ރަސްމާލެ ހިއްކުމަށް މި ސަރުކާރުން ކުރަމުންދަނީ ބޭކާރު ޚަރަދެއް ކަމުގައި، އެމްޑީޕީގެ ޓިކެޓްގައި މާލޭ ސިޓީ ކައުންސިލަށް ވާދަކުރައްވާ އެމްޓީސީސީގެ ކުރީގެ ސީއީއޯ އާދަމް އާޒިމް ވިދާޅުވެއްޖެއެވެ.
އެމްޑީޕީގެ ތަނަވަސް މާލެ މެނިފެސްޓޯ އިއުލާން ކުރުމަށް މިރޭ ބޭއްވި، ރައީސް ސާލިހުވެސް ބައިވެރިވެވަޑައިގެންނެވި ޖަލްސާގައި އާޒިމް ވިދާޅުވި، ކަނޑެއް ހުރަސްކޮށްފައ ގެދޮރަށް ދިއުމުގެ ބަދަލުގައި މާލޭގައި ދިރިއުޅޭ ފަރާތްތަކަށް ގެދޮރަށް ދެވެން ޖެހޭނީ ބުރިޖެއް ހުރަސް ކޮށްފައި ކަމުއެވެ.
އަދި އާޒިމް ވިދާޅުވީ އެމްޑީޕީގެ ސިޔާސަތަކީ ސަރުކާރުން ހިއްކަން ފަށާފައިވާ ބިންތައްކުގައި އަސާސީ ޚިދުމަތްތައް ގާއިމްކޮށް އެތަންތަނުގައި މީހުން އާބާދު ކުރުންކަމުގައެވެ.
އޭގެ އިތުރަށް އާޒިމް ވިދާޅުވީ ފާއިތުވި 40 އަހަރު ތެރޭގައިވެސް އެއްވެސް ވެރިޔަކަށް ނުކޮށްދެވި އޮތްކަމަކީ މާލޭގެ ރައްޔިތުންނަށް ގެދޮރު ދިނުން ކަމަށާއި، ރައީސް ސަލިހުވަނީ އެކަން ކޮށްދެއްވާފައިވާ ކަމަށާއި، ބައެއް ފަރާތްތަކަށް ގެދޮރުގެ ރަޖިސްޓްރީވެސް ފޯރުކޮށް ދެވިފައިވާ ކަމުގައެވެ. އަދި އަނެއްބައި ބޭފުޅުން ރަޖިސްޓްރީ ޕްރޮސެސް ކޮށްދޭން ފަށާފައިވާ ކަމުގައެވެ.
މި ސަރުކާރުންވަނީ ފުށިދިއްގަތު ފަޅު މި ހަފްތާގައި ހިއްކަން ފަށާފައެވެ. އަދި ކޮންޓްރެކްޓަރ ފައިނޭންސްގެ އުސޫލުން މި ސަރުކާރުން ރަސްމާލެ މަޝްރޫޢު ހިއްކަން ފަށާފައިވަނީ ބިން ހިއްކާ ކުންފުންޏަށް 70 ހެކްޓަރުގެ ބިން ހުޅުމާލެއާއި ފުށިދިއްގަރު ފަޅުން 99 އަހަރަށް ދޭގޮތަށެވެ.
