ކިތަންމެ ރީތި ނަމެއް، ކޮންމެ ކަހަލަ މާހައުލެއްގައި އުޅެމުންދާ ކުއްޖަކުވެސް ކިބުރުވެރިކަމާއި، ފޮނިކަމާއި، އެހެން މީހުންނަކީ އެއީ ބައެއް ނޫންކަމަށް ދެކެން ފަށައިފިނަމަ ކާމިޔާބަކީ ދުރު އެއްޗަކަށް ވެދާނެކަމުގައި ރައީސުލްޖުމްހޫރިއްޔާގެ ނައިބް ފައިޞަލް ނަޞީމް ގޮވާލައްވައިފިއެވެ.
އެމަނިކުފާނު މިފަދައިން ގޮވާލެއްވީ އިސްކަންދަރު ސްކޫލްގެ އެކި މަޤާމްތަކަށް ހޮވުނު ދަރިވަރުންނަށް ލިޔުން ހަވާލުކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ.
ކޮންމެ ކުއްޖަކުވެސް އެ ކުއްޖެއްގެ ހުންނަ ހުނަރު ދެނެގަނެ އެ ހުނަރު ތަރައްގީކުރުމަށް މަސައްކަތްކުރަންޖެހޭކަމަށް ނައިބު ރައީސް ފާހަގަކުރެއްވިއެވެ. އެންމެ ބޮޑު ސަމާލުކަމެއް ދޭންވީ މަސައްކަތްތަކެއް ދަސްކުރަންކަމަށާއި ހުނަރުވެރި ބަޔަކަށްވުމަށް ގަދައަޅާ މަސައްކަތްކުރަންޖެހޭކަމަށް ނައިބު ރައީސް ވިދާޅުވިއެވެ. އަދި ގައުމަށް ހިދުމަތްކުރެވޭނީ، ކޮން ކަންތައްތަކެއް ދަސްކޮށްގެންކަން ބަލާ ހޯދަންޖެހޭކަމަށް ނައިބު ރައީސް ފާހަގަކުރެއްވިއެވެ. މީގެއިތުރުން، ކޮންމެ ކަހަލަ ކާމިޔާބީއެއް ލިބުނަސް އެކަމާއި ބޮޑާނުވެ، އެހެންކުދިންނާއިމެދު އިސްކަންދޭ ކުދި ބަޔަކަށްވުމަށް ގަދައަޅާ މަސައްކަތްކުރަންޖެހޭކަމަށް ނައިބު ރައީސް ވިދާޅުވިއެވެ.
ހަނދާންކުރަންވާނެ ކިތަންމެ ބޮޑު ކާމިޔާބީއެއް، ކިތަންމެ ރީތި ނަމެއް، ކޮންމެ ކަހަލަ މާހައުލެއްގައި އުޅެމުންދާ ކުއްޖަކުވެސް ކިބުރުވެރިކަމާއި، ފޮނިކަމާއި، އެހެން މީހުންނަކީ އެއީ ބައެއް ނޫންކަމަށް ދެކެން ފަށައިފިނަމަ ކާމިޔާބީ އަކީ ރީތި ނަމަކީ ވަކި ފަރާތަކުން ދެއްވާ އެއްޗެއް. އެހެންވީމަ އަބަދުވެސް ހަނދާނުގައި ބަހައްޓަންވާނެ ތިމާއަށް ލިބޭ ކޮންމެ އުނގެނޭ ކޮންމެ އެއްޗަކުން ލިބޭ ކޮންމެ ކާމިޔާބީއަކުން ދަސްވާ ކޮންމެ ފިލާވަޅަކުން އެހެން ކުދިންނަށް ކިޔާދޭންވާނެ. އެހެން ކުދިންނަށް އަބަދުވެސް އެހީތެރިވާންޖެހޭނެ. އެއީ އަބަދުވެސް ހަނދާނުގައި، ތިކުދިން ސިކުނޑީގައި ބަހައްޓަންޖެހޭނެ ކަމެއް.
– ނައިބް ރައީސް ވިދާޅުވިއެވެ.
ނައިބު ރައީސް ފައިޞަލް ނަޞީމް ވިދާޅުވީ ކޮންމެ މަޤާމެއްގައި މަސައްކަތް ކުރަމުންދާ މީހެއްނަމަވެސް، ޤައުމު ކުރިއަރުވާ ޚިދުމަތް ކުރުމުގެ ޒިންމާ އެމީހަކަށް އޮތްކަމަށެވެ. އެގޮތުން ޤައުމުގައި ހިނގާ ކަންތައްތައް ހައްލުކުރުމަށް ފައިދާވާނެގޮތަކަށް ވިސްނާ އެކަންކަން ހައްލުކުރުމުގެ ބައިވެރިއަކަށް ވާންޖެހޭކަމަށް ނައިބު ރައީސް ވިދާޅުވިއެވެ. އެހެންނޫންނަމަ ކިތަންމެ ގިނަ ވެރިކަމެއް ނިމިގެންދިޔަނަމަވެސް އެފަދަ ނޭދެވޭ ކަންތައްތަކަށް އެކަށީގެންވާ ހައްލެއް ނާންނާނެކަމަށް އެމަނިކުފާނު ވިދާޅުވިއެވެ. މީގެ އިތުރުން ނާއިބު ރައީސް ވަނީ ތަޙްޒީބު މުޖުތަމަޢުއެއް ބިނާކުރުމަށް ހުރިހާކަމެއްގައިވެސް ފަރުދީ ޒިންމާ އަދާކުރުމަށް އިލްތިމާސްކުރައްވާފައެވެ.
ކިތައްމެ ގިނަ 5 އަހަރެއްވެސް ނިމިގެން ހިނގައިދޭނެ. ކިތަންމެ ގިނަ ރައީސުންތަކެއް ބަދަލުވިނަމަވެސް ކަންކަން ހައްލުކުރުމަށް މަސައްކަތް ނުކުރާނަމަ އެންމެ އެދެވޭ ނަތީޖާއަށް ނާންނާނެ. ޤައުމަށްޓަކައި، ރައްޔިތުންނާއި އެންމެންގެ ހިމާޔަތަށް މަސައްކަތްކުރަން ޖެހޭ.
– ރައީސުލްޖުމްހޫރިއްޔާގެ ނާއިބް ފައިޞަލް ނަޞީމް ވިދާޅުވިއެވެ.
ނައިބް ރައީސް ވިދާޅުވީ އަދުގެ ދަރިވަރުން އެންމެ ބޮޑު އިސްކަމެއް ދޭންވީ އެއްކަމަކީ ސްކޫލް ނިމުމުގެ ކުރިން ކޮންމެވެސް މަސައްކަތެއް ދަސްކުރުމަށްކަމަށެވެ. އަދި ހުނަރުވެރި، މަސައްކަތަށް މޮޅެތި ކުދިބަޔަކަށްވެ، ޤައުމަށް ޚިދުމަތް ކުރުމަށް ނުކުތުމަށް އަމާޒުހިފުމަށް ދަރިވަރުންނަށް އެމަނިކުފާނު އިލްތިމާސްކުރެއްވިއެވެ.
ނައިބު ރައީސް ވަނީ ބޭކާރު ކަންތައްތަކާ މެދު ވިސްނުމަށް ވަގުތު ހޭދަކުރުމުމުގެ ބަދަލުގައި ހޭދަކުރާ ކޮންމެ ވަގުތަކީވެސް ބޭނުންތެރި ވަގުތުތަކަކަސް ހެދުމަށްވެސް ދަރިވަރުންނަށް އިލްތިމާސްކުރައްވާފައެވެ. އަދި ނަމޫނާ ދަރިވަރުންތަކަށް ވުމަށް ހެޔޮގޮތުގައި މަސައްކަތްކުރުމަށް ނަސޭހަތްތެރިވެވަޑައިގަތެވެ.
2 Responses
ފައިސަލް އަށްވުރެ ބޮޑަށް އެހެން މީހުންނަކީ ބައެއްނޫންކަމަށް ދެކޭމީހަކު އަހަރެންގެ އުމުރުން މިވީ 54 އަހަރުތެރޭ ނުދެކެން. ނައިބު ރައީސް ކަމަށް އާދެވުމުން ހިތް އާސްމާނަށް އެރި.
ކަލޭ ތިޔަ އުޅެ މުސްކުޅިވީ މި ދުނިޔޭގަތަ؟