔާމީން ވިދާޅުވިއެވެ.
ޔާމިން އިތުރަށް ވިދާޅުވީ ހަމަ އެއާއެކު އިންޑިއާ އައުޓު ގަރާރު ބާތިލް ކުރުމަކީ ފަސޭހަކަމެއް ނޫންކަމަށް ރައީސް އޮފީހުން ގަބޫލުކުރާ ކަމަށާއި، އެކަމުގެ ތަރުޖަމާ ދެއްވަނީ ގާސިމް އިބުރާހިމް ކަމުގައެވެ.
މިހާރު ރައީސް އޮފީހުން މި ވިދާޅުވަނީ އެ ގަރާރު ބާތިލް ކުރުމަކީވެސް ކުރަން ފަސޭހަކަމެއް ނޫނޭ. ދެން ގާސިމް މި ދެއްވަނީ ތަރުޖަމާއެއް [ރައީސް] މުއިއްޒު ގަރާރު ބާތިލެއް ނުވެސް ކުރެއްވިޔޭ ނުވެސް ކުރައްވާނެޔޭ.. އޭގެ އިންފަރެންސްއަކީ މުއިއްޒު ބޭނުންފުޅެއް ނުވެޔޭ އިންޑިއާ ސިފައިން މިތަނުން ބާލާކަށް، ދެން އަޅުގަނޑުމެންނަށް ގާސިމް މިފެންނަނީ ހަމަ ވަރަށް [ރައީސް] މުއިއްޒުގެ އިސް މުޝީރެއްގެ ގޮތުގައި.
ޔާމީން ވިދާޅުވިއެވެ.
ޔާމިން ވިދާޅުވީ އެ ގަރާރު ބާތިލުކުރުމަކީ ފަސޭހަ ކަމެއް ނޫން ކަމަށް މި ސަރުކާރުން ބުނި ނަމަވެސް މިއީ ގައުމީ މައްސަލައެއް ކަމަށްވާތީ އެކަން ކުރެވޭނެ ކަމަށް ޔާމީން ވިދާޅުވިއެވެ.
ރައީސް ސާލިހުގެ ވެރިކަމުގައި އޭރުގެ އިދިކޮޅު ފަރާތްތަކުން ހިންގި "އިންޑިއާ އައުޓް" ހަރަކާތަކީ ގައުމީ ސަލާމަތަށް ހުރި ނުރައްކަލެއް ކަމަށް ގައުމީ ސަލާމަތާ ބެހޭ މަޖިލީހުން ކަނޑައަޅާ އެކަން ތަންފީޒުކުރުމަށް ދައުލަތުގެ އިދާރާތަކަށް ރައީސުލްޖުމްހޫރިއްޔާ އެންގެވީ 2022 ވަނަ އަހަރުގެ އެޕްރިލްމަހުގެ 22 ވަނަ ދުވަހުއެވެ. ރައީސް ގަރާރު ނެރުއްވިތާ ކުޑަވަގުތުކޮޅެއްގެ ތެރޭގައި ފުލުހުންވަނީ ރައީސް ޔާމިންގެ ގެކޮޅުގައި ދަމާފައިހުރި އިންޑިއާ އައުޓުގެ ބޮޑު ބެނާރ ނަގާފައެވެ.
އެއަށްފަހު އިންޑިއާ އައުޓު ހަރަކާތް އެކަށީގެންވާ ގޮތެއްގައި ކުރިޔަށް ގޮސްފައެއް ނުވެއެވެ.
