ކެނެޑާގައި އެގައުމުގެ ރައްޔިތެއްގެ ގޮތުގައި ދިއިރުޅެމުންދިޔަ، އިންޑިއާގެ ސިކުންގެ ދަރިކޮޅަށް ނިސްބަތްވާ އެކްޓިވިސްޓެއްގެ ގަޔަށް ބަޑިޖަހާ މަރާލުމުގެ ފަހަތުގައި އޮތީ އިންޑިއާ ސަރުކާރުކަމަށް ކެނެޑާއިން ތުހުމަތު ކޮށްފިއެވެ.
ކެނެޑާގެ ގާނޫނުހަދާ މަޖިލިހުގައި ވާހަކަ ދައްކަމުން އެގައުމުގެ ބޮޑުވަޒީރު ޖަސްޓިން ޓްރޫޑައު ވިދާޅުވީ ކެނެޑާގައި ދިރިއުޅެމުންދިޔަ ސިކް ދަރިކޮޅުގެ އިސް އެކްޓިވިސްޓެއް ކަމަށްވާ ހަރުދީޕް ސިންގ ނިއްޖާރުގެ ގަޔަށް ބަޑިޖަހާ އޭނާ ފާއިތުވި ޖޫންމަހު މަރާލުމުގެ ފަހަތުގައި އިންޑިއާ ސަރުކާރުގެ އޭޖެންޓުން ތިބިކަމުގެ ހެކި އެބަހުރި ކަމަށާއި، އެ ތުހުމަތުތައް ކެނޭޑިއަން ސެކިއުރިޓީ އޭޖެންސީތަކުން މިހާރު ތަހުގީގު ކުރަމުންދާ ކަމުގައެވެ.
އަދި އޭނާ އިތުރަށް ވިދާޅުވީ މިމައްސަލާގެ ކަންބޮޑުވުން އަމިއްލަ ހައިސިއްޔަތުން، އިންޑިއާގެ ބޮޑުވަޒީރަށް މިހާރު ހިއްސާކޮށްފައިވާ ކަމުގައެވެ.
ހަރުދީޕް ސިންގ ނިއްޖާރު ބަޑިޖަހާ މަރާލާފައިވަނީ ފާއިތުވި ޖޫންމަހުގެ 18 ވަނަ ދުވަހު ކެނެޑާގެ ޕްރޮވިންސެއް ކަމަށްވާ ބްރިޓިޝް ކޮލަމްބިއާގައި ހުންނަ ސިކުންގެ ފައްޅިއެއްގެ ބޭރުގައި އޭނާ ހުއްޓައެވެ. މިހާދިސާ ގިނަބަޔަކު ވަނީ ކުށްވެރި ކޮށްފައެވެ.
"ކެނެޑާގެ ފަސްގަޑުގައި، ކެނެޑާގެ ރައްޔިތަކު މެރުމުގައި ބޭރުގެ އެއްވެސް ގައުމަކުން ބައިވެރިވެއްޖެ ނަމަ އެއީ އަހަރެމެންގެ ދާޚިލީ މިނިވަންކަމަށް އަރައިގަތުން،" ކެނެޑާގެ ގާނޫނުހަދާ މަޖިލިހުގައި ވާހަކަ ދައްކަވަމުން ކެނެޑާގެ ބޮޑުވަޒީރު ޓްރޫޑައު ވިދާޅިވިއެވެ.
"މި މައްސަލާގެ އެންމެ ފުނާހަމަޔަށް ދަތުރު ކުރުމަށް، މިހާރު ހިނގަމުންދާ ތަހުގީގަށް އިންޑިއާއިން އެއްބާރުލުން ދިނުމަށް ހަރުއަޑުން ގޮވާލަން."
ކެނޑާގެ ސަރުކާރުގެ މި ތުހުމަތުތައް އިންޑިއާގެ ފޮރިން މިނިސްޓްރީންވަނީ ދޮގު ކޮށްފައެވެ. އަދި ފޮރިން މިނިސްޓްރީން ބުނެފައިވަނީ މި ތުހުމަތުތައް ކެނެޑާގެ ބޮޑުވަޒީރު މޯޑީގެ އަރިހުގައި ދެންނެވުމުން އެވަގުތު މޯޑީވެސް މި ތުހުމަތުތައް ދޮގު ކޮށްފައިވާކަމުގައެވެ.
ނިއްޖާރަކީ އިންޑިއާއިން "ޓެރަރިސްޓެއް" ކަމަށް ކަނޑައަޅާފައިވާ މީހެކެވެ. ކެނެޑާގެ ނޫސްތަކުގައި ވާގޮތުން، އިންޑިއާގެ ޕަންޖާބުގައި މަރާލި ހިންދޫ ފާދިރީއަކު މަރާލުމުގައި ބައިވެރިވުމުގެ ތުހުމަތު އިންޑިއާގެ ކައުންޓަރ ޓެރަރިޒަމް ނޭޝަނަލް އިންވެސްޓިގޭޝަން އޭޖެންސީ (NIA)އިން ވަނީ އޭނާގެ މައްޗަށް ކޮށްފައެވެ. އަދި 2022 ވަނަ އަހަރު ވަނީ، އޭނާ ހައްޔަރު ކުރުމަށް އެހީއަކަށް ވާވަރުގެ މައުލޫމާތު ފޯރުކޮށްދިން ފަރާތަކަށް 16،200 އެމެރިކާ ޑޮލަރުގެ އިނާމެއްވެސް ހުށަހަޅާފައެވެ.
ސީބީސީ ނިއުސްއިން ރިޕޯޓު ކޮށްފައިވާ ގޮތުގައި ނިއްޖާރަކީ އިންޑިއާގެ ސިކުންގެ އެކްޓިވިސްޓް ގުރޫޕެއް ކަމަށްވާ "ސިކްސް ފޯރ ޖަސްޓިސް" (ސިކުންނަށް އިންސާފު) ގުރޫޕާއިވެސް ގުޅުން އޮންނަ އެކްޓިވިސްޓެކެވެ. މި ގުރޫޕަކީ އިންޑިއާގައި ސިކުންގެ މިނިވަން ދައުލަތެއް އުފެއްދުމަށް ގޮވާލާ ގުރޫޕެކެވެ. އިންޑިއާ ސަރުކާރުން ވަނީ މިގޮވާލުމަށް ދެކޮޅު ހަދާފައެވެ.
