އިސްރާއީލުން ހަމާސްއާއި ދެކޮޅަށް ކުރަމުންދާ ހަނގުރާމައިގައި، އެގައުމުން އަޅަމުންދާ، ޣައްޒާއަށް ބޭނުންވާ ކާބޯތަކެއްޗާއި ފެން ކަނޑާލުން ފަދަ ފިޔަވަޅުތަކުގެ ސަބަބުން ފަލަސްތީނުގެ ވިސްނުން އެތައް ޖީލުތަކަކަށް ހަރުކަށިވެ، އިސްރާއީލަށް ބައިނަލްއަގުވާމީ ތާއީދު ބަލިކަށިވެދާނެ ކަމަށް އެމެރިކާގެ ކުރީގެ ރައީސް ބަރަކް އޮބާމާ ވިދާޅުވެއްޖެ އެވެ.
އެމެރިކާގެ ޚާރިޖީ ސިޔާސަތަށް ކުރިމަތިވެފައިވާ ކުއްލި ކާރިސާއާ ބެހޭގޮތުން އޮބާމާ ދެއްކެވި ވާހަކަފުޅުގައި ވިދާޅުވީ ހަނގުރާމައިގެ އިސްރާއީލުގެ އަސްކަރީ ސްޓްރެޓެޖީއިން އިންސާނީ ހައްގުތަކަށް އިހުމާލުވެއްޖެނަމަ އޭގެ އަގު ފަހުން އިސްރާއީލުން ދައްކަން ޖެހިދާނެ ކަމަށެވެ.
އިސްރާއީލު ސަރުކާރުން (ޣައްޒާގައި) ބަންދުކޮށްފައި ތިބި މަދަނީ އާބާދީއަކަށް ކާބޯތަކެއްޗާއި ފެނާއި ކަރަންޓު ކަނޑާލުމުގެ ހަމައެކަނި ނުރައްކަލަލީ، މިހާރުވެސް ހާލަތު ގޯސްވެފައިވާ އިންސާނީ ކާރިސާގެ ހާލަތު އިތުރަށް ގޯސްވުމެއް ނޫން. އޭގެ ސަބަބުން ފަލަސްތީނުގެ ވިސްނުން ޖީލުތަކަކަށް އިތުރަށް ހަރުކަށިވެ، އިސްރާއީލަށް ދުނިޔޭގެ ތާއީދު ގެއްލި، އޭގެ ފައިދާ (އެޑްވާންޓޭޖް) އިސްރާއީލު ދުޝްމަނުންނަށް ނެގުމުގެ ފުރުސަތު ލިބި، ސަރަހައްދުގެ ސުލްހަ މަސަލަސްކަން ގާއިމުކުރުމަށް ކުރަމުން އަންނަ މަސައްކަތްތަކަށް ދިގު މުއްދަތަކަށް ބުރޫ އަރާނެ.
އޮބާމާ ވިދާޅުވި އެވެ.
އޮކްޓޯބަރު މަހުގެ ހަތްވަނަ ދުވަހު ހަމާސް އިން އިސްރާއީލަށް ދިން ކުއްލި ހަމަލާގައި އިސްރާއީލުގެ 1،400 އަށް ވުރެ ގިނަ މީހުން މަރުވި ފަހުން އިސްރާއީލުން ވަނީ ޣައްޒާއަށް ވައިގެ ހަމަލާތައް ދޭން ފަށާފައެވެ. އެގޮތުން ރޭ އެކަނިވެސް ޣައްޒާއަށް ދިން ހަމަލާތަކުގައި ފަލަސްތީނުގެ 471 މީހުންވަނީ ޝަހީދުވެފައެވެ. މި ހަމަލާތަކުގައި މިހާތަނަށް ފަލަސްތީނުގެ ޖުމްލަ 5،000 އަށް ވުރެ ގިނަ މީހުން ޝަހީދުވެފައިވާ ކަމަށް ޣައްޒާގެ އޮފިޝަލުން ވަނީ ބުނެފައެވެ. ހަމާސްގެ ހަމަލާތަކުގައި އިސްރާއީލުން މަރާލާފައި ވަނީ 1،403 މީހުންނެވެ. އަދި 4،932 މީހުން ވަނީ ޒަހަމްކޮށްލައިފައެވެ.
ހަމާސްގެ ހަމަލާ ކުށްވެރިކުރައްވައި އޮބާމާ ވަނީ މިފަދަ ހަނގުރާމަތަކުގައި އާންމުންނަށް ކުރިމަތިވެދާނެ ނުރައްކާތަކާ މެދު އިންޒާރު ދެއްވަމުން، އިސްރާއީލުގެ ދިފާއުގައި އިސްރާއީލުގެ ހައްގަށް ތާއީދު ކުރައްވާކަމަށް ތަކުރާރުކުރައްވާފައެވެ.
އޮބާމާގެ ނައިބު ރައީސްކަން އަށް އަހަރު ވަންދެން ކުރެއްވި އެމެރިކާގެ މިހާރުގެ ރައީސް ޖޯ ބައިޑަންއަށް އޮބާމާ ގެ މި ބަޔާން ފޯރުކޮށްދެއްވި ކަމެއް އަދި ސާފެއް ނުވެ އެވެ.
އޮބާމާގެ ވެރިކަމުގައި، ޣައްޒާގައި ފަލަސްތީނުގެ ހަނގުރާމަވެރި ހަމާސް ޖަމާއަތާ ދެމެދު ހިނގި ހަމަނުޖެހުންތަކުގައި އަަބަދުވެސް އިސްރާއީލުގެ އަމިއްލަ ދިފާއަށާއި، އިސްރާއީލުގެ ހައްގަށް ތާއީދު ކުރެއްވި ނަމަވެސް، ވައިގެ ހަމަލާތަކުގެ ސަބަބުން މަރުވާ ފަލަސްތީނުގެ މީހުން އަދަދު އިތުރުވާން ފެށުމުން، އިސްރާއީލުގެ ހަމަލާތައް ހުއްޓާލުމަށް ކޮންމެ ފަހަރަކުވެސް ބާރުއަޅުއްވާ ގޮވާލައްވާފައި ވެއެވެ.
2.3 މިލިއަން މީހުން ދިރިއުޅޭ 45 ކިލޯމީޓަރުގެ ދިގު (25 މޭލު) ބިމެއް އޮންނަ ޣައްޒާގައި 2007 ވަނަ އަހަރުން ފެށިގެން ސިޔާސީ ގޮތުން ވެރިކަން ކުރަމުން އަންނަނީ އީރާނަށް ތާއީދުކުރާ ހަމާސް ޖަމާއަތުންނެވެ.
