އަންނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލިހުގެ އިންތިހާބުގައި ވާދަކުރައްވާނެ ކަން ޖުމްހޫރީ ޕާޓީ (ޖޭޕީ) ގެ ލީޑަރު ގާސިމް އިބްރާހިމް ނިންމަވައިފިއެވެ.
މަޖިލިހުގެ މާމިގިލީ ދާއިރާގެ މެމްބަރު ކަން ވެސް ކުރައްވަމުން ގެންދަވާ ގާސިމް އެގޮތަށް ވިދާޅުވީ ރައީސް ޑރ. މުހައްމަދު މުއިއްޒާއެކުގައި ރައީސް އޮފީހުގައި ބޭއްވި ބައްދަލުކުރެއްވުމަށް ފަހު ރައީސް އޮފީހުން ނުކުމެވަޑައިގެން، ނޫސްވެރިން ކުރެއްވި ސުވާލުތަކަށް ޖަވާބުދެއްވަމުންނެވެ.
އަންނަ އަހަރުގެ މަޖިލިސް އިންތިހާބުގައި ވާދަކުރައްވާނެތޯ ކުރި ސުވާލުގެ ޖަވާބުގައި ގާސިމް ވިދާޅުވީ "ވާދަކުރައްވާނެ" ކަމަށެވެ. އަދި އޭނާ ވާދަކުރައްވާނީ މިހާރު ވެސް ފުރުއްވަމުން ގެންދަވާ މާމިގިލީ ދާއިރާ އަށް ކަމުގައި ގާސިމް ވިދާޅުވިއެވެ.
ނަވާރަ ވަނަ މަޖިލިހުގައި މާމިގިލީ ދާއިރާގެ މެމްބަރު ކަން ކުރައްވާ ގާސިމަކީ އެ މަޖިލިހުގައި ހިމެނިވަޑައިގަންނަވާ އެންމެ ދުވަސްވީ އެއް މެމްބަރެވެ. ގާސިމަކީ 1990 ވަނަ އަހަރުން ފެށިގެން މަޖިލިހުގައި ހިމެނިވަޑައިގަންނަވާ މެމްބަރެކެވެ. ގާސިމް ވަނީ ހާއްސަ މަޖިލިހުގެ މެމްބަރުކަމާއި ހާއްސަ މަޖިލިހުގެ ރައީސްކަން ވެސް ކުރައްވައިފައެވެ.
އަދި މެއި 28، 2009 އިން ފެށިގެން މިއަދާ ހަމައަށް މެދުނުކެނޑި 14 އަހަރަށް ވުރެ ގިނަ ދުވަހު މަޖިލީހުގެ މެމްބަރެއްގެ ގޮތުގައި ހިދުމަތްކުރައްވާފައިވެއެވެ.
މިދިޔަ ސެޕްޓެމްބަރު މަހު ބޭއްވި ރިޔާސީ އިންތިހާބުގެ ފުރަތަމަ ބުރުގައި ގާސިމަށް ލިބިވަޑައިގެންނެވީ 5،000 އަށް ވުރެ ގިނަ ވޯޓެވެ.
މިދިޔަ ފަހަރު ބޭއްވި މަޖިލިހުގެ އިންތިހާބު ގާސިމް ކާމިޔާބު ކުރެއްވެވީ ވަރަށް ކުޑަ ތަފާތަކުންނެވެ. އެމްޑީޕީގެ ފަރާތުން އެ ދާއިރާއަށް ވާދަކުރެއްވި އަލީ އަމީޒާއި ގާސިމްއާ ދެމެދުގައި 100 ވޯޓުގެ ތަފާތު ވެސް ނެތެވެ.
ކޮމެންޓު ފޮނުވާ