އަންނަ އަހަރަށް ލަފާކުރާ ބަޖެޓް އެކުލަވާލުމުގެ މަސައްކަތަށް އިންތިޚާބީ ރައީސް ޑރ. މުހައްމަދު މުއިއްޒުގެ ފަރާތްޕުޅުން މަސައްކަތް ކުރާނެ ޚާއްސަ ކޮމެޓީއެއް އެކުލަވާލައިފިއެވެ.
އިންތިގާލީ މަރުހަލާގެ ތަތުޖަމާނު މުހައްމަދު ފިރުޒުލް ނޫސްވެރިން ގާތު މިއަދު ވިދާޅުވީ، އަންނަ އަހަރަށް ލަފާކުރާ ދައުލަތުގެ ބަޖެޓް ތައްޔާރު ކުރުމަށް އިންތިހާބީ ރައީސްގެ ފަރާތްޕުޅުން މަސައްކަތް ކުރުމަށް އެކުލަވައިލީ ހަތް މެންބަރުންގެ ކޮމިޓީއެއް ކަމަށެވެ. ކޮމިޓީގައި ތިއްބަވާ ބޭފުޅުންގެ މައުލޫމާތު އަދި ހާމައެއް ނުކުރެއެވެ. އޭނާ ވިދާޅުވީ ކޮމެޓީގެ ކޮންޕޮޒިޝަނަށް ކޮންމެވެސް ވަރެއްގެ ބަދަލު ތަކެއް އައިސްދާނެތީ ކޮމެޓީގައި ހިމެނޭ މެމްބަރުންގެ ނަންތަށް ކުރިއަށް އޮތް ދެތިން ދުވަހުގެ ތެރޭގައި ހާމަ ކުރައްވާނެ ކަމަށެވެ.
އެ ކޮމިޓީތަކުގެ މަސައްކަތްތައް ބޭނުންވާ މައުލޫމާތު ހޯދުމަށް އެދި ފިނޭންސް މިނިސްޓްރީގައި އެދިފައިވާނެ ކަމަށް އޭނާ ވިދާޅުވިއެވެ.
އެ މައުލޫމާތުތަކުގެ ތެރޭގައި އެދިފައިވާނެ ދައުލަތު މިހާރު ފިޒިކަލް ހާލަތާއި 2024 އަހަރަށް ލަފާކުރާ ހާލަތާ ގުޅޭ ތަފްސީލީ މައުލޫމާތުތައް ހޯދުމަށް. އަދި އެ މައުލޫމާތުތަކާއިއެކު ބައްދަލުވުމަށް ވެސް ވާނެ އެދިފައި. އެ މައުލޫމާތު ލިބުމަށް ފަހުގައި އަންނަ އަހަރަށް އަޅުގަނޑުމެން ލަފާކުރާނެ ބަޖެޓެއް ދަންނަވާލަން އެނގޭނީ.
– ފިރުޒުލް ވިދާޅުވިއެވެ.
ފިރުޒުލް ވިދާޅުވި ގޮތުގައި، އަންނަ އަހަރުގެ ބަޖެޓް އެކުލަވާލުމުގައި އިންތިހާބީ ރައީސް މުއިއްޒަށް އެއްބާރުލުން ދެއްވާނެ ކަމުގެ ޔަގީންކަން ރައީސް އިބްރާހިމް މުހައްމަދު ސޯލިހު ވަނީ ދެއްވައިފައެވެ. ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި މަޖިލީހުގެ މެޖޯރިޓީ އޮތް އެމްޑީޕީން ވެސް އެ ޔަގީންކަން ދީފައިވާ ކަމަށް އޭނާ ވިދާޅުވިއެވެ.
ދައުލަތުގެ ހިސާބުކިތާބަށް ކުންފުނިތަކާއި މުއައްސަސާތަކުގެ ހިސާބުކިތާބަށް ކޮންމެވެސް ވަރެއްގެ ބަދަލު ގެނެސް، ކުރީގެ ތާރީހުތަކުގައި ރަސީދުތައް އުފެއްދުން ފަދަ ކަންކަން ކުރިއަށްދާ ކަމަށް މައުލޫމާތު ލިބޭ. އަޅުގަނޑުމެންގެ އިލްތިމާސްކަމަކީ އެފަދަ ކަންކަން ނުކުރުން.
– ފިރުޒުލް ވިދާޅުވިއެވެ.
އިންތިހާބީ ރައީސްގެ ފަރާތްޕުޅުން ބަޖެޓްގައި ހިމަނާނެ ކަންކަމުގެ ތަފްސީލް މިވަގުތު ދެވެން ނެތް ކަމަށާއި އެއީ ފުރަތަމަ 100 ދުވަހު އިސްކަންދޭނެ ކަންކަން ވެސް އެކުލަވާލުމުގެ މަސައްކަތް އަދި ކުރިއަށް ގެންދާތީ ކަމަށް އޭނާ ވިދާޅުވިއެވެ. ބަޖެޓް އެކުލަވާލުމުގައި އިންތިގާލީ ކޮމިޓީއިން ބޭނުންވާ ކަންކަން ހިމަނައިގެން ބޭނުންވާ ގޮތަށް 2024 ވަނަ އަހަރަށް ލަފާ ކުރެވޭ ބަޖެޓް ފަރުވާ ކުރުމަށް ފުރުސަތު ލިބިގެންދާނެ ކަމަށް އުންމީދު ކުރައްވާ ކަމަށް ވިދާޅުވިއެވެ.
