ކުރީގެ ނާއިބު ރައީސް އަހުމަދު އަދީބު ދިރިއުޅުން ސިންގަޕޯއަށް ބަދަލު ކުރުމަށް ނިންމާފައިވާކަމަށް މީޑިއަތަކުގައި ރިޕޯޓު ކޮށްފައިވާ ޚަބަރުތައް އޭނާ ދޮގުކޮށްފިއެވެ.
މީޑިއަތަކުގައި ދައުރުވަމުންދިޔަ މީޑިއާ ރިޕޯޓުތަކާއި ގުޅިގެން އަދީބު ކުރެއްވި އެކްސް ޕޯސްޓެއްގައި ވިދާޅުވީ އޭނާގެ ދިރިއުޅުން ސިންގަޕޯރއަށް ބަދަލުކުރަން އުޅޭކަމަށް ދެކެވެމުންދާ ވާހަކައަކީ ދޮގެއް ކަމުގައެވެ. އަދި އޭނާ މިވަގުތު ރާއްޖެއިން ބޭރުގައި ހުންނެވީ ބޭސްފަރުވާއަކަށް ކަމަށް ވިދާޅުވަމުން އަދީބު ވިދާޅުވީ ގައުމަށް އެނބުރި ވަޑައިގަންނަވާނޭކަމަށާއި، ދިރިއުޅޭނީވެސް މަރުވެދާނީވެސް ދިވެހި ފަސްގަނޑުގައި ކަމުގައެވެ.
The recent Media reports stating that I have settled in Singapore are inaccurate.
I am currently abroad for medical treatment & after that, I will return to my beloved country, where I will live, work & be buried in the soil of Maldives, where I belong, Inshah Allah ! https://t.co/m1eZq3Cp2n
— Ahmed Adeeb (@Ahmed_Adeeb) November 26, 2023
އެމްއެމްޕީއާރްސީގެ ހިޔާނާތާގުޅިގެން 20 އަހަރުގެ ޖަލުހުމުމަށް އައިސް، ހުކުމް ތަންފީޒު ކުރައްވަމުން ގެންދަވަނިކޮށް، ފާއިތުވި ރިޔާސީ އިންތިޚާބަށްފަހު ސަރުކާރު ބަދަލު ނުވަނީސް ރައިސް ސާލިހުވަނީ އަދީބަށް، ޕެރޯލް ގާނޫނުގެ ދަށުން މާފް ދީފައެވެ. މާފް ދިނުމާއެކު އަދީބުވަނީ މިމަހުގެ 16 ވަނަ ދުވަހު ރާއްޖެ ދޫކޮށް ފުރާވަޑައިގެންފައެވެ.
އެމްއެމްޕީއާރުސީގެ ބޮޑު ޚިޔާނާތާ ގުޅިން 2015 ވަނަ އަހަރުގެ އޮކްޓޫބަރު މަހުން ފެށިގެން މާފް ދިނުމާއި ހަމައަށް އަދީބު ހުންނަވާފައިވަނީ ޖަލުގައާއި ގޭ ބަންދުގައެވެ. އަދީބަށް 20 އަހަރުގެ ހުކުމް ކުރީ އޮކްޓޫބަރު 5، 2020 ގައެވެ.
ޖަލުން މިނިވަން ވުމާއެކު، އަދީބު ކުރެއްވި ޓުވީޓެއްގައި ވިދާޅުވެފައިވަނީ އޭނާ މިނިވަން ވުމާއެކު އަމިއްލަފުޅު ޕާޓީ ހިންގެވުމުގައި ކުރިޔަށް ވަޑައިގަންނަވާނޭކަމުގައެވެ.
އަދީބުވަނީ ޖަލު ހުކުމުގައި ހުންނަވަނިކޮށް ޓަގު ބޯޓެއްގައި ރާއްޖެ ދޫކޮށް ފިއްލަވަންވެސް މަސައްކަތް ކުރައްވާފައެވެ. އެފަހަރު އަދީބު ހައްޔަރު ކޮށްގެން ރާއްޖެ ގެނެސްފައިވަނީ އިންޑިއާގެ ޓުޓިކޮރިންނަށް ވަޑައިގެންނެވިތަނާއެވެ.
އަދީބުއާއެކު ޖަލަށް ލެވުނު ޒިޔަތަށްވެސް ރައީސް ސާލިހުވަނީ މާފް ދެއްވާފައެވެ.
