ޝެންގެން ވިސާ އޮންލައިންކޮށް، އީ-ވިސާ މެދުވެރިކޮށް ނެގޭގޮތަށް ހަމަޖައްސައިފިއެވެ.
ޝާހިދު "އެކްސް"ގައި ކުރެއްވި ޓުވީޓެއްގައި ވިދާޅުވީ ޝެންގެން ސަރަހައްދަށް ވިސާ ނެގުމަށް އޮންލައިންކޮށް އެދެވޭނެ ގޮތަށް ވިސާއާ ބެހޭ އައު ޤަވާއިދުތަކެއް ފާސް ކުރުމަށް ޔޫރަޕިއަން ކައުންސިލުން ނިންމި ނިންމުމަށް މަރުހަބާ ކިޔާކަމުގައެވެ. އަދި މިނިޒާމު ފެށުމަށްޓަކައި ފުރިހަމަކުރަންޖެހޭ އިޖުރާއަތުތައް ފުރިހަމަވުމުން ޝެންގެން ވިސާއަށް އެދޭ ދިވެހިންނަށް އީ-ވިސާ ލިބޭނެ މަގުފަހިކޮށްދެއްވާތީ ޔޫރަޕިއަން ކައުންސިލަށް ޝުކުރު އަދާކުރައްވާކަމަށްވެސް ޝާހިދު ވިދާޅުވެފައި ވެއެވެ.
ފޮރިން މިނިސްޓްރީން ބުނެފައިވަނީ އެކަން ތަންފީޒުކުރަން ފަށާދުވަހެއް ހާމަކުރާނީ އެނިންމުމާއި ގުޅުންހުރި އިދާރީ އިންތިޒާމްތައް ޔޫރަޕިއަން ކައުންސިލުން ނިންމުމުން ކަމުގައެވެ.
ޝެންގެން ސަރަހައްދުގައި ހިމެނޭ 27 ގައުމަށް ދަތުރުކުރުމަށް ބޭނުންވާ ވިސާ ހޯދުމަށް މިހާތަނަށް ދާންޖެހެނީ ސްރީ ލަންކާއަށެވެ.
ޝެންގެންގެ ބައެއް ގައުމުތަކަށް ދަތުރުކުރުމަށް ބޭނުންވާ ވިސާ ދޫކުރުމަށް ވީއެފްއެސްގެ ގްލޯބަލް ޖޮއިންޓް ސެޝަންގެ ވިސާ އެޕްލިކޭޝަން ސެންޓަރެއް 2020 ވަނަ އަހަރު ހުޅުވާފައި ވެއެވެ. އެހެންނަމަވެސް ޔޫރަޕްގައި ހިމެނޭ ހުރިހާ ގައުމަކަށް ބޭނުންވާ ވިސާ ފާއިތުވެދިޔަ ތަނުގައި ރާއްޖެއިން ލިބޭގޮތަށް ހަމަޖެހިފައެއް ނޯވެއެވެ.
އެހެންނަމަވެސް ފޮރިން މިނިސްޓްރީން ބުނެފައިވަނީ އީ-ވިސާއަށް އެޕްލައި ކޮށްގެން އެ ސަރަހައްދުގެ ހުރިހާ ގައުމަކަށް ދިއުމަށް ބޭނުންވާ ވިސާވެސް ލިބޭނެ ކަމަށެވެ.
ރާއްޖޭގެ ޕާސްޕޯޓު ބޭނުންކޮށްގެ މިހާރު ވިސާއާއި ނުލާ ދުނިޔޭގެ 101 ގައުމަކަށް ދަތުރު ކުރެވެއެވެ. ރާއްޖޭގެ ޕާސްޕޯޓަކީ މިހާރު ދެކުނު އޭޝިއާ ސަރަހައްދުގެ، ވިސާއާއި ނުލާ ދެވޭ ގައުމުތަކަށް ބަލާއިރު އެންމެ ވަރުގަދަ ޕާސްޕޯޓެވެ.
