ސިޔާސީގޮތުން މީހުންގެ މެދުގައި ޚިޔާލުތަފާތުވުން އުފެއްދުމަށް އަމާޒުކޮށްގެން، ކާކުކަން ނޭނގޭ ގޮތަށް "ކުރުސީގެ" ނަމުގައި ހިންގާ "އެކްސް" ހޭންޑްލްއަކީ ނަޝީދުގެ އަންހެން ދަރިފުޅު މީރާ އޮޕަރޭޓް ކުރާ އެކައުންޓެއް ނޫންކަމަށާއި، އެއީ އެމަނިކުފާނުގެ ކޮންޓްރޯލް އޮންނަ އެކައުންޓެއް ނޫކަމަށްވެސް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އިންޑިއާގެ ޔޫނިއަން ޓެރިޓަރީގައި ހިމެނޭ ޖަޒީރާ މަންޒިލެއް ކަމުގައިވާ ލަކްޝަޑްވީޕް ޕްރޮމޯޓު ކުރަން އެ ޤައުމުގެ ބޮޑު ވަޒީރު ނަރެންދްރަ މޯދީ ކުރެއްވި ޕޯސްޓާއެކު, ރާއްޖެއާ ދެކޮޅަށް އިންޑިއާގެ މީސް މީޑިއާގެ ވަސީލަތްތަކުގައި ކެމްޕޭނެއް ފަށާފައިވަނިކޮށް، ރާއްޖެގެ ސޯޝަލް މީޑިއާގައިވެސް އިންޑިއާއާއި ދެކޮޅަށްވެސް ކެމްޕޭން ފެށުމާއެކު މިހާރު އުފެދިފައިވާ ޚިޔާލުތަފާތުވުން ތަކުގައި އިންޑިއާގެ ބައެއް ފަރާތްތަކުން މިހާރު ތުހުމަތު ކުރަނީ، "ކުރުސީ"ގެ ނަމުގައި އެ އެކްސް އެކައިން އޮޕަރޭޓް ކުރަމުންދަނީ ނަޝީދުގެ ދަރިފުޅު މީރާ ކަމުގައެވެ.
އެހެންނަމަވެސް އެއީ އެމަނިކުފާނުގެ ދަރިފުޅު އޮޕަރޭޓްކުރާ އެކައުންޓެއް ނޫންކަަމަށް ވިދާޅުވަމުން ނަޝީދު ކުރެއްވި އެކްސް ޕޯސްޓުގައި ވިދާޅުވެފައިވަނި އެކައުންޓުން އިންޑިއާއާއި ގުޅޭގޮތުން ފާޅުކުރަމުންދާ ޚިޔާލުތަކާވެސް ދެކޮޅު ކަމުގައެވެ.
I’d like to state for the record that I do not operate, control, or have anything to do with the @HKurusee X account, nor does my daughter, Meera. Also, I do not agree with the anti-India views that the account is spreading.
— Mohamed Nasheed (@MohamedNasheed) January 10, 2024
ކާކުކަން ނޭނގޭ ގޮތަށް "ކުރުސީގެ" ނަމުގައި ހިންގާ "އެކްސް" ހޭންޑްލްއަކީ ނަޝީދުގެ އަންހެން ދަރިފުޅު މީރާ އޮޕަރޭޓް ކުރާ އެކައުންޓެއްކަމަށްބުނެ، އިންޑިއާގެ ބައެއް ސޯޝަލް މީޑިއާއެކުޓިވިސްޓުންވަނީ އޭނާއަށް އިންޒާރުވެސް ދީފައެވެ.
ލަކްޝަޑްވީޕް ޕްރޮމޯޓު ކުރަން އެ ޤައުމުގެ ބޮޑު ވަޒީރު ނަރެންދްރަ މޯދީ ކުރެއްވި ޕޯސްޓާއި ގުޅޭގޮތުން، ސޯޝަލް މީޑިއާގައި އިންޑިއާއައި ރާއްޖޭގެ ބައެއް ފަރާތްތަކުގެ މެދުގައި ބަދަލުކުރެވެމުންދާ ބަހުގެ ހަމަލާތަކުގައި، ކުރިން އިންޑިއާއަށް ވަރަށް ބޮޑަށް ތާއީދުކޮށް ވާހަކަ ދައްކަމުން އައި "ކުރުސީ" އެކައުންޓުން މިހާރުދަނީ އިންޑިއާއި ދެކޮޅަށް ވާހަކަ ދައްކަމުންނެވެ.
"ކުރުސީ" އެކައުންޓުން ދައްކަމުންދާ ވާހަކަ ތަކާއި ގުޅިގެން އިންޑިއާގެ ސޯޝަލް މީޑިއާ އެކައުންޓުތަކުން މިހާރު ބުނަމުންދަނީ އެއީ ނަޝީދުގެ އަންހެން ދަރިފުޅު މީރާ ކަމަށާއި، އެ އަކައުން އޮޕަރޭޓް ކުރަމުންދަނީ އިނގިރޭސިވިލާތުގައި ކަމަށެވެ. ނަޝީދުގެ އަންހެން ދަރިފުޅު ދިރިއުޅުއްވަނީ އިނގިރޭސިވިލާތުގައެވެ.
އަދި އިންޑިއާގެ ބައެއް އެކްސް ހޭންޑްލްތަކުންވަނީ މީރާއަށް އިންޒާރުވެސް ދީފައެވެ. އެގޮތުން އިންޑިއާގެ އެކްސް ހޭންޑްލްއަކުން ކޮށްފަ އޮތް އެކްސް ޕޯސްޓެއްގައި ބުނެފައިވަނީ މީރާވަނީ އޭނާގެ އަމިއްލަ ނަފްސު ރިސްކަކަށް ހުށަހަޅާފައި ކަމަށާއި، އޭގެ ސަބަބަކީ އިންޑިއާ މީހުން ދުނިޔޭގެ ހުރިހާ ހިސާބެއްގައިވެސް އުޅެމުންދާތީ ކަމުގައެވެ.
އެހެން އެކް ހޭންޑްއަކުން ބުނެފައިވަނީ ނަޝީދަކީ ރައްޖޭގައިވެސް "ޢައްދާރެއް" ކަމަށާއި، ފައިސާއަށް ނަޝީދު ރާއްޖެއާބެހޭ ކޮންމެފަދަ ސިއްރު ލިޔުމެއްވެސް އާންމު ކޮށްފާނެ ކަމަށެވެ.
އެހެންނަމަވެސް ނަޝީދުގެ އަންހެން ދަރިފުޅު މީރާވަނީ "ކުރުސީ" އެކައުންޓަކީ އޭނާ އޮޕަރޭޓްކުރާ އެކައުންޓެއްކަމަށް ކުރާ ތުހުމަތު ދޮގު ކޮށްފައެވެ.
