ފަލަސްޠީނުގެ ޣައްޒާގެ ރައްޔިތުންނަށް ބޭނުންވާ ޟަރޫރީ ތަކެތި ފޯރުކޮށްދިނުމަށް ބޭނުންވާ މަގެއް ފަހިކޮށްދިނުމަށް ބާރުއެޅުމަށް ބައިނަލްއަޤުވާމީ މުޖުތަމަޢަށް ދިވެހި ސަރުކާރުން ގޮވާލައިފިއެވެ. ޣައްޒާގެ އުތުރުން 1.1 މިލިއަން މީހުން ގެދޮރު ދޫކޮށް ދިއުމަށް އިސްރާޢީލުން ވަނީ ޢަމުރުކޮށްފައެވެ. މިއާއެކު އެ ރައްޔިތުން ގެދޮރު ދޫކޮށް ދާން ވަނީ ފަށާފައެވެ.
މިކަން ކުށްވެރިކޮށް ދިވެހި ސަރުކާރުން ނެރުނު ނޫސްބަޔާނުގައި ވަނީ ޣައްޒާގައި ދިރިއުޅެމުންދާ ފަލަސްތީނުގެ ރައްޔިތުންނާ ދެކޮޅަށް އިސްރޭލުން ކުރިއަށްގެންދާ ޢަސްކަރީ ޙަމަލާތަކާއި، އިރުމަތީ ޣައްޒާގައި ދިރިއުޅެމުންދާ 1.2 މިލިއަން ޢާއްމު ރައްޔިތުން 24 ގަޑިއިރު ތެރޭ ޣައްޒާގެ ދެކުނަށް ބަދަލުވުމަށް އިސްރޭލުގެ ސިފައިން އެންގި އެންގުން ދިވެހިރާއްޖެއިން އެންމެ ހަރުކަށި ޢިބާރާތުން ކުށްވެރިކުރާކަމަށެވެ.
އަދި ސަލާމަތްތެރިކަމާއި އެނބުރި އާދެވޭނެކަމުގެ ގެރެންޓީއަކާނުލައި މިފަދަ ކަމެއް ކުރުވުމަކީ ހަނގުރާމައިގެ ޖަރީމާއެއް ކަމަށްވާ މަޖުބޫރުން ހިޖުރަކުރުވުންކަމަށާއި، އެހެންކަމުން އެއަމުރު ބަދަލުކުރަންޖެހޭކަމަށް ދިވެހި ސަރުކާރުގެ ބަޔާނުގައިވެއެވެ. ދިވެހިރާއްޖޭގެ ސަރުކާރުން ޤަބޫލުކުރާގޮތުގައި ފަލަސްޠީނުގެ ރައްޔިތުންނާ ދެކޮޅަށް ހިންގާ މިޢުދުވާންތަކަކީ ބައިނަލްއަޤުވާމީ އަދި އިންސާނީ ޙައްޤުތަކާ ބެހޭ އެންމެހައި ޤާނޫނުތަކާ ޚިލާފަށް ހިންގާ ހަނގުރާމައިގެ ޖަރީމާތަކެއްކަމަށްވެސް ސަރުކާރުން ބުންޏެވެ.
ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ ޙަމަލާތައް ވަގުތުން ހުއްޓުވުމަށް މަޖުބޫރުކުރުވައި، ޣައްޒާއަށް މިހާރުން މިހާރަށް ބޭނުންވާ ބޭހާއި ކާބޯތަކެއްޗާއި ޟަރޫރީ ބޭނުންތަކަށް ބޭނުންވާނެ ތަކެތި ފޯރުކޮށްދިނުމަށް އިންސާނިއްޔަތުކަމުގެ ކޮރިޑޯއެއް ހުޅުވުން ކަށަވަރުކުރުމަށް ބާރުއެޅުމަށް ބައިނަލްއަޤުވާމީ މުޖުތަމަޢަށް ދިވެހި ސަރުކާރުން ނެރުނު ބަޔާނުގައި ގޮވާލާފައިވެއެވެ. އަދި ފަލަސްތީނުގެ ރައްޔިތުން އެބައިމީހުންގެ ވަކި ދައުލަތެއް އުފެއްދުމަށާއި އެބައިމީހުންގެ ޙައްޤުތައް ކަށަވަރުކުރުމަށްޓަކައި ކުރިއަށްގެންދާ ޖާއިޒު މަސައްކަތްތަކުގައި ފަލަސްޠީނުގެ ރައްޔިތުންނަށް އެއްވެސް ޝަރުތަކާނުލައި ތާއީދުކުރުންމަތީ ދިވެހި ސަރުކާރާއި ދިވެހި ރައްޔިތުން ތިބިކަމަށްވެސް ބަޔާނުގައިވެއެވެ.
އިޒްރޭލުން ވަނީ އޮކްޓޯބަރު މަހުގެ 7 ވަނަ ދުވަހު ހަމާސް އިން އެގައުމަށް ދިން ކުއްލި ހަމަލާތަކުގެ ބަދަލު ހިފުމުގެ ގޮތުން ޣައްޒާގެ އާބާދީގެ ބޮޑު ސަރަހައްދަށް ބޮން އެޅުމުގެ އިތުރުން، މީހުން ތޮއްޖެހިފައިވާ ޣައްޒާ މުޅިން ވަށާލާފައެވެ.
އިސްރާއީލުން ޣައްޒާއަށް ދެމުންދާ ބޮމުގެ ހަމަލާތަކުގައި ފަލަސްތީނުގެ 1،900 އެއްހާ މީހުން ޝަހީދުވެފައިވާ ކަމަށް އެގައުމުގެ ސިއްހަތާ ބެހޭ ވުޒާރާއިން ބުނެއެވެ. އދ.އިން ނެރުނު ބަޔާނެއްގައި ބުނެފައިވަނީ ފަލަސްތީނުގެ އުތުރުން މީހުން ހުސްކުރުމުގެ އިންޒާރު ދިނުމުގެ ކުރިން ޣައްޒާގެ ހަތަރު ލައްކައަށްވުރެ ގިނަ މީހުން ވަނީ ގެދޮރު ގެއްލިފައި ކަމަށެވެ.
