ބ. ފުޅަދޫ ކައުންސިލްގެ ރައީސް އަލީ އަޒުހަރު ޕީއެންސީއަށް ސޮއި ކުރުމާއިއެކު އެރަށު ގެނަބަޔަކު ޕީއެންސީއާއި ގުޅި ޑރ. މުއިއްޒުގެ ސަރުކާރާއިއެކު ތިބުމަށް ބައިއަތު ހިފައިފިއެވެ.

އެމްޑީޕީ ދޫކޮށް، އަލީ އަޒުހަރު ޕީއެންސީއަށް ސޮއި ކުރެއްވީ މިމަހުގެ 15 ވަނަ ދުވަހުއެވެ. އެއަށް ފަހު، އޭނާ އެނބުރި ރަށަށް ވަޑައިގަތީ އިއްޔެގެ ވަގުތެއްގައެވެ. އަޒުހަރު ވިދާޅުވީ، ޕީއެންސީއާ ގުޅުމަށް ފަހު ރަށަށް ދިއުމުން ވަރަށް ބޮޑު ތަރުހީބެއް ލިބިފައިވާ ކަމަށެވެ. އަދި، ވަރަށް ގިނަ މީހުން އެ ނިންމުމަށް މަރުހަބާ ކިޔާފައިވާ ކަމަށެވެ.

އޭނާ ވިދާޅުވީ، އެނބުރި ރަށަށް ދިއުމުން ވަރަށް ހޫނުކޮށް މަރުހަބާ ކިޔާފައިވާ ކަމަށެވެ. މުޅި ރަށް އެއްކޮށް އޮތީ ޕީއެންސީގެ އާ ސަރުކާރާ އެކު ކަމަށް އަޒުހަރު ވިދާޅުވިއެވެ. އޭނާ ވިދާޅުވީ، ފުޅަދޫއިން ޕީއެންސީއަށް އެހާ ބޮޑު ތަރުހީބު ލިބެނީ އިންތިޚާބީ ރައީސްގެ ސިޔާސަތުތަކާއި ވައުދުފުޅުތަކުން އުންމީދީ ތަސައްވުރެއް ލިބޭތީ ކަމަށް ގަބޫލުކުރައްވައި ކަމަށެވެ.

އަޒުހަރު ވިދާޅުވީ، ޕީއެންސީއާ އެކު ދާއިރާއާއި ރައްޔިތުންގެ ހައްގުގައި މަސައްކަތް ކުރެވޭނެ ކަމަށް ގަބޫލުކުރައްވާ ކަމަށެވެ. އެހެންވެ، މުއިއްޒުގެ ސަރުކާރުގައި މާ ގިނަ، މާ ބޮޑެތި ތަރައްގީގެ މަޝްރޫއުތައް ކުރިއަށް ގެންދާނެ ކަމަށް އުންމީދު ކުރައްވާ ކަމަށް އޭނާ ވިދާޅުވިއެވެ.

މިދިޔަ މަހު 30ގައި އޮތް ރިޔާސީ އިންތިޚާބުގެ ދެވަނަ ބުރު ކާމިޔާބު ކުރެއްވި ޕީއެންސީގެ ކެންޑިޑޭޓު މުއިއްޒު މިހާރު ގެންދަވަނީ އިންތިގާލީ މަރުހަލާގެ ކަންކަން ކުރައްވަމުންނެވެ. އެގޮތުން، ސަރުކާރު އެކުލަވައިލުމާއި އަދި އިންތިޚާބީ ރައީސްގެ ހައިސިއްޔަތުން ކުރައްވަން ޖެހޭ މަސައްކަތްތައް މިހާރު އަންނަނީ ކުރަމުންނެވެ.

އިންތިޚާބީ ރައީސް ހުވާ ކުރެއްވުން އޮންނާނީ ނޮވެމްބަރު 17ވާ ހުކުރު ދުވަހުގެ ހަވީރު ޖުމްހޫރީ މައިދާނުގައެވެ.