ފަލަސްތީނުގެ މުސްލިމުންނަށް ލިބޭ އަނިޔާތަކާ ގުޅިގެން ރައްޔިތުންނަށް އަމާންކަމާއި ކެތްތެރިކަމާއި ރައްކާތެރިކަން ދެއްވުން އެދި ފަރުޟު ފަސްނަމާދުގައި ގުނޫތު ނާޒިލާ ކިޔުމަށް އިސްލާމިކް މިނިސްޓްރީން އަންގައިފިއެވެ.
މީގެ ކުރިން އިސްލާމިކް މިނިސްޓްރީނ އަންގާފައިވަނީ އަޑު ހަރުކޮށް ކިޔާ ނަމާދުތަކުގައި އެކަންޏެވެ. ނަމަވެސް އިސްލާމިކް މިނިސްޓްރީން މިއަދު ނެރުނު ބަޔާނެއްގައި ވަނީ ފަލަސްތީން ރައްޔިތުންނަށް ލިބެމުންދާ އަނިޔާތަކާއި ކުރިމަތިވަމުންދާ ލާއިންސާނީ އަމަލުތަކުން ސަލާމަތް ކޮށްދެއްވުމަށް އެދި މިއަދު މެންދުރު ނަމާދުން ފެށިގެން މިނިސްޓްރީން ވަކި ގޮތެއް އަންގަންދެން ފަރުޟު ފަސްނަމާދުގެ ފަހު ރަކުއަތުގައި އިއުތިދާލުގައި ގުނޫތު ނާޒިލާ ކިޔުމަށް އަންގާކަމަށެވެ.
ގުނޫތު ނާޒިލާއަކީ ބޮޑު ކާރިސާއެއް ކުރިމަތިވުމުން ނަމާދުގެ ފަހު ރަކުއަތުގައި ކިޔާ ހާއްސަ ގުނޫތެކެވެ.
މިމަހިގެ 7ވަނަ ދުވަހުން ފެށިގެން ފަލަސްތީނުގެ މުޖާހިދުން ދަނީ އިސްރާއީލަށް ހަމަލާތަކެއް ދެމުންނެވެ. އެމީހުން ހަމަލާދޭން ފެށީ އިސްރާއީލުން ފަލަސްތީނު ރައްޔިތުންނަށް އަނިޔާ ކުރުމާއި އަލް އަގްސާ މިސްކިތުގެ ހުރުމަތް ކަނޑާލާފައިވާތީއެވެ.
ފަލަސްތީނުގެ ޣައްޒާ އިން ދެމުން އަންނަ ހަމަލާތަކާ ގުޅިގެން އިސްރާއީލުން ވައިގެ މަގުން ބޮން އަޅައި ފަލަސްތީނުގެ ގިނަ ބަޔަކު ދަނީ ޝަހީދު ކުރަމުންނެވެ. މިހާތަނަށް ފަލަސްތީނުގެ 3 ހާހަށްވުރެ ގިނަ މީހުން ވަނީ ޝާހީދުކޮށްލާފައެވެ.
އިސްރާޢީލުން ރޭވަނީ ފަލަސްޠީނުގެ ހޮސްޕިޓަލަކަށް އަމާޒުކޮށ ހަމަލާދީފައެވެ. އެ ހަމަލާގައި އެކަނިވެސް 500 މީހުން ޝަހީދުވެފައިވެއެވެ.
