ނެޓްފްލިކްސް ގެނެސްދޭ "ދަ ފެބިއުލަސް ލައިވްސް އޮފް ބޮލީވުޑް ވައިވްސް" ތިން ވަނަ ސީޒަންގައި ބޮލީވުޑްގެ މަޝްހޫރު އެކްޓަރު ރަންބީރު ކަޕޫރު ގެ އެއްބަޑު އެއްބަފާ ދައްތަ ރިދިމާ ކަޕޫރު ފެނިގެންދާނެ ކަމަށް ރިޕޯޓްތައް ބުނެފި އެވެ.
މިއީ ކަރަން ޖޯހަރްގެ ދަރުމާ ޕްރޮޑަކްޝަންގެ ވެބް ކޮންޓެންޓް ގޮފި، ދަރުމެޓިކް އެންޓަޓައިންމަންޓާއި ނެޓްފްލިކްސް ގުޅިިގެން ގެނެސްދޭ އެއްޗެކެވެ. ރިދިމާ އަކީ މިހާތަނަށް ފިލްމީ އެއްވެސް ކަމެއްގައި ހިއްސާނުވާ، ގަހަނާ ޑިޒައިނަރެކެވެ.
މީޑިއާ ރިޕޯޓްތައް ބުނާ ގޮތުގައި އެކްޓަރު ރިޝީ ކަޕޫރާއި ބަތަލާ ނީތޫ ސިންގުގެ އަންހެން ދަރިފުޅު ރިދިމާ އާއެކު މިފަހަރުގެ ސީޒަންގައި އިންޑިއަން އާޓް ޑިޒައިނަރު ޝާލިނީ ޕައްސީ އަދި ލަގްޒަރީ ސިލްވަވެއާ ރެޒޮންގެ ވެރިޔާ ކަލްޔާނީ ޗާވްލާ ވެސް ފެނިގެންދާނެ އެވެ. މި ދެ ފަރާތަކީ ވެސް ބޮލީވުޑްގެ ފިލްމީ ތަރިންނާ ވަރަށް ގާތް ގުޅުމެއް އޮންނަ ފަރާތްތަކެކެވެ.
View this post on Instagram
"ފެބިއުލަސް ލިވްސް އޮފް ބޮލީވުޑް ވައިވްސް" ގައި ދައްކުވައި ދެނީ ފިލްމު އިންޑަސްޓްރީ އަށް ނިސްބަތްވާ ބައެއްގެ އަނބިންތަކެއްގެ ޕޮޝް ލައިސްޓައިލެވެ. އެގޮތުން ކުރީގެ ދެ ސީޒަންގައި ކުރީގެ ބަތަލާ ނީލަމް ކޮތަރީ އާއި ސަލްމާން ޚާންގެ ކޮއްކޮ ސުހައިލް ޚާންގެ ކުރީގެ އަންހެނުން ސީމާ ސަޖްދޭ އާއި އަނިލް ކަޕޫރްގެ ކޮއްކޮ ސަންޖޭ ކަޕޫރްގެ އަންހެނުން މަހީޕް ކަޕޫރްގެ އިތުރުން އެކްޓަރު ޗަންކީ ޕާންޑޭގެ އަންހެނުން އަދި ޒުވާން ބަތަލާ އަނަންޔާ ޕާންޑޭގެ މަންމަ ބާވްނާ ޕާންޑޭ ހިއްސާވެފައިވެ އެވެ.
