ރައީސް ޑރ. މުހައްމަދު މުއިއްޒުގެ ކެބިނެޓްގެ ވަޒީރުންނަށް ރުހުން ދިނުމަށް މިއަދު ބޭއްވި ޖަލްސާގައި އިކޮނޮމިކް މިނިސްޓަރު މުހައްމަދު ސައީދާއި ބަންޑާރަ ނައިބު އަހުމަދު އުޝާމާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށް ރުހުން ދޭން ފެނޭތޯ ނެގި ވޯޓުގައި އެމްޑީޕީގެ ހަ މެމްބަރަކު ވިޕްލައިނާ ހިލާފުވެވަޑައިގެންފިއެވެ.
މިއަދުގެ ޖަލްސާގައި ނެގި ވޯޓުގައި އިހަވަންދޫ ދާއިރާގެ މެމްބަރު މުހައްމަދު ޝިފާއު އާއި ފުވައްމުލަކު ދެކުނު ދާއިރާގެ މެމްބަރު މުހައްމަދު މުމްތާޒާއި ކުޅުދުއްފުށި ދެކުނު ދާއިރާގެ މެމްބަރު ޖަމްޝީދު އަދި ބިލެއްދޫ ދާއިރާގެ މެމްބަރު އަހުމަދު ހަލީމް ވަނީ ސައީދަށް ރުހުން ދޭން ފެންނަ ކަމަށް ވޯޓު ދެއްވައިފައެވެ. އަދިކުޅުދުއްފުށި އުތުރު ދާއިރާގެ މެމްބަރު ޔާސިރު އަބްދުއްލަތީފް ތަޅުމުގައި އިންނެވި ނަމަވެސް ވޯޓުގައި ބައިވެރިވެވަޑައިނުގަންނަވައެވެ.
އިކޮނޮމިކް މިނިސްޓަރު ސައީދަށް ރުހުން ނުދިނުމަށް އެމްޑީޕީން އިއްޔެ ވަނީ ތްރީ ލައިން ވިޕެއް ނެރެފައެވެ. ސައީދުގެ އިތުރުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ބަންޑާރަ ނައިބު އަހުމަދު އުޝާމާއި ހައުސިން މިނިސްޓަރު ޑރ. އަލީ ހައިދަރަށް ރުހުން ނުދޭން ވެސް އެމްޑީޕީން ތްރީލައިން ވިޕެއް ނެރުނެވެ. މަޖިލިހުގެ މިއަދުގެ ޖަލްސާގައި އެމްޑީޕީގެ ނިންމުމާ އެއްގޮތަށް އެ ތިން ވަޒީރުންނަށް ރުހުން ދިނުމަށް ފާސްވެފައެއް ނުވެއެވެ.
ސައީދަށް ރުހުން ދޭން ފެނޭތޯ ނެގި ވޯޓު ނެގި ވަގުތު މަޖިލިހުގެ ތަޅުމުގައި 71 މެމްބަރުން ތިއްބެވިއެވެ. ސައީދަށް ރުހުން ދޭން ނުފެންނަ ކަމަށް 32 ވޯޓު ދެއްވި އިރު، އޭނާ އަށް ރުހުން ދޭން ފެންނަ ކަމަށް 37 މެމްބަރުން ވޯޓު ދެއްވިއެވެ.
ޝަހީމަށް ރުހުން ފެނޭތޯ ނެގި ވޯޓުގައި އެވަގުތު މަޖިލިހުގެ ތަޅުމުގައި 71 މެމްބަރުން ތިއްބެވިއެވެ. އޭނާ އަށް ރުހުން ދޭން ފެންނަ ކަމަށް 30 މެމްބަރުން ވޯޓު ދެއްވި އިރު، ރުހުން ދޭން ނުފެންނަ ކަމަށް 31 މެމްބަރުން ވޯޓު ދެއްވިއެވެ. އަދި ވަކި ގޮތަކަށް ވޯޓު ނުދެއްވާ އަށް މެމްބަރުން ތިއްބެވިއެވެ.
ޝަހީމްގެ ވޯޓުގައި އެމްޑީޕީގެ ވިޕްލައިނާ ހިލާފުވެ، ޝަހީމަށް ރުހުން ދޭން ފެންނަ ކަމަށް ވޯޓު ދެއްވި އެމްޑީޕީގެ މެމްބަރުންނަކީ ހެންވޭރު ދެކުނު ދާއިރާގެ އެމްޑީޕީގެ މެމްބަރު ހުސެއިން ޝަހީމް (އަނދުން ހުސެއިން) އާއި މަކުނުދޫ ދާއިރާގެ އެމްޑީޕީގެ މެމްބަރު މުހައްމަދު ރާއީ އާއި ފުވައްމުލަކު މެދު ދާއިރާގެ މެމްބަރު މުހައްމަދު މުމްތާޒް އާއި ޝިފާއު އާއި ޖަމްޝީދާއި ހަލީމެވެ.
ބަންޑާރަ ނައިބަށް ރުހުން ދޭން ފެނޭތޯ ނެގި ވޯޓުގައި މަޖިލިހުގެ ތަޅުމުގައި 71 މެމްބަރުން ތިއްބެވިއެވެ. އޭނާ އަށް ރުހުން ދޭން ނުފެންނަ ކަމަށް 44 މެމްބަރުން ވޯޓު ދެއްވި އިރު، ރުހުން ދޭން ފެންނަ ކަމަށް 24 މެމްބަރުން ވޯޓު ދެއްވިއެވެ. މި ވޯޓުގައި އެމްޑީޕީގެ ވިޕާ ހިލާފުވެ، އުޝާމަށް ރުހުން ދޭން ފެންނަ ކަމަށް ވޯޓު ދެއްވީ މުމްތާޒް އެކަންޏެވެ.
ހައުސިން މިނިސްޓަރު ޑރ. އަލީ ހައިދަރަށް ރުހުން ދޭން ފެނޭތޯ ނެގި ވޯޓުގައި 71 މެމްބަރުން މެމްބަރުން ތިއްބެވިއެވެ. އޭނާ އަށް ރުހުން ދޭން ފެންނަ ކަމަށް 24 މެމްބަރުން ވޯޓު ދެއްވި އިރު، ހައިދަރަށް ރުހުން ނުދޭން ފެންނަ ކަމަށް 46 މެމްބަރުން ވޯޓު ދެއްވިއެވެ. އެންމެ ގިނަ މެމްބަރުންގެ ވޯޓުން ރުހުން ލިބިވަޑައިގެންނެވި ވަޒީރަކީ ވެސް ހައިދަރެވެ. މި ވޯޓުގައި ޖަމްޝީދު ވަކި ގޮތަކަށް ވޯޓު ނުދެއްވާ މަޖިލިހުގެ ތަޅުމުގައި އިންނެވިއެވެ.
އުޝާމާއި ޑރ. ޝަހީމާއި ޑރ. ހައިދަރަށް ރުހުން ނުދޭން އެމްޑީޕީ އާއި ޑިމޮކްރެޓްސްގެ ކޮންޓްރޯލް އޮންނަ މަޖިލިހުން މިއަދު ފާސްކުރިޔަސް އެ ބޭފުޅުން ތިއްބެވި މަގާމުތަކަށް ރައީސް ޑރ. މުހައްމަދު މުއިއްޒު ވަނީ އަލުން މިރޭ އައްޔަން ކުރައްވައިފައެވެ. އެ ބޭފުޅުންނަށް މަގާމުގެ ހުވާލައި ދެއްވީ ސުޕްރީމް ކޯޓުގެ ފަނޑިޔާރު ހުސްނުއްސުއޫދެވެ.
މަޖިލިހުން މިއަދު ރުހުން ނުލިބުނު ތިން ވަޒީރުން އެ ބޭފުޅުން މި ސަރުކާރުގައި ކުރިން ވެސް ތިއްބެވި މަގާމުތަކަށް އަލުން އައްޔަން ކުރެއްވުމާ އެކު، އަނެއްކާވެސް މަޖިލިހުގެ ރުހުން ހޯއްދަވަން ފޮނުވަންޖެހެއެވެ.
