އައްޑޫ ސިޓީ، މަރަދޫފޭދޫ ގެއަކަށް ވަދެ ބިއްލޫރިގަނޑު ތަޅާލި މީހަކު ފުލުހުން ހޯދަން ފަށައިފިއެވެ.
އައްޑޫ ގަމުގެ ފުލުހުން ތަހުގީގު ކުރަމުން ގެންދާ މި މައްސަލައާ ގުޅޭ ވީޑިއޯ ފުލުހުން ވަނީ ހާމަކޮށްފައެވެ. ފުލުހުން ބުނި ގޮތުގައި ވީޑިއޯ އިން ފެންނަ މީހާ ދެނެގަނެވިފައެއް ނުވެއެވެ.
ފުލުހުން ބުނެފައި ވަނީ ވީޑިއޯއިން ފެންނަ މީހާއާ ބެހޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ އެމައުލޫމާތެއް އައްޑޫގެ ގަން ޕޮލިސް ސްޓޭޝަނާ ހިއްސާ ކުރަން އެދޭ ކަމަށެވެ.
އައްޑޫގެ ގެއަކަށް ގެއްލުން ދިން މީހަކު ހޯދުމުގެ މަސައްކަތް ފުލުހުން ފެށި އިރު، އެ ސިޓީގައި ގްރޫޕް މާރާމާރީތައް ވަނީ ވަރަށް ބޮޑަށް އިތުރުވެފައެވެ. އެހެންވެ، އެކަން ހުއްޓުވުމުގެ ގޮތުން މާލެ އިން ފުލުހުންގެ ޓީމެއް އައްޑޫ އަށް ގޮސް ފިޔަވަޅުތަކެއް ވަނީ ވަރުގަދަކޮށްފައެވެ.
