އިއްޔެއަކީ އަނެއްކާވެސް ވެރުކަމުގެ ދައުރު ބަދަލުވެ، އާ ރައީސް ވެރިކަމުގެ ހުވާ ކުރެއްވި ދުވަހެވެ. ރާއްޖޭގެ ޖުމުހޫރިއްޔާގެ 8 ވަނަ ރައީސް ޑރ. މުހައްމަދު މުއިއްޒު އާއި އެމަނިކުފާނުގެ ނާއިބު ރައީސް ޙުސައިން މުޙައްމަދު ލަޠީފް، މަޤާމުގެ ޤާނޫނީ ހުވައި ކުރައްވާފައިވަނީ މިކަމަށްޓަކައި އިއްޔެ ހަވީރު 4:45 ގައި ޖުމްހޫރީ މައިދާނުގައި ބޭއްވުނު ރަސްމިއްޔާތުގައެވެ. ދެބޭފުޅުންނަށްވެސް ހުވާ ލައިދެއްވީ ރާއްޖޭގެ އުއްތަމަ ފަނޑިޔާރުއެވެ.
އިއްޔެ މަގާމުގެ ހުވާ ކުރެއްވުމަށްފަހު އާ ރައީސްވަނީ ރައްޔިތުންގެ މަޖިލިހުގެ މެމްބަރުންނާ، އަދި ޖުމްލަކޮށް ރާއްޖޭގެ ހުރިހާ ރައްޔިތުންނާ މުޚާތަބްކޮށް ވާހަކަ ދައްކަވާފައެވެ. އެމަނިކުފާނުގެ ވާހަކަފުޅަށް ބަލާއިރު، ގިނަ ބަޔަކު ފާހަގަ ކޮށްފައިވާ އެއްކަމަކީ، ރައީސް މުއިއްޒުގެ ވާހަކަފުޅު ގައުމީ ބޮޑެތި މައްސަލަތަކަށާއި އެމައްސަލަތަކަށް ހައްލު ހޯއްދަވާނެ ސިޔާސަތުތަކުގެ މައްޗަށް ބައްޓަން ކުރެއްވިއިރު، އެމަނިކުފާނުގެ ވާހަކަފުޅުން ގައުމިއްޔަތުގެ އިހުސާސް ވަރަށް ބޮޑަށް ކުރެވިގެން ދިޔަކަމެވެ.
އަދި ވަކީން ޚާއްސަކޮށް ދިވެހި އައުދާނަ ދިދަ ދިވެހި ޖައްވުގައި ތާއަބަދަށް ވިހުރި ވިހުރި ހުންނާނޭކަމަށް ވިދާޅުވެ، ފަހަތްޕުޅުގައި ވިހުރެމުންދިޔަ ދިވެހި ދިދައަށް އިޝާރާތް ކުރައްވާ ޑރ. މުއިއްޒު އިހުތިރާމް އަދާކުރެއްވި ކުރެއްވުން ފާހަގަވެގެން ދިޔައީ ޑރ. މުއިއްޒުގެ ވާހަކަފުޅުން ފާހަގަވެގެން ދިޔަ ވަރަށްވެސް ބޮޑު ތަފާތެއްގެ ގޮތުގައެވެ.
ތިރީގައި މި ގެނެސްދެނީ އިއްޔެ ހަވީރު ހުވާކުރެއްވި، ރާއްޖޭގެ ޖުމުހޫރިއްޔާގެ އާ ރައީސްގެ ޚިޡާބުގެ އުސް އަލިތަކެވެ.
—
ދިވެހި މިނިވަންކަމުގެ ރަތް ރޮނގު ދަމާނީ ފިސާރި ފަލަކޮށް
ރާއްޖޭގެ މިނިވަންކަން ދަމަހައްޓަވާ ދެއްވާނޭކަމަށް ވައުދުވަމުން އިއްޔެ ރައީސް މުއިއްޒު ވިދާޅުވެފައިވަނީ ދިވެހީންނަކީ އެމަނިކުފާނަށް އަބަދުވެސް 1 ވަނަ ކަމަށާއި، އެހެން ހުރިހާ ގައުމެއްގެ މައްޗަށް ރާއްޖޭ އަބަދުވެސް އިސް ކުރައްވާނެ ކަމުގައެވެ.
އިއްޔެ ރައީސްކަމުގެ ގާނޫނީ ހުވާ ކުރެއްވުމަށްފަހު، ރައްޔިތުންގެ މަޖިލިހުގެ މެމްބަރުންނާ މުޚާޡަބުކުރައްވާ ވާހަކަ ދައްކަވަމުން މުއިއްޒު ވިދާޅުވީ ރާއްޖޭގެ މިނިވަންކަމުގެ ރަތް ރޮނގު ދަމާލާނީ ފިސާރި ފަލަކޮށް ކަމަށެވެ. އަދި ވިދާޅުވީ ރާއްޖޭގެ މިނިވަންކަން ހިމާޔަތް ކުރުމަކީ އެމަނިކުފާނަށް ލިބޭނެ އެންމެ ބޮޑު އުފާ ކަމުގައެވެ.
އަދި ވިދާޅުވީ ދުވަހަކުވެސް ރާއްޖޭގައި ބޭރު ސިފައިންގެ އެއްވެސް މީހަކު ހުރުމަށް ދުވަހަކުވެސް ފުރުސަތު ނުދެއްވާނެ ކަމުގައެވެ. އެމަނިކުފާނަށް އެންމެ މުހިންމުވާނީ ރާއްޖޭގެ މިނިވަންކަންކަމަށް ވިދާޅުވަމުން ޑރ. މުއިއްޒު ވިދާޅުވީ އެއީ ހުރިހާ ގައުމެއްގައިވެސް އެކަން އޮންނަންވާނެ ގޮތް ކަމުގައެވެ.
—
ރާއްޖެއަށް ބިންވެރިކަމާއި ގެދޮރުވެރިކަމުގެ ރަންޒަމާނެއް ގެންނާނަން
ރައީސްކަމާ ހަވާލުވެވަޑައިގެންނެވުމަށްފަހު ފުރަތަމަ ފަހަރަށް ރައްޔިތުންނާ މިޚާތަބްކޮށް ވާހަކަ ދައްކަވަމުން ރައީސް މުއިއްޒު ވިދާޅުވީ، ފެށިގެން މިދާ އާ ދައުރުގައި ރާއްޖެއަށް ގެދޮރުވެރިކަމާއި ބިންވެރިކަމުގެ ރަން ޒަމާނެއް ގެނެސްދެއްވާނެ ކަމުގައެވެ.
ރާއްޖޭގެ ޖުމުހޫރިއްޔާގެ 8 ވަނަ ރައީސްކަމުގެ ހުވާ އިއްޔެ ޖުމުހޫރީ މައިދާނުގައި އޮތް މަޖިލިސް ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ބިންވެރިކަމާއި ގެދޮރުވެރިކަމުގެ މައްސަލަތަކަކީ ރާއްޖޭގައި ވަރަށް ހައްސާސް މައްސަލައެއް ކަމުގައެވެ. އެގޮތުން ރައީސް މުއިއްޒު ފާހަގަ ގޮތުގައި އެކަށީގެންވާ ބޯހިޔާވަހިކަމެއް ނުލިބުމުގެ ސަބަބުން އިޖުތިމާއީ، ދީނީ އަދި ސިއްޙީ މައްސަލަތައްވެސް ރާއްޖޭގައި ގިނައެވެ.
އެގޮތުން ރާއްޖެއަށް ކުރިމަތިވެފައިވާ ބޯހިޔާވަހިކަމުގެ މުޅި މައްސަލައައް ހަލު ގެނެސްދެއްވާނެކަމުގައި ރައީސް މުއިއްޒު ވިދާޅުވުއެވެ.
އުތުރު ތިލަފަޅުން ފެށިގެން ފުށިދިއްގަރުފަޅާ ހަމައަށް އެންމެ ޒަމާނީ އިމާރާތްތަކާއި ބަގީޗާތަކުގެ ހާރެއް އަތުރާލާނީ ހުރިހާ ބޭފުޅުންގެ މި އާ ސަރުކާރުން. އެކަމުގެ ކަރުދާހީ ގިނަ މަސައްކަތްތަކެއް ހުރީ ލިޔެ ނިމިފައި. އިރާދަކުރެއްވިއްޔާ ވަރަށް އަވަހަށް ޒަމާނީ އާ ސަހަރުތަކެއްގެ ގިނަ މަލަތައް ދިވެހި ފަޅުފަޅުން އުފުލިލާނެ.
ރައީސް މުއިއްޒު ވިދާޅުވިއެވެ.
މިހާރު ރައްޔިތުންގެ މަޖިލިހަށް ހުށަހެޅިފައިވާ ބަޖެޓުގައި ވަނީ ފުށިދިއްގަރުފަޅު ހިއްކުމަށް 400 މިލިއަން ރުފިޔާ ހިމަނާފައެވެ.
ރައީސް މުއިއްޒު ވިދާޅުވީ އާ ސަރުކާރުން ގައުމު ތަރައްގީ ކުުރުމަށްޓަކާ މެދުރާސްތާ ޕްލޭންއައި ދުރު ރާސްތާ ޕްލޭންތައް އެކުލައްވާނޭ ކަމަށާއި، ގައުމުގެ ތަރައްގީގެ ކަންކަން ރާވާއިރު ދިވެހި ރައްޔިތުންގެ ވިސްނުމާއި އުންމީދުތައް ހިއްސާ ކުރުމުގެ ފުރުސަތު ދެއްވާނެ ކަމަށެވެ.
ރާއްޖޭގެ އިގްތިސާދު މިއަދު މިވަނީ ކުއްލި އަވަސްފަރުވާއެއް ބޭނުންވެފައި. އާމްދަނީ ހޯދޭނެ އަވަސް މަގުތައް ކޮންމެހެން ލާޒިމުވެފައި. އެކަމަށްޓަކައި އިރާދަކުރެއްވިޔާ ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމުގެ ބިޔަ މަޝްރޫއު އަވަހަށް ހުޅުވާނަން.
ރައީސް މުއިއްޒު އިތުރަށް ވިދާޅުވިއެވެ.
—
ކުރިޔަށް އޮތް 20 އަހަރަށް ގައުމީ ތަރައްގީގެ މާސްޓަރ ޕްލޭނެއް އެކުލަވާލާ، ގާނޫނީ ބާރުވެރިކަން ދޭނަން
ރާއްޖޭގެ ރައީސްކަމުގެ ހުވާ ކުރެއްވުމަށްފަހު ދެއްކެވި ވާހަކަފުޅުގައު ރައީސް މުއިއްޒު ވިދާޅުވީ ރައްޔިތުންގެ ހުށަހެޅުންތަކުގެ މައްޗަށް އެކުލެވޭ، ކުރިޔަށް އޮތް 20 އަހަރު ދުވަހަށް ޤައުމީ ތަރައްގީގެ މާސްޓަރ ޕްލޭނެއް އެކުލަވާލައި އެ ޕްލޭނަށް ގާނޫނީ ބާރުވެރިކަން ދެއްވާނެ ކަމުގައެވެ.
ރާއްޖޭގެ ޖުމުހޫރިއްޔާގެކަމުގެ ހުވާ ކުރެއްވުމަށްފަހު، އިއްޔެ ޖުމުހޫރީ މައިދާނުގައި ބޭއްވުނު މަޖިލިސް ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ ރާއްޖެއަށް ދެމެހެއްޓެނެވި، އަދުލުވެރި ތަރައްގީގެ ނިޒާމެއް ބޭނުންވާ ކަމުގައެވެ. އެގޮތުން މިފަށާ އާ ސަރުކާރުން ތަރައްގީގެ ހަރަކާތްތައް ކުރިޔަށް ގެންދާނީ މި ވިސްނުމުގެ ތެރެއިން ކަމުގައިވެސް އެމަނިކުފާނު ވިދާޅުވިއެވެ.
އެއީ ސަރަަހައްދީ ތަރައްގީ ނުވަތަ ރާއްޖޭގެ އެކި ސަރަހައްދުތަކަށް ތަރައްގީއާއި ރަށްވެރިކަމުގެ މަންފާ ބެހެވިގެންދާ ގޮތަށް އެކަށައެޅޭ ޒަމާނީ މަޙުފޫމެއް. އެކަމަށްޓަކާ އިރާދަ ކުރެއްވިއްޔާ މެދުރާސްތާގެ އަމާޒުތަކަކާއި ދުރު ރާސްތާގެ އަމާޒުތަކެއް ކަނޑައަޅާލެވޭނެ. އަދި މިކަމުގައި ތިޔަ ލޮބުވެތި ދިވެހި ރައްޔިތުންގެ އުންމީދުތަކާއި ވިސްނުންތައް އަޅުގަނޑުމެންނާއި ހިއްސާކުރެއްވުމަށް އެކަމުގެ ފުރުސަތު އަޅުގަނޑުމެން ހުޅުވާލާނަން.
ރައީސް މުއިއްޒު ވިދާޅުވިއެވެ.
ރައީސް މުއިއްޒު އިތުރަށް ވިދާޅުވީ ރާއްޖޭގެ އިލްމީ އެކި ދާއިރާތަކާއި ފަންނީ އެކި ދާއިރާތަކުގެ ބޭފުޅުން އެބޭފުޅުން އިލްމީ ދިރާސާތަކާއި ތަޖުރިބާއިން މިކަމުގައި ސަރުކާރަށް އެހީތެރިވެދެއްވުން ވަރަށް ބޮޑަށް އެދޭ ކަމުގައެވެ. އަދި ލަހެއް ނުވެ އެކަމަށް ފުރުސަތު ހުޅުވާލާނޭކަމުގައިވެސް ރައީސް މުއިއްޒު ވިދާޅުވިއެވެ.
ބޭނުމަކީ ދިވެހި ރައްޔިތުންގެ ހުވަފެންތަކާއި، ތަސައްވުތަކުގެ އެހީގައި ރައްޔިތުން އެދޭ ގޮތަށް ދިވެހިރާއްޖޭގެ މުސްތަގުބަލް ކުރަހާ ބައްޓަން ކުރުން. ރައްޔިތުންގެ އެ ހުށަހެޅުންތަކުގެ މައްޗަށް ކުރިޔަށް އޮތް 20 އަހަރު ދުވަހަށް ގައުމީ ތަރައްގީގެ މާސްޓަރ ޕްލޭންއެއް އެކުލަވާލައި އެޕްލޭންއަށް ގާނޫނީ ބާރުވެރިކަން ދިނުން.
ރާއްޖޭގެ ކުރިޔަށް އޮތް 20 އަހަރުގެ ގައުމީ ތަރައްގީގެ ޕްލޭނެއް އެކުލަވާލައްވާނެކަމަށް ވިދާޅުވަމުން ރައީސް މުއިއްޒު ވިދާޅުވިއެވެ.
—
ވެރިކަމާ ހަވާލުވާއިރު ދައުލަތް ވަނީ 119 ބިލިއަން ރުފިޔާއިން ދަރާފައި
މަގާމުގެ ހުވާ ކުރެއްވުމަށްފަހު އިއްޔެ ދެއްކެވި ވާހަކަފުޅުގައި ރައީސް މުއިއްޒު ވިދާޅުވީ ދިވެހި ދައުލަތާއި ހަވާލުވާއިރު ދައުލަތް އޮތީ 119 ބިލިއަން ރުފިޔާއިން ދަރާފައި ކަމުގައެވެ.
އެމަނިކުފާނު މިހެން ވިދާޅުވީ ރާއްޖޭގެ ޖުމުހޫރިއްޔާގެ 8 ވަނަ ރައީސްކަމުގެ ހުވާ މިއަދު ޖުމުހޫރީ މައިދާނުގައި ކުރެއްވުމަށްފަހުއެވެ.
މިއަދުގެ މަޖިލިސް ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ރާއްޖޭގެ ރައީސްކަމުގެ ހުވާ ކުރައްވާއިރު ހުއްޓިވަޑައިގެން ހުންނެވީ ނިކަން ޙުޠޫރަތްތެރި ވަޅުގަނޑެއްގެ ތުންފަތް މަތީގައި ކަމުގައެވެ. އެއީ ރައްޔިތުންގެ އުއްމީދުތަކާއި އެމަނިކުފާނު އެކުލަވާލާ ސަރުކާރުގެ ވާޖިބުތައް އަދާކުރުމާ ދެމެދުގައި އޮތް ވަޅުގަޑެއްކަމުގައި ރައީސް މުއިއްޒު ވިދާޅުވިއެވެ.
މި ދަންނަވާ ވަޅުގަނޑަކީ ރާއްޖޭގެ އިގްތިސާދު މިއަދު ވެއްޓިފައިވާ ވަޅުގަނޑު. މިއަދު އަޅުގަޑުމެން ދިވެހި ދައުލަތާ ހަވާލުވާއިރު ދިވެހި ދައުލަތުގެ ދަރަނި ވަނީ އެކުޖުމްލަ 199 ބިލިއަން ރުފިޔާއަށް ދަރާފަ. މިއީ ރާއްޖޭގެ މުޅި މާލީ ހަޔާތުގައިވެސް ދިވެހި ތާރީޚު ދުށް އެންމެ ބޮޑު ދަރަނި. އެހެންނަމަވެސް މިކަމުން އަރައިގަތުމަށްޓަކާ އިރާދަ ކުރެއްވިއްޔާ އަޅުގަޑުމެން ނިކަން ހަރުދަނާ، ވަރަށް ހަލުއި ފިޔަވަޅުތަކެއް އަޅާނަން.
ރައީސް މުއިއްޒު ވިދާޅުވިއެވެ.
ރައީސް އިތުރަށް ވިދާޅުވީ ރައްޖޭގެ އިގްތިސާދަށް ކުއްލި އަވަސް ފަރުވާއެއް ބޭނުންވެފައިވާ ކަމަށާއި ރާއްޖެއަށް އާމްދަނީ ހޯދޭނެ އަވަސް މަގުތަކެއް ބޭނުން ވެފައިވާ ކަމުގައެވެ.
ރައީސް އާއި ނާއިބު ރައީސް ހުވާކުރެއްވުމަށް މިއަދު ޖުމުހޫރީ މައިދާނުގައި ބޭއްވުނު މަޖިލިސް ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ ރާއްޖެއަށް އަވަސް އާމްދަނީ ލިބޭނެ މަގު ފަހި ކުރުމަށްޓަކާ ވެލާނާ އިންޓަނޭޝަނަލް އެއަރޕޯޓު ނިންމުން އަވަސް ކުރައްވާނެ ކަމުގައެވެ.
އޭގެ ސަބަބުން ފަތުރުވެރިކަމަށް ވަރަށްބޮޑު ތިޔާގިކަމެއް އަންނާނެ. މިހާރު ރާއްޖެއަންނަ ފަތުރުވެރިންގެ އެތައް ގުނައަކަށް އިތުރު ފަތުރުވެރިން ރާއްޖެ އަންނާނެ. މީގެ އިތުރަށް ޚަރަދު ކުޑަކުރެވޭނެ އާގޮތްތައް އީޖާދު ކުރާނަން.
ރައްޔިތުންގެ މަޖިލިހުގެ މެމްބަރުންނާ މުޚާތަބުކޮށް ވާހަކަ ދައްކަވަމުން ޑރ. މުއިއްޒު ވިދާޅުވިއެވެ،
އެގޮތުން ޑރ. މުއިއްޒު ވިދާޅުވީ އެއަރޕޯޓު އަވަހަށް ނިންމާލެވިއްޖެނަމަ ރާއްޖޭގެ ފަތުރުވެރިކަމުގެ ސިނާއަތަށް ވަރަށްބޮޑު ކުރިއެރުމެއް އަންނާނެ ކަމަށާއި، އެމަނިކުފާނުގެ ވެރިކަމުގައި ރާއްޖޭގެ ފަތުރުވެރިކަމުގެ ދާއިރާއަށް ވަރަށްބޮޑު އިސްކަމެއް ދެއްވާނެ ކަމުގައެވެ. އަދި ފަތުރުވެރިކަމާއި ގުޅުންހުރި ޒަމާނީ އާގޮތްތައް ތައާރަފް ކުރާނެކަމުގައިވެސް އެކަނިކުފާނު ވިދާޅުވިއެވެ.
އޭގ އިތުރުން ފަތުރުވެރިކަމުގެ ދާއިރާގައި މަސައްކަތްކުރާ މަސައްކަތްތެރިންނަށް ގެދޮރުވެރިކަމުގެ ލުއިފަސޭހަތައްވެސް ހަމަޖައްސަވާދެއްވާނެކަމަށްވެސް މުއިއްޒު ވިދާޅުވިއެވެ.
—
ރާއްޖޭގެ އިގްތިސާދަށް މިވަނީ ކުއްލި އަވަސް ފަރުވާއެއް ބޭނުން ވެފަ
ރައީސްކަމުގެ ހުވާ ކުރެއްވުމަށްފަހު ރާއްޖޭގެ ރައްޔިތުންނާ މުޚާތަބްކޮށް ވާހަކަ ދައްކަވަމުން ރައީސް މުއިއްޒު ވިދާޅުވީ ރައްޖޭގެ އިގްތިސާދަށް ކުއްލި އަވަސް ފަރުވާއެއް ބޭނުންވެފައިވާ ކަމަށާއި ރާއްޖެއަށް އާމްދަނީ ހޯދޭނެ އަވަސް މަގުތަކެއް ބޭނުން ވެފައިވާ ކަމުގައެވެ.
އެމަނިކުފާނު މިހެން ވިދާޅުވީ ރާއްޖޭގެ ޖުމުހޫރިއްޔާގެ 8 ވަނަ ރައީސްކަމުގެ ހުވާ މިއަދު ޖުމުހޫރީ މައިދާނުގައި ކުރެއްވުމަށްފަހުއެވެ.
ރައީސް އާއި ނާއިބު ރައީސް ހުވާކުރެއްވުމަށް މިއަދު ޖުމުހޫރީ މައިދާނުގައި ބޭއްވުނު މަޖިލިސް ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ ރާއްޖެއަށް އަވަސް އާމްދަނީ ލިބޭނެ މަގު ފަހި ކުރުމަށްޓަކާ ވެލާނާ އިންޓަނޭޝަނަލް އެއަރޕޯޓު ނިންމުން އަވަސް ކުރައްވާނެ ކަމުގައެވެ.
އޭގެ ސަބަބުން ފަތުރުވެރިކަމަށް ވަރަށްބޮޑު ތިޔާގިކަމެއް އަންނާނެ. މިހާރު ރާއްޖެއަންނަ ފަތުރުވެރިންގެ އެތައް ގުނައަކަށް އިތުރު ފަތުރުވެރިން ރާއްޖެ އަންނާނެ. މީގެ އިތުރަށް ޚަރަދު ކުޑަކުރެވޭނެ އާގޮތްތައް އީޖާދު ކުރާނަން.
ރައްޔިތުންގެ މަޖިލިހުގެ މެމްބަރުންނާ މުޚާތަބުކޮށް ވާހަކަ ދައްކަވަމުން ޑރ. މުއިއްޒު ވިދާޅުވިއެވެ،
އެގޮތުން ޑރ. މުއިއްޒު ވިދާޅުވީ އެއަރޕޯޓު އަވަހަށް ނިންމާލެވިއްޖެނަމަ ރާއްޖޭގެ ފަތުރުވެރިކަމުގެ ސިނާއަތަށް ވަރަށްބޮޑު ކުރިއެރުމެއް އަންނާނެ ކަމަށާއި، އެމަނިކުފާނުގެ ވެރިކަމުގައި ރާއްޖޭގެ ފަތުރުވެރިކަމުގެ ދާއިރާއަށް ވަރަށްބޮޑު އިސްކަމެއް ދެއްވާނެ ކަމުގައެވެ. އަދި ފަތުރުވެރިކަމާއި ގުޅުންހުރި ޒަމާނީ އާގޮތްތައް ތައާރަފް ކުރާނެކަމުގައިވެސް އެކަނިކުފާނު ވިދާޅުވިއެވެ.
އޭގ އިތުރުން ފަތުރުވެރިކަމުގެ ދާއިރާގައި މަސައްކަތްކުރާ މަސައްކަތްތެރިންނަށް ގެދޮރުވެރިކަމުގެ ލުއިފަސޭހަތައްވެސް ހަމަޖައްސަވާދެއްވާނެކަމަށްވެސް މުއިއްޒު ވިދާޅުވިއެވެ.
