އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިޚާބު ރަމަޟާންމަހަށްފަހު، ބާއްވާނަ ޤާނޫނީ ގޮތުން ހުރަސްތަކެއް ކުރިމަތިވާނެކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.

ހިނގަމުން މިދާ ރައްޔިތުންގެ މަޖިލީހުގެ ދައުރު އަންނަ އަހަރުގެ މޭއި މަހުގެ 28 އަށް ހަމަވާނެއެވެ. އަދި ޤާނޫނު ބަޔާންކުރާގޮތުން 120 ދުވަހުގެ ކުރިން އިންތިޚާބު ބޭއްވުމުގެ މަސައްކަތް ފަށަންޖެހެއެވެ. އަދި 19 ވަނަ މަޖިލީހުގެ ދައުރު ހަމަވުމުގެ އެއްމަސް ކުރިން އިންތިޚާބުގެ ރަސްމީ ނަތީޖާ އިއުލާންކުރަންޖެހެއެވެ. އެއީ އޭޕްރީލް 28 ވަނަ ދުވަހުގެ ކުރިންނެވެ.

އިއްޔެ ބޭއްވި ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީން ނިންމާފައިވަނީ ރޯދައިގެ ފަހުން އިންތިޚާބު ބާއްވަން ލަފާދޭށެވެ. އިލެކްޝަންސް ކޮމިޝަންގެ ނައިބް ރައީސް ވިދާޅުވެފައިވަނީ މިނިންމުމާއިއެދު އަދި އިލެކްޝަންސް ކޮމިޝަނުން އެއްވެސް ގޮތަކަށް މަޝްވަރާކޮށް ގޮތެއް ކަނޑައެޅިފައި ނުވާކަމަށެވެ. ނަމަވެސް އިންތިޚާބު ރޯދައިގެ ފަހުން ބާއްވާނަމަ ދެވަނަ ބުރެއް ބާއްވަން ޖެހިއްޖެނަމަ އެފުރުސަތު ނޯންނާނެކަމަށް ހަބީބް ފާހަގަ ކޮށްފައިވެއެވެ.

ގާނޫނުގައި ބުނާ ގޮތުން މި ހިނގާ މަޖިލީހުގެ ދައުރު ހަމަވުމުގެ 30 ދުވަސް ކުރިން މަޖިލިސް އިންތިހާބުގެ ހުރިހާ ކަންތައްތަކެއް ކޮށް ނިންމަން ޖެހެއެވެ. ގާނޫނުގައި ބުނާ 30 ދުވަސް ހަމަވާ ތާރީހަކީ އޭޕްރިލް 28 އެވެ. މި ފެށޭ އަހަރުގެ ރޯދަ މަސް ނިމޭނެ ކަމަށް ފަލަކީ ހިސާބުތަކުން ދައްކާ ދުވަހަކީ އޭޕްރިލް 9 ނުވަތަ އޭޕްރިލް 10 އެކެވެ.

އެހެންކަމުން ދެވަނަ ބުރަކަށް ދާން ޖެހިއްޖެ ނަމަ، ދެވަނަ ބުރުގެ ކުރިން ކެމްޕޭނު ކުރުމަށާއި އެހެނިހެން ހުރިހާ ކަމަކަށް ދޭންޖެހޭ 15 ދުވަހުގެ މުއްދަތު ދިނުމަށްފަހު ގާނޫނުގައި ބުނާ 30 ދުވަހުގެ ކުރިން އިންތިހާބު ހުރިހާ ކަންތައްތަކެއް ނިންމުމުގެ ފުރުސަތެއް ނޯންނާނެއެވެ.

20 ވަނަ ރައްޔިތުންގެ މަޖިލީހުގައި 93 އިންތިޚާބީ ދާއިރާއެއް ހިމެނެއެވެ. އެއީ މިހާރު ހިނގަމުންދާ މަޖިލީހަށްވުރެ 6 ދާއިރާގެ އިތުރު ޢަދަދެކެވެ.