ރާއްޖޭގަ އޮތް ގާނޫނީ ސަރުކާރު ބާރުގެ ބޭނުން ކޮށްގެން ބަދަލު ކުރުމަށް އިންޑިއާގެ ނުފޫގަދަ، ބީޖޭޕީ ސަރުކާރަށް ނިސްބަތްވާ ސިޔާސީ ފަރާތަކުން ގޮވާލައިފިއެވެ.
އިސްލާމް ދީނާއި ދެކޮޅަށްވެސް ޓުވީޓު ކުރުމަށް މަޝްހޫރު، ބީޖޭޕީ ސަރުކާރުގެ ކުރީގެ މިނިސްޓަރެއް ކަމަށްވާ ސުބްރަމާނިއަމް ސުވަމީ ވަނީ ރަޖީވް ގާނދީ އިންޑިއާ ސިފައިން ރާއްޖެއަށް ފޮނުވި ފަދައިން އިންޑިއާ ސިފައިން ފޮނުގައިގެން ރައީސް މުއިއްޒު ވެރިކަމުން ދުރުކުރަން ނުވޭތޯ ސުވާލު އުފައްދާފައެވެ.
ސުބްރަމާނިއަމް ސުވަމީއަކީ ބީޭޕީ ސަރުކާރުގެ ކުރީގެ ވަޒީރެއްގެ އިތުރުން 6 ދައުރު އިންޑިއާގެ ގާނޫނުހަދާ މަޖިލިހުގެ މެމްބަރުކަން ކުރައްވަމުންގެންދަވާ ފަރާތެއްވެސް މެއެވެ.
ސުބްރަމާނިއަމް ސުވަމީގެ އެކްސް ޕޯސްޓުގައި އޭނަ ވިދާޅުވެފައިވަނީ، ރައީސް މުއިއްޒު ޗައިނާއަށް ކުރެއްވި ދަތުރުފުޅަށްފަހު، އަންނަ މާރޗަމަހުގެ 15ގެ ކުރިން ރާއްޖޭގަ ތިބި އިންޑިއާ ސިފައިން ރާއްޖެ ދޫކޮށް ދިއުމަށް އަންގާފައިވާ ކަމަށާއި، އިންޑިއާގެ ބޮޑުވަޒީރު، ރާއްޖެއިން އިންޑިއާގެ މޫނުމައްޗަށް "ބޭވަފާތެރި ރާއްޖެއިން" ޖެހި ކިސަޑު ސާފު ކުރާނީތޯ ނުވަތަ ރަޖީވް ގާނދީފަދައިން ރާއްޖެއަށް އިންޑިއާ ސިފައިން ފޮނުވައިގެން ރާއްޖޭގަ އޮތް ގާނޫނީ ސަރުކާރު ބަދަލުކުރާނީތޯ ސުވާލު ކުރައްވާފައެވެ.
Maldive President Muizzu after a visit to China has declared PM Modi must ensure Indian troops and associates quit the island by March 15th or face consequences. Will Modi with mud on Bharat Mata’s face flung by namak haram Maldives, tuck his tail or like Rajiv Gandhi send the…
— Subramanian Swamy (@Swamy39) January 15, 2024
އިންޑިއާގެ އިސް ފަރާތަކުން ރާއްޖޭގަ އޮތް ގާނޫނީ ސަރުކާރު ބަދަލުކުރަން ގޮވާލާފައިވާއިރު، ރާއްޖޭގެ ތިބި އިންޑިއާ ސިފައިން ބޭލުމާއި ގުޅޭގޮތުން ދެގައުމުގެ މެދުގައި އުފައްދާފައިވާ ހައިލެވެލް ކޯރ ގްރޫޕްގެ ފުރަތަމަ ބައްދަލުވުން އިއްޔެ މާލޭގައި ވަނީ ބާއްވާފައެވެ.
އަދި އިއްޔެ އިންޑިއާއާއި ރާއްޖެއާ ދެމެދުން ބޭއްވުނު ބައްދަލުވުމަށްފަހު ފޮރިން މިނިސްޓްރީން ނެރުނު ބަޔާނުގައި ވިދާޅިވެފައިވަނީ، ރާއްޖޭގައި ތިބި އިންޑިއާ ސިފައިން އަނބުރާ ގެންދިއުމުގެ މަސައްކަތް އަވަސް ކުރުމަށް ދެފަރާތުންވެސް އެއްބަސްވެފައި ވާކަމުގައެވެ.
އެހެންނަމަވެސް ބައްދަލުވުމަށްފަހު އިންޑިއާގެ އެކްސްޓާނަލް އެފެއާޒް މިނިސްޓްރީން ނެރުނު ބަޔާނުގައި، ރާއްޖޭގައި ތިބި އިންޑިއާ ސިފައިން ބޭލުމުގެ ވާކަ ނުގެނެސް ވިދާޅުވެފައިވަނީ އިންޑިއާގެ ވައިގެ ޕްލެޓްފޯމްތަކުން ދިވެހި ރައްޔިތުންނަށް ފޯރުކޮށްދެމުންދާ އިންސާނީ އަދި ސިއްޙީ އެހީތެރިކަން އިތުރަށް ފުރިހަމަކަށް ކުރިޔަށް ގެންދިއުމުގައި ދެފަރާތަށް އެއްބަސްވެވޭ ހައްލެއް ހޯދުމަށް މަޝްވަރާ ކޮށްފައިވާ ކަމުގައެވެ.
