ހދ. ޖުޑީޝަލް ދާއިރާގެ އިސްމެޖިސްޓްރޭޓްގެ މަޤާމު ހުސްވުމާ ގުޅިގެން، އެ މަޤާމަށް މީހަކު ހަމަޖެހެންދެން، ހދ.ޖުޑީޝަލް ދާއިރާ ހިންގުން ވަގުތީ ގޮތުން ހދ.ކުޅުދުއްފުށީ މެޖިސްޓްރޭޓް ކޯޓުގެ މެޖިސްޓްރޭޓް މުޙައްމަދު އިސްމާޢީލްއާ ހަވާލުކުރުމަށް 2023 ނޮވެންބަރު 19 ވަނަ ދުވަހުގެ ރޭ ބޭއްވުނު ކޮމިޝަނުގެ 76 ވަނަ ޖަލްސާގައި ނިންމައިފިއެވެ.
ޖޭއެސްސީން ކުޅުދުއްފުށި ކޯޓު ހިންގުން ބޭފުޅަކާއި ހަވާލުކޮށްފައި މިވަނީ ކުޅުދުއްފުށި މެޖިސްޓްރޭޓް ކޯޓަށް ހުށަހެޅުނު މައްސަލައެއްގައި ކަމާބެހޭ މަޢުލޫމާތު ސާފުނުކޮށް، މައްސަލަ އެކަށީގެންވާ މިންވަރަށް ދިރާސާކޮށްފައި ނުވާތީ، ހދ. ޖުޑީޝަލް ދާއިރާގެ އިސްމެޖިސްޓްރޭޓް އަލްއުސްތާޛް ޢަލީ އާދަމްގެ މަޤާމު ދަށް ކުރުމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ނިންމާފައި ވަނިކޮށެވެ.
ޖޭއެސްސީން ނެރުނު ނޫސް ބަޔާނެއްގައި ބުނީ، މިއަދުން ފެށިގެން އަލީ އާދަމް އަކީ ކުޅުދުއްފުށީ މެޖިސްޓްރޭޓު ކޯޓުގެ މެޖިސްޓްރޭޓު ކަމަށެވެ. މީގެ ކުރިން އޭނާ އަދާކުރެއްވީ އިސް މެޖިސްޓްރޭޓުގެ މަގާމެވެ. ޖޭއެސްސީން ބުނީ އަލީ އާދަމްގެ މަގާމު ދަށްކުރަން ނިންމީ ކޯޓަށް ހުށަހެޅުނު މައްސަލައެއްގައި ކަމާބެހޭ މަޢުލޫމާތު ސާފުނުކޮށް، މައްސަލަ އެކަށީގެންވާ މިންވަރަށް ދިރާސާނުކޮށް، ފަރުވާކުޑަކޮށްފައިވާ މައްސަލައަކާ ގުޅިގެން ކަމަށެވެ.
