ބޮލީވުޑްގެ ޒުވާން ދެ ތަރިން ކަމުގައިވާ ފާތިމާ ސަނާ ޝޭހް އާއި ވިޖޭ ވަރުމާ އެކީގައި ފިލްމަކަށް ސޮއިކޮށްފައިވާ ކަމަށް ރިޕޯޓްތައް ބުނެފި އެވެ.
މި ފިލްމަކީ ވިބޫ ޕޫރީ ޑައިރެކްޓްކުރާ އެއްޗެކެވެ. އޭނަ އަކީ ސަންޖޭ ލީލާ ބަންސާލީ ޕްރޮޑިއުސްކުރި 2015 ގެ "ހަވާއީޒާދާ" ގެ ޑައިރެކްޓަރެވެ. ނަމަވެސް ފިލްމް އާއި ބެހޭގޮތުން އިތުރު އެއްވެސް މައުލުމާތެއް މިހާތަނަށް އަދި ހާމަ ކޮށްފައިއެއް ނުވެއެވެ.
މިދެތަރިން އެކުގައި ފެނިގެންދާ އަލަތު ފިލްމް ގެ މުހިންމު ރޯލަކުން ތަޖުރިބާކާރު އެކްޓަރު ނަސީރުއްދީން ޝާހްވެސް ފެނިގެންދާނެއެވެ. ފާތިމާ ވަނީ މީގެ ކުރިން ނަސީރުއްދީންގެ އަންހެނުން ރަތުނާ ޕަތަކް ޝާހް އާއި އެކުގައި މަސައްކަތް ކޮށްފައިއެވެ.
އެއީ ދިޔަ މަހު ރިލީޒްކުރި "ދަކް ދަކް" އެވެ. އަނެއް ކޮޅުން ވިޖޭގެ އެންމެ ފަހުގެ ފިލްމަކީ ސެޕްޓެމްބަރު މަހު ގެނެސްދިން ކަރީނާ ކަޕޫރްގެ "ޖާނޭ ޖާ" އެވެ.
