މިއަދު ކުރިޔަށްދާ ރިޔާސީ އިންތިޚާބުގެ ދެވަނަ ބުރުގެ ވޯޓު ކާމިޔާބު ކޮށްގެން، ދެން އިންތިޚާބުވާ ސަރުކާރަކުން ބޭނުންވާ އެހީތެރިކަމެއް ފޯރުކޮށް ދެއްވާނޭކަމުގައި، ދައުރު ފުރިހަމަކޮށް، މަގާމުން ދުރަށް ވަޑައިގެންނެވުމަށް މިހާރު ތައްޔާރުވަމުންދާ، ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ދެވަނަ ބުރުގައި ވޯޓު ލެއްވުމަށްފަހު މީޑިއާތަކަށް ދެއްވި ބަސްދީ ގަތުމެއްގައި ފައިސަލް ވިދާޅުވީ މިއަދުގެ ވޯޓު ކާމިޔާބު ކުރައްވާނީ ކޮން ކެނޑިޑޭޓެއްކަން އެގިވަޑައި ނުގަންނަވާ ކަމަށާއި، މިރޭ ނަތީޖާ އިއުލާން ކުރެވިގެންދާއިރު ކޮންމެ ކެނޑިޑޭޓަކު އިންތިޚާބުވިޔަސް އެބޭފުޅަން ބޭނުންވާ އެހީތެރިކަމެއް ފޯރުކޮށްދިނުމަށް ތައްޔާރަށް ހުންނެވި ކަމުގައެވެ.
ގައުމުގެ ރައީސަކަށް ވަޑައިގަންނަވާ ބޭފުޅަކު، އަޅުގަޑަކަށް ނޭގޭ ކޮން ބޭފުޅެއްކަމެއް ވަޑައިގަންނަވާނީ، މާދަމާ، މިރޭ ނަތީޖާ ފެންނާނެ އަޅުގަޑުމެންނަށް، އެބޭފުޅަކު ނުވަތަ އެ ސަރުކާރުން އަދި ރައްޔިތުންވެސް އަޅުގަޑުގެ.. އެގިފަހުރި އެއްޗެއް އަޅުގަޑުގެ އެއްވެސްކަހަލަ މަސައްކަތެއް އެހީތެރިކަމެއް ބޭނުންފުޅު ވެއްޖެއްކަމަށް ވަންޏާ އެއީ ރައްޔިތުންނަށްޓަކާ އަޅުގަޑު ކޮށްދޭ ކަމެއް. އެއީ އެއްވެސް ހާލެއްގަ ވަކި މީހަކަށް އަޅުގަޑު ކޮށްދޭކަމެއް ނޫން. އެހެންވީމަ އެގޮތުގަ އަޅުގަޑުގެ ހަމަ އެންމެ ފަހުދުވަހާއި ހަމައަށް ހުންނާނީ އެހެން. ދިވެހި ގައުމު އަޅުގަޑަށް އެންމެ މުހިންމީ. އަޅުގަޑު ދެމިހުންނާނީ ރައްޔިތުންނާ އެއްކޮށް. އަޅުގަޑު ހެޔޮއެދެނީ ދިވެހި ގައުމަށް.
ފައިސަލް ވިދާޅުވިއެވެ.
އިންތިޚާބުވާ ކޮންމެ ސަރުކާރަކަށްވެސް އެހީތެރިކަން ފޯރުކޮށް ދެއްވާނެކަމަށް ފައިސަލް ވިދާޅުވިއިރު، މި އިންތިޚާބުގައި ރަނިންމޭޓަކަށް ރައީސް ސާލިހު އޭނާ އިޚްތިޔާރު ނުކުރެއްވި ހިސާބުން ކެމްޕޭން އެއްވެސް ހަރަކާތަކުން އޭނާ ފެނިފައެއް ނުވެއެވެ. އަދި ވާދަކުރާ ކެނޑިޑޭޓުންގެ ތެރެއިން އޭނާ ތާއީދު ކުރައްވާ ކެނޑިޑޭޓެއްވެސް ހާމަކުރައްވާފައެއް ނުވެއެވެ.
