ފަލަސްތީނަށް އެހީވުމަށް އިންޓަނޭޝަނަލް އެއިޑް ކެމްޕެއިން (އައިއޭސީ) އިން ރާއްޖޭގައި ހުޅުވާފައިވާ ފަންޑަށް އިއްޔެގެ ނިޔަލަށް 24 މިލިއަން ރުފިޔާ ލިބިއްޖެއެވެ.
ރާއްޖޭގެ އެކި ސަރަހައްދުތަކުން ދިވެހި ރައްޔިތުން ހަދިޔާކޮށްފައިވާ ފައިސާގެ ތެރޭގައި ހިމެނެނީ 23،987،108 ރުފިޔާ އާއި 13،023 ޑޮލަރެވެ. އައިއޭސީ އިން ކުރިއަށް ގެންދާ އެހީ ޕްރޮގްރާމުތަކުގެ ތެރެއިން ކޮންމެ ޕްރޮގްރާމަކަށް ލިބޭ ފައިސާގެ ތެރެއިން 12.5 ޕަސަންޓް އެޖަމިއްޔާ އިން ބޭނުންކުރާނެއެވެ. އެއީ ލޮޖިސްޓިކް މަސައްކަތްތަކާއި އިދާރީ ކަންކަމަށް ހިނގާ ހަރަދަށް ނަގާ ފައިސާ ކަމަށް އައިއޭސީ އިން ބުނެއެވެ.
ފަލަސްތީނަށް އެހީވުމަށް އައިއޭސީ އިން ހުޅުވާފައިވާ ފަންޑަށް ލިބުނު ފައިސާގެ ޖުމްލަ އަދަދު ހާމަކޮށްފައި މިވަނީ އެ ޖަމިއްޔާގެ އޮޑިޓް ރިޕޯޓްތައް އާންމު ނުކުރާތީ ސޯޝަލްމީޑިއާގައި ބައެއް މީހުންގެ ފާޑުކިޔުން އެ ޖަމިއްޔާއަށް ވަރަށް ބޮޑަށް އަމާޒުވެފައި ވަނިކޮށެވެ.
އެކި ގައުމުތަކުގައި ދިރިއުޅޭ ހާލުގައި ޖެހިފައިވާ މީހުންނަށް އެހީ ފޯރުކޮށްދޭ އައިއޭސީން މަކަރާއި ހީލަތް ހަދާ ކަމަށް ބުނެ ބޮޑެތި ތުހުމަތުތަކެއް ކޮށްފައިވެއެވެ. ނަމަވެސް، އެ ޖަމިއްޔާއިން ވަނީ އެ ތުހުމަތުތައް ދޮގުކޮށް، އޮޑިޓް ރިޕޯޓް ވެސް އާންމުކުރާނެ ކަމަށް ބުނެފައެވެ.
އެ ޖަމިއްޔާގެ ޑިރެކްޓަ އޮފް މީޑިއާ އެންޑް ޕަބްލިކް ރިލޭޝަންސް އަޒްހަދު އަހުމަދު ވަނީ ޑޮނޭޝަންގެ ގޮތުގައި އެ ޖަމިއްޔާ އަށް އާންމުން ދޭ ފައިސާ އަކީ އޭގެ ހައްގުވެރިންނަށް އަމާނާތްތެރި ކަމާ އެކު ރައްދުކޮށްދޭ އެއްޗެއް ކަމުގެ ޔަގީންކަން ދެއްވައިފައެވެ.
