މިހާތަނަށް ބޮލީވުޑްގައި މާބޮޑު ކާމިޔާބެއް ހާސިލު ކުރެވިފައި ނުވާ ބަތަލާ ސޯނަމް ކަޕޫރު އައު ފިލްމް އެއް އިއުލާން ކޮށްފިއެވެ.
އަންނަ އަހަރު ގެނެސްދިނުމަށް ނިންމައި އެ ފިލްމް އިއުލާން ކޮށްފައިވަނީ މިދިޔަ ހޮނިހިރު ދުވަހު ބޭއްވި އިވެންޓެއްގައިއެވެ. "ބެޓުލް ފޯ ބިޓޯރާ" ކިޔާއެ ފިލްމަކީ އިންޑިއާގެ ވާހަކަ ލިޔުންތެރިޔާ އަނޫޖާ ޗޯހާން ހަމަ މި ނަމުގައި ގެނެސްދިން ވާހަކައަށް ބިނާކޮށް ހަދާ ފިލްމެކެވެ.
ސޯނަމް އެންމެ ފަހުން ފެނިގެން ގޮސްފައިވަނީ "ބަލައިންޑް" ކިޔާ ފިލްމް އަކުންނެވެ. އެ ފިލްމް އަކީ ވެސް މާބޮޑު ކާމިޔާބެއް ހޯދުނު ފިލްމްއެއް ނޫނެވެ. މި ފިލްމް އަޅުވައިފައިވަނީ ސިނަމާތަކުގެ ބަދަލުގައ އޯޓީޓީ ޕްލެޓް ފޯމެއް ކަމުގައިވާ "ޖިއޯ ސިނެމާ" ގައިއެވެ.
2010 ވަނަ އަހަރު ސޯނަމް ގެ ކޮއްކޮ ރިއާ ކަޕޫރު ވަނީ މިވާހަކައިގެ ރައިޓްސް ފިލްމް އެއް ހެދުމަށް ގަނެފައިއެވެ. ނަމަވެސް ފިލްމް ނުހެދި ދިގުދެމިގެން ދިޔައީއެވެ. މިހާރު އޮތީ މި ފިލްމްގެ ސްކްރިޕްޓްގެ މަސައްކަތް ވެސް ނިމިފައިއެވެ.
ފިލްމް އިއުލާން ކުރި ނަމަވެސް ފިލްމް އާއި ބެހޭގޮތުން އިތުރު އެއްވެސް މަައުލޫމާތެއް ހިއްސާ ކޮށްފައިއެއް ނުވެއެވެ. ސޯނަމް އާއި އެކުގައި ފިލްމް އިން ފެނިގެންދާ ކާސްޓެއްވެސް އަދި ފިލްމް ގެ ޑައިރެކްޓަރެއްވެސް ނޭގެއެވެ.
View this post on Instagram
"ބެޓުލް ފޯ ބިޓޯރާ" ވާހަކައިގައި ކިޔައިދެނީ އެނިމޭޝަން ހެދުމުގައި ކުޅަދާނަ ޒުވާން އަންހެން ކުއްޖަކަށް އިންޑިއާގެ މަޖިލިސް އިންތިހާބެއްގައި ވާދަކުރަން މަޖުބޫރުވުމުން ހިނގާ ކަންތައްތަކެކެވެ.
