ރިޔާސީ އިންތިޚާބުގެ ދެވަނަ ބުރުގެ ކެމްޕޭނަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ރަނިންމޭޓް ހުސެއިން މުހައްމަދު ލަތީފް އަވަށްޓެރި ސްރީލަންކާ އަށް ވަޑައިގެންފިއެވެ.
ރިޔާސީ އިންތިޚާބުގެ ދެވަނަ ބުރު ކާމިޔާބު ކުރުމަށް ޑރ. މުއިއްޒާއި ސެމްބެ ހިމެނޭހެން ޕީޕީއެމް/ ޕީއެންސީއާއި، އެމްއެންޕީން ދަނީ ގުޅިގެން ހުއްޓުމެއްނެތި މުޅި ރާއްޖެއާއި ދިވެހިން ދިރިއުޅޭ ޤައުމުތަކުގައިވެސް ކެމްޕޭން ހަރަކާތްތައް ފުޅާކޮށް ކުރިއަށް ގެންދަމުންނެވެ. މިގޮތުން އަވަށްޓެރި ސްރީ ލަންކާއަކީ ރާއްޖޭގެ ގިނަ އަދަދެއްގެ ރައްޔިތުން ދިރިއުޅޭ ޤައުމަކަށްވާއިރު، ސެމްބެ އާއި ލީޑަރޝިޕުން ވަނީ ރޭ ލަންކާއަށް ވަޑައިގެންފައެވެ.
ލަންކާއަށް ދިޔަ ޓީމުގައި ޕީއެންސީގެ ނައިބް ރައީސް އިބްރާހިމް ޝުޖާއާއި، ކުރީގެ ފޮރިން މިނިސްޓަރ އަދި މޯލްޑިވްސް ނޭޝަނަލް ޕާޓީ (އެމްއެންޕީ)ގެ ނައިބް ރައީސް ދުންޔާ މައުމޫންވެސް ހިމެނި ވަޑައިގަންނަވައެވެ. މި ދަތުރުގައި ލަންކާގައި ދިރިއުޅޭ ދިވެހިންގެ ކައިރިއަށް ވަކިވަކިން ޒިޔާރަތް ކުރުމާއި، ރައްޔިތުންގެ ބައްދަލުވުމެއްވެސް ބޭއްވުމަށް ވަނީ ހަމަޖެހިފައެވެ.
މިދަތުރުގައި ޕީޕީއެމް/ޕީއެންސީން އިންތިޒާމު ކޮށްގެން ލަންކާގައި ދިރިއުޅޭ ދިވެހިންނަށް ޚާއްސަކޮށްގެން ބޭއްވި ޕޫލް ބިލިއާޑް މުބާރާތުގެ ނިމުން މިއަދު ވަނީ ފާހަގަކޮށްފައެވެ. ވަނަ ވަނައަށް ދިޔަ ފަރާތްތަކަށް އިނާމު ހަވާލުކޮށްދެއްވީ ހުސެއިން މުހައްމަފު ލަތީފެވެ. ލަންކާގައި ދިރިއުޅޭ ދިވެހިންގެ ޝަކުވާތަކުގެ ތެރޭގައި ލަންކާގައި ދިވެހިންނަށް ޚާއްސަ އެއް ސެންޓަރު ކަމުގައިވާ ސޯސަން ވިލާގައި ކުޅިވަރު ވަސީލަތްތަކާއި އެހެންވެސް ވަސީލަތްތައް އެންމެ އެކަށީގެންވާ ގޮތެއްގައި ނެތުން ހިމެނެއެވެ.
އަދި ލަންކާގައި ދިރިއުޅޭ ދިވެހި ރައްޔިތުންނަށް އެދެވޭ ބަދަލުތަކެއް މިފަސް އަހަރު ތެރޭގައި ނުގެނެވޭ ކަމަކީ އެޤައުމުގައި ދިރިއުޅޭ ދިވެހި ރައްޔިތުންގެ ކަންބޮޑުވުމެކެވެ.
