މާލޭ ސިޓީ ކައުންސިލުން ހިންގާ ބޮޑެތި މަޝްރޫއުތައް އިންފްރާސްޓަރަކްޗަ މިނިސްޓްރީއާ ހަވާލު ކުރުމަށް ސިޓީ ކައުންސިލުންމިއަދު ފާސްކުރުމާ ގުޅިގެން އިންތިހާބީ މޭޔަރު އާދަމް އާޒިމް ކަންބޮޑުވުން ފާޅުކުރައްވައިފިއެވެ.
އާޒިމް "އެކްސް" ގައި ކުރެއްވި ޕޯސްޓެއްގައި ވިދާޅުވީ ސިޓީ ކައުންސިލުން ފާސް ކުރި އެ ނިންމުމަކީ މާލެ ސިޓީގެ ކަންކަން ކުރިއަށް ގެންދަންވީ ގޮތް ރައްޔިތުން ސާފުކޮށް ބުނެފައި ވަނިކޮށް ގާނޫނުއަސާސީގެ އަށް ވަނަ ބާބާއި ލާމަރުކަޒީ ގާނޫނުގައި ކަނޑައަޅާފައިވާ ގޮތާ ހިލާފަށް ކުރައްވާފައިވާ ކަމެއް ކަމަށެވެ.
މާލެ ސިޓީގެ ކަންކަން ކުރިއަށްގެންދާންވީ ގޮތް ރައްޔިތުން ސާފުކޮށް ބުނެފައި ވަނިކޮށް، އަދި ޤާނޫނުއަސާސީގެ 8 ވަނަ ބާބާއި ލާމަރުކަޒީ ޤާނޫނުގައި ކަނޑައަޅާފައިވާ ގޮތާއި ޚިލާފަށް، ރައީސްއޮފީހުގެ ވަޒީރުބޭފުޅުން ވަންނަވައިގެން ސިޓީ ކައުންސިލުގެ މަސައްކަތްތައް އަތުލައްވަން ކުރައްވާ…
— Adam Azim (@adamazim) January 17, 2024
ރައީސް އޮފީހުގެ ވަޒީރު ބޭފުޅުން ވަންނަވައިގެން ސިޓީ ކައުންސިލްގެ މަސައްކަތްތައް އަތުލައްވަން ކުރައްވާ މަސައްކަތްތައް ހުއްޓާލެއްވުމަށް ސަރުކާރަށް ގޮވާލާ ކަމުގައި އާޒިމް ވިދާޅުވިއެވެ. އަދި މާލެ ރައްޔިތުން އިންތިހާބުކޮށްފައިވާ މޭޔަރު މަގާމާ ހަވާލުވަންދެން ކައުންސިލުން ނިންމި ނިންމުމަށް އަމަލު ކުރުން ފަސް ކުރުމަށް އާޒިމް އެދިވަޑައިގެންނެވިއެވެ.
މިއަދު އިންފްރާސްޓްރަކްޗަރ މިނިސްޓްރީއާއި ހަވާލުކުރުމަށް ނިންމި މަޝްރޫއުތަކުގެ އަގު 120 މިލިއަން ރުފިޔާއަށް އަރައެވެ.
މިއަދު ބޭއްވުނީ މާލޭ ސިޓީ ކައުންސިލްގެ ހަތަރުވަނަ ދައުރުގެ 130 ވަނަ ޖަލްސާއެވެ. މިޖަލްސާއަށް އެޖެންޑާ ކޮށްފައި އޮތީ މަޝްރޫއުތަކާ ގުޅޭ ގޮތުން ހުރި ބައެއް ހުށަހެޅުންތަކާ ގުޅޭ ގޮތުން ގޮތެއް ނިންމުމެވެ.
މިއަދުގެ ކައުންސިލް ބައްދަލުވުމުގައި، ކައުންސިލުން ހިންގި މަޝްރޫއުތަކާ ހަވާލުވެގެން އޭރު ހުންނެވި މިހާރު ރައީސް އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ކޯޕަރޭޓް ޑިވެލޮޕްމަންޓް، މުހައްމަދު ޝާހިދު ވަނީ ބައިވެރިވެވަޑައިގެންފައެވެ.
އަދި އޭނާ ކައުންސިލް ބައްދަލުވުމަށް ހުށަހެޅުއްވީ، ބައެއް މަޝްރޫއުތައް އަވަސްކުރަން ކަމާ ގުޅުންހުރި މިނިސްޓްރީއާ ހަވާލުކުރުމަށެވެ.
އޭނާ ހުށަހެޅުއްވީ، ޕްރޮޖެކްޓްތައް ކަމާއި ގުޅުންހުރި ވުޒާރާތަަކަށް ހަވާލު ކުރާއިރު، މިހާރުވެސް އެއްބަސްވެފައި ހުރި ޓާމްސްތަކުގައި މަޝްރޫޢުތައް ކަމާގުޅުންހުރި ވުޒާރާތަކާއި ހަވާލު ކުރުމަށެވެ. ވުރާތަކާއި މަޝްރޫޢުތައް ހަވާލުކުރުމަށް އޭނާ ނިންމު ސަބަބަކީ މަސައްކަތް އަވަސްކުރުންކަމަށްވެސް އެނާ ވިދާޅުވިއެވެ.
މިއަދު ކައުންސިލް ޖަލްސާއަށް ހުށަހެޅު ހުށަހެޅުން އޮތް ގޮތަށް ފާސްކުރަން ހުޅުމާލޭ ދާއިރާގެ ކައުންސިލަރު އިބްރާހިމް ޝުޖާއު ހުށަހެޅުއްވުމުން، ސަރުކާރަށް މެޖޯރިޓީ އޮތް ކައުންސިލުން ވަނީ އެ ހުށަހެޅުން އޮތް ގޮތަށް ފާސްކޮށްފައެވެ.
ބައްދަލުވުމުގައި ބައިވެރިވި 11 ކައުންސިލަރުންގެ ތެރެއިން 10 ކައުންސިލަރުން ވަނީ އެ ކަމަށް ތާއީދުކުރައްވައިފައެވެ. އެއް ކައުންސިލަރު ވަކި ގޮތަކަށް ވޯޓެއް ނުދެއްވައެވެ.
