ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޕާލަމެންޓަރީ ގްރޫޕް ލީޑަރަކަށް ރައްޔިތުންގެ މަޖިލިހުގެ ފޮނަދޫ ދާއިރާގެ މެމްބަރު މޫސާ ސިރާޖު ހަމަޖައްސައިފިއެވެ.
ރައްޔިތުންގެ މަޖިލިހުގެ މިއަދުގެ ޖަލްސާގެ ރިޔާސަތުގައި އިންނެވި މަޖިލީހުގެ ރައީސް މުހައްމަދު އަސްލަމް ވިދާޅުވި ގޮތުގައި ޕީއެންސީގެ އާ ފީޖީ ލީޑަރަކީ ސިރާޖު ކަން އެ ޕާޓީން ވަނީ މަޖިލިހުގެ އިދާރާ އަށް އަންގައިފައެވެ.
މަޖިލީހުގައި މިހާރު ޕީއެންސީ ތަމްސީލު ކުރައްވަނީ ދެ މެމްބަރެކެވެ. އެއީ ސިރާޖާއި ތުލުސްދޫ ދާއިރާގެ މެންބަރު އިބްރާހިމް ނަސީމެވެ. ސިރާޖު ޕީއެންސީއާ ގުޅިވަޑައިގަތީ ނިމިދިޔަ ރިޔާސީ އިންތިހާބުގެ ކެމްޕެއިންގެ ތެރޭގައި އޭރުގެ ވެރިކަން ކުރާ ޕާޓީ، އެމްޑީޕީގައި ހުންނެވުމަށް ފަހުގައެވެ. ނަސީމް ޕީއެންސީއާ ގުޅިވަޑައިގަތީ ވަރަށް ފަހުންނެވެ.
ޕީއެންސީގެ ޕީޖީ ލީޑަރު ކަމުގެ މަގާމުގައި އެންމެ ފަހުން ހުންނެވީ ފެލިދޫ ދާއިރާގެ ކުރީގެ މެމްބަރު އިބްރާހިމް ފަޒުލް ރަޝީދެވެ. ފަޒުލް މިހާރު ހުންނެވީ އާބަންކޯގެ މެނޭޖިން ޑިރެކްޓަރަކަށެވެ. އޭގެ ކުރިން ޕީއެންސީގެ ޕީޖީ ލީޑަރަކަށް ހުންނެވީ މަޑުއްވަރީ ދާއިރާގެ މެމްބަރު ކަން ކުރެއްވެވި އާދަމް ޝަރީފެވެ. އޭނާއަކީ މިހާރު ލޯކަލް ގަވަނަންސް މިނިސްޓަރެވެ.
