ބޮލީވުޑްގެ ނުފޫޒު ގަދަ ޑައިރެކްޓަރު ކަރަން ޖޯހަރު އާއި ގުނީތު މޮންގާ ގުޅިގެން ތިންވަނަ ފިލްމެއް ގެނެސްދޭން ނިންމާފައިވާ ކަން އިއުލާންކޮށްފި އެވެ.
ގުނީތް އަކީ ވަރަށް ތަފާތު ފިލްމް ތަކެއް ޕްރޮޑިއުސް ކޮށްފައިވާ ވަރަށް ކާމިޔާބު ޕްރޮޑިއުސަރެކެވެ. މި ދެމީހުން އެކުގައި ވަނީ 2013 ވަނަ އަހަރު ގެނެސްދިން "ލަންޗުބޮކްސް" އާއި މިދިޔަ މަހު "ކިލް" ކިޔާ ފިލްމް އެއް ގެނެސްދީފައިއެވެ.
މި ދެ ފިލްމް އަކީ ވެސް ބެލުންތެރިން ނާއި ކްރިޓިކުންގެ ތައުރީފް އޮހުނު ދެ ފިލްމްއެވެ. އަދި ރޭޓިންގ އަށް ބަލާ އިރުގައި މި ދެފިލްމް ވެސް ވަނީ ވަރަށް މަތީ ރޭޓިންގ އެއް ހޯދައިފައިއެވެ.
"ކިލް" އަށް ލިބުނު ތަރުހީބާއި އެކުގައި އިތުރު ފިލްމް އެއް ދެމީހުން އެކުގައި ގެނެސްދިނުމަށް އިއުލާން ކޮށްފައިވާއިރުގައި މި ފިލްމް އަކީ ވެސް ބެލުންތެރިންގެ ބޮޑު ތައުރީފެއް ލިބިގެން ދާނެ ފިލްމްއެއް ކަމަށް ބެލެވއެވެ. ނަމަވެސް ފިލްމް އާއި ގުޅޭ ގޮތުން މިހާތަނަށް އަދި މާގިނަ މައުލުމާތެއް ހިއްސާ ކޮށްފައިއެއް ނުވެއެވެ.
ކަރަން އާއި ގުނީތު ގުޅިގެން ނެރުނު ނޫސްބަޔާނެއްގައި ބުނީ އެމީހުން ދެން ޕްރޮޑިއުސްކުރާ ފިލްމަކީ ފްރާންސްގެ މަޝްހޫރު ފިލްމު "ދި އަންޓަޗެބަލްސް"ގެ ހިންދީ އެޑަޕްޓޭޝަނެއް ކަމަށެވެ.
މި ފިލްމުގެ ޑައިރެކްޓަރަކީ ބޮލީވުޑްގެ މަޝްހޫރު ފިލްމުތައް ކަމަށްވާ "ޕީކޭ"، "ތަލާޝް"، "ސަންޖޫ"، "ބާގް މިލްކާ ބާގް" އަދި "އެންއެޗު10″ ކަހަލަ ފިލްމުތަކުގައި އެސިސްޓެންޓް ޑައިރެކްޓަރެއްގެ ގޮތުގައި މަސައްކަތް ކޮށްފައިވާ ކޮލިން ޑިކޫނާ އެވެ.
