ދަރުބާރުގެއަކީ އެންމެ ޒަމާނީ ކޮންވެންޝަން ފެސިލިޓީއަށް ބަދަލުކޮށް އިޤްތިޞާދީ މަންފާލިބޭ ތަނަކަށް ބަދަލު ކުރައްވާނެކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިޚާބުގެ ދެވަނަ ބުރުގެ ކެމްޕޭންގައި ރޭ ހެންވޭރު ކޮޅުގައި "ދަރުބާރު ޖަގަހަ" ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މުއިއްޒު ވިދާޅުވީ ކޮންމެ ވެރިކަމެއްގައިވެސް އަޑުއިވެނީ ދަރުބާރުގެ ހަދަން އުޅޭކަމުގެ ވާހަކަތަކެއް ކަމަށެވެ. ޒަމާންވީ ދަރުބާރުގެއަށް ހެޔޮ ބަދަލެއް ގެނައުމުގެ ވިސްނުން ސަރުކާރުތަކުން ގެންގުޅުނު ނަމަވެސް އެބަދަލު މިހާތަނަށްވެސް ފެނިފައި ނުވާކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ދަރުބާރުގެއަށް ބޮޑު ބަދަލެއް ގެނެސް، ޒަމާނީ ކޮންވެންޝަން ފެސިލިޓީއަކަށް އެތަން ބަދަލުކޮށް، އިޤްތިޞާދީ މަންފާއާއި، ޕާކިންގެ މައްސަލައަށްވެސް ހައްލު ލިބިދޭ ގޮތަށް އެތަން ބަދަލު ކުރައްވާނެކަމަށެވެ. އަދި އެމަސައްކަތް ނިމިގެންދާއިރު އެތަނަކީ ފެހިކަން ގަދަ ހިތްގައިމު ތަނަކަށްވެސް ވާނެމަށެވެ. ހަމަ މިއާއިއެކު އެތަނުގައި ކުދި އަދި މެދު ފަންތީގެ ވިޔަފާރިތަކަށް ވިޔަފާތި ކުރެވޭނެ މަގު ފަހިކޮށް ޒުވާނުންނަށް ފަހި ފުރުސަތުތަކެއް އެތަނުން ލިބިގެންދާނެކަމަށެވެ.
ޕާކިންއަށް ބޭނުންވާ ޖާގައާއިއެކީ ޒަމާނީ ކޮންވެންޝަން ފެސިލިޓީއަކަށް ބަދަލުކޮށް، މިސަރަހައްދަށް ފެހިކަން ގެނެވޭގޮތަށް، ވިޔާރީގެ މަގުވެސް ތަނަވަސްވާ ގޮތަށް، އެތަން ބަދަލު ކުރާނަން. އެތަނުގައި ކުދިކުދި ވިޔަފާރިތައް ހިންގޭނެ ގޮތަށް އެތަން ބަދަލު ކުރާނަން.
– މުއިއްޒު ވިދާޅުވިއެވެ.
މުއިއްޒު ވިދާޅުވީ ޚިދުމަތް ދިނުމުގައި އޭނާގެ ކުރިމަތީގައި އެއްވެސް ރައްޔިތަކު ބާކީ ނުވާނެކަމަށެވެ. އެއީ އާބާދީގެ ގޮތުން ކިތަންމެ ކުޑަ ރަށެއްގައި ހުރި މީހެއް ނަމަވެސް އަދި ފިކުރުގެ ގޮތުން ޚިޔާލް ތަފާތުވާ މީހެއް ނަމަވެސް އެމީހަކަށް ފޯރުކޮށްދޭންޖެހޭ ޚިދުމަތް ފޯރުކޮށް ދިނުމުގައި އެއްވެސް ތަފާތު ކުރުމެއް ނުގެންގުޅުއްވާނެކަމަށް މުއިއްޒު ވިދާޅުވިއެވެ.
ވެރިކަމަކީ ވަރަށް ބޮޑު އަމާނާތެއްކަމަށާއި، އެކަން ކުރާނީ ވަރަށް އަމާނާތް ތެރި ކަމާއިއެކު، ރައްޔިތުން އެދޭ ގޮތަށް ކަމަށް މުއިއްޒު ވިދާޅުވިއެވެ. މުއިއްޒުވަނީ އިންތިޚާބުގެ ދެވަނަ ބުރުގައިވެސް މާލޭ ރައްޔިތުންގެ ފަރާތުން ބޮޑު ތަރުހީބެއް ލިބިގެންދާނެކަމަށް އުންމީދު ކުރާކަމަށް ވިދާޅުވެފައެވެ. މާލޭގެ ރައްޔިތުންނަކީ ކުރިއަށް އޮތް ތަނުގައި ގެދޮރުވެރި ބަޔަކަށް ހަދާނޭކަމުގެ ޔަގީންކަން މުއިއްޒު ވަނީ ތަކުރާރުކޮށް ދެއްވާފައެވެ.
