މިމަހުގެ ފުރަތަމަ 10 ދުވަހު އެކަނިވެސް ރާއްޖެއަށް 18،402 ފަތުރުވެރިން ޒިޔާރަތްކޮށްފައި ވާކަމަށް ޓޫރިޒަމް މިނިސްޓްރީން ބުނެފިއެވެ.
އެ މިނިސްޓްރީން އާންމު ކުރަމުންދާ ތަފާސް ހިސާބު ދައްކާގޮތުން މި އަދަދާ އެކު، ރާއްޖޭގެ ބޯޑަރު އަލުން ހުޅުވާލިފަހުން ރާއްޖެ ޒިޔާރަތްކުރި ފަތުރުވެރިންގެ އަދަދަ މިވަނީ 94،543 އަށް އަރާފައެވެ. އަދި މުޅި މިއަހަރު މިހާތަނަށް ރާއްޖެ އައި ފަތުރުވެރިންގެ އަދަދު މިވަނީ 477،390 އަށް އަރާފަ އެވެ.
ރާއްޖޭގެ ބޯޑަރު އަލުން ހުޅުވި ފަހުން އެންމެ ގިނަ ފަތުރުވެރިން ޒިޔާރަތްކުރާ ރަޝިއާ އިން މިހާތަނަށް 20،264 ފަތުރުވެރިން ވަނީ ރާއްޖެ އައިސްފައެވެ. މި ލިސްޓުގެ 2 ވަނާގައި މިހާރު އޮތް އިންޑިއާއިން މިހާތަނަށް 13،801 ފަތުރުވެރިން ވަނީ ރާއްޖެ އައިސްފައެވެ.
ރާއްޖެއަށް އެންމެ ގިނަ ފަތުރުވެރިން އައި 5 ގައުމު:
ރަޝިއާ – 20،264
އިންޑިއާ – 13،801
އިނގިރޭސި ވިލާތް – 8،200
އެމެރިކާ – 6،001
ޔޫއޭއީ – 5،117
ރާއްޖެ އަންނަ ފަތުރުވެރިންގެ އަދަދު އިތުރުވަމުން ދިޔަވަރަކަށް އެއަރ ލައިން ތަކުން ރާއްޖެއަށް ކުރާ ދަތުރު ތައްވެސް ގެންދަނީ އިތުރު ކުރަމުންނެވެ. އަދި އަލަށް ރާއްޖެ އަށް ދަތުރު ފަށާ އެއަރލައިންތައް ވެސް އަންނަނީ އިތުރުވަމުން ނެވެ. އެގޮތުން މިދިޔަ ހޮނިހިރު ދުވަހު ކަޒަކިސްތާންގެ ޤައުމީ އެއަރލައިން، އެއަރ އަސްތާނާ އާއި އެއަރ ސީޝެލްސް ވަނީ ރާއްޖެއަށް މުޅިން އަލަށް ދަތުރު ފަށާފައެވެ. އެހެން ކަމުން ރާއްޖެއަށް މިހާރު ދަތުރުކުރާ އެއަރ ލައިންތަކުގެ އަދަދު ވަނީ 19 އަށް އަރާފައެވެ. އަދި މިއަހަރު ނިމުމުގެ ކުރިން އިތުރު 8 އެއަރ ލައިނަކުން ދަތުރު ފަށާނެ ކަމަށް ޓޫރިޒަމް މިނިސްޓްރީން ލަފާކުރެއެވެ. މިއާއެކު މިއަހަރު ނިމޭއިރ ރާއްޖެއަށް 27 އެއަރ ލައިނަކުން ދަތުރު ކުރާނެއެވެ.
ރާއްޖެއަށް އެންމެ ގިނަ ފަތުރުވެރިން އުފުލި 5 އެއަރލައިން:
އެމިރޭޓްސް – 29،175
ޤަތަރު އެއަރވޭސް – 23،515
އޭރޯފްލޮޓް – 14،037
އިންޑިގޯ – 8،522
ގޯ އެއަރ – 7،365
ދިވެހިންގެ ގައުމީ އެއަރލައިން މޯލްޑިވިއަން އޮތީ މި ލިސްޓުގެ 7 ވަނައިގަ އެވެ. މޯލްޑިވިއަނުން މިހާތަނަށް ޖުމްލަ 3،803 ފަތުރުވެރިން ވަނީ އުފުލާފައެވެ.
ފަތުރުވެރިން ރާއްޖެ ޒިޔާރަތްކުރާ އަދަދު އިތުރުވެފައި ވާއިރު ފަތުރުވެރިންނަށް ހިދުމަތްދޭ ގިނަ ފެސިލިޓީ ތަކެއް ވެސްމިހާރު ހުރީ އޮޕަރޭޝަނަށް ގެނެސްފައެވެ. އެގޮތުން ރިސޯޓްތަކާއި ގެސްޓްހައުސް ހޮޓެލް ތަކުގެ އިތުރުން ސަފާރީތައް ހިމެނޭގޮތަށް 407 ފެސިލިޓީއެއް މިހާރު ވަނީ އޮޕަރޭޝަނަށް ގެނެސްފައެވެ. މި ހުރިހާތަނެއްގައި 36،750 ޓޫރިސްޓް އެނދުން ހިދުމަތް ދެވޭފެންވަރަށް މިހާރު އެތަންތަން ވަނީ ތައްޔާރުވެފައެވެ.
