އެމްޑީޕީ އާއި ޑިމޮކްރެޓްސްގެ ފަރާތުން ބާއްވާ ޕްރެސްއެއް މިއަދު ބާއްވާ ގޮތަށް ހަމަޖެހިއްޖެއެވެ.
މި ޕްރެސް ބޭއްވުމަށް ހަމަޖެހިފައިވަނީ މިއަދު ހަވީރު 4:00 ޗަންޕާ ސެންޓްރަލް ހޮޓެލް ގައެވެ. އެމްޑީޕީއައި ޑިމޮކްރެޓްސް ގުޅިގެން މިއަދު ޕްރެސްއެއް ބޭއްވުމަށް ހަމަޖެހިފައިވާއިރު، ދެ ޕާޓީގެ ލީޑަރޝިޕްގެ ބައެއް ބޭފުޅުން ދާދިފަހުން ވަނީ ބައްދަލު ކުރައްވާފައެވެ.
މިކަން ހާމަވެފައިވަނީ ދެ ޕާޓީގެ އިސް ބައެއް ބޭފުޅުން އެކީ ކޮފީ މޭޒެއްގައި ބައްދަލުކުރާ މަންޒަރު ދައްކުވައިދޭ ފޮޓޯއެއް ސޯޝަލް މީޑިއާގައި ދައުރުވާން ފެށުމާއި ގުޅިގެންނެވެ.
ސޯޝަލް މީޑިއާގައި ދައުރުވެފައިވާ ފޮޓޯގައި ކޮފީ މޭޒެއްގެ ދޮށުގައި ތިބިތަން ފެންނަނީ، އެމްޑީޕީގެ ޗެއާޕާސަން ފައްޔާޒު އިސްމާއީލާއި އެމްޑީޕީގެ، ހުޅުމާލެ ދާއިރާގެ މެމްބަރު އަލީ ނިޔާޒުގެ އިތުރުން ދަ ޑިމޮކްރެޓްސްގެ ރައީސް ހަސަން ލަތީފް އާއި ޕާލަމެންޓްރީ ގްރޫޕްގެ ލީޑަރު، މެދުހެންވޭރު ދާއިރާގެ މެމްބަރު އަލީ އާޒިމްގެއާއި ގަލޮޅު އުތުރު ދާއިރާގެ މެމްބަރު އީވާ އާއި މަޑަވެލި ދާއިރާގެ މެމްބަރު ހުސެއިން ފިރުޝާން އަދި ހުޅުދޫ ދާއިރާގެ މެމްބަރު އިލްޔާސް ލަބީބެވެ.
މިއީ ކޮންއިރަކު ނަގާފައިވާ ފޮޓޯއެއްކަން އެނގޭކަށް ނެތެވެ. އެހެންނަމަވެސް ބެލެވޭ ގޮތުގައި މިއީ ވަރަށް ފަހުގެ ފޮޓޯއެކެވެ.
އެމްޑީޕީގެ ވެރިކަމުގައި އެ ޕާޓީ ތެރޭގައި އުފެދުނު ސިޔާސީ ކޯޅުމަށްފަހު އެޕާޓީ ދޫކޮށްދިޔަ ފަރާތްތަކުން ޑިކޮމްރެޓްސް ޕާޓީ އުފެއްދުމާއެކު ދެ ޕާޓީ ވެގެންދިޔައީ ވަރަށް ވާދަވެރި ދެ ޕާޓީކަމުގައެވެ.
އަދި ރިޔާސީ އިންތިޚާބުގައި ޑިމޮކްރެޓްސް ޕާޓީން އެމްޑީޕީއަށް ތާއީދުކޮށްފައެއްވެސް ނުވެއެވެ. އެހެންނަމަވެސް ފަހަކަށް އައިސް މި ސަރުކާރު ޒިންމާދާރު ކުރުމަށް ދެ ޕާޓީ އެއްގަލަކަށް އަރާންޖެހޭކަމަށް ދެޕާޓީއަށް ނިސްބަތްވާ ބައެއް ފަރާތްތަކުން ދަނީ ބުނަމުންނެވެ.
