އެމްޑީޕީގެ ރައީސް މުހައްމަދު ނަޝީދުގެ ބޭބެ ޑރ.އަހްމަދު ނާޝިދު ޑރ. މުއިއްޒަށް ވޯޓު ލައްވައިފިއެވެ.
ވޯޓު ދެއްވުމަށްފަހު ކުރި ޓުވީޓުގައި ނާޝިދު ވިދާޅުވީ ވޯޓުލުމުގެ ޤާނޫނީ ޒިންމާ އަދާކުރައްވާފައިވަކަމަށާއި، ވޯޓު ދިނީ މުއިއްޒުއަށް ކަމަށެވެ.
ރިޔާސީ އިންތިޚާބުގެ ދެވަނަ ބުރުގައި ރައީސް ނަޝީދުގެ ޕާޓީކަމަށްވާ "ދަ ޑިމޮކްރެޓްސް"އިން ނިންމާފައިވަނީ ވަކި ޕާޓީއަކަށް ތާއީދުނުކުރުމަށެވެ. އެ ނިންމުމާ އެއްގޮތަށް ރައީސް ނަޝީދުވަނީ އެއްވެސް ކެންޑިޑޭޓަކަށް ދެވަނަ ބުރުގައި ތާއީދުނުކުރައްވާކަން ހާމަކުރައްވާފައެވެ.
އެހެންނަމަވެސް ދަ ޑިމޮކްރެޓްސްގެ އިސްވެރިންވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ނޫން ގޮތެއް މި ރިޔާސީ އިންތިޚާބުގައި ހޯދަންޖެހޭކަމަށް ވަރަށް ފާޅުކޮށް ވިދާޅުވެފައެވެ. އަދި ރަށްރަށުގައި ތިބި ޑިމޮކްރެޓިކް ޕާޓީގެ މެންބަރުންވަނީ އިދިކޮޅު ކެންޑިޑޭޓު އެންޑޯޒްކުރުމާއެކު އެމަނިކުފާނުގެ ކެމްޕެއިން ބައިވެރިވެފައެވެ.
@MMuizzu you got my vote this time😊. pic.twitter.com/uLBnZfDVEB
— Nash (@i_nashid) September 30, 2023
މިއަދު ހެނދުނު 8 ޖެހުމާއެކު މާލެއާއި އަތޮޅުތަކުގައި ވޯޓުލުމުގެ ކަންކަން ވަނީ ފަށާފައެވެ. ފުރަތަމަ ބުރުގެ ތަޖުރިބާއަށް ބަލާ ވީހާވެސް ގިނަ ރައްޔިތުންނަށް ވޯޓުލުމުގެ ފުރުޞަތު ފަހިކޮށްދިނުމުގެ ގޮތުން މިފަހަރު އިލެކްޝަންސް ކޮމިޝަނުން ވަނީ ވޯޓުލާ ގަޑިއަށް އިތުރު އެއްގަޑިއިރު އިތުރުކޮށްދެއްވާފައެވެ.
އެގޮތުން ރިޔާސީ އިންތިޚާބުގެ ދެވަނަ ބުރުގެ ވޯޓުލުން މިއަދު ހެނދުނު 8 ފެށިގެން ހަވީރު 5 ޖެހުމާއި ހަމައަށް ކުރިއަށްދާނެއެވެ. ހެނދުނު 7:30 އިން ފެށިގެން ވޯޓުލާ މަރުކަޒުތަކުގައި އާއްމުން ވަނީ ކިޔުތައް ހަދަން ފަށާފައެވެ. ވޯޓުލާން ފުރަތަމަ އައި 2 މީހުންގެ ހާޒިރުގައި ސެކިޔުރިޓީ އުރަ ކެނޑުމަށްފަހު، 8 ޖެހިއިރު ވަނީ ވޯޓުލުން ފަށާފައެވެ.
