ރިޔާސީ އިންތިޚާބުގެ ފުރަތަމަ ބުރުގައި ކުރީގެ ހޯމް މިނިސްޓަރު އުމަރު ނަސީރަށް ވުރެއް މަދުން ވޯޓު ލިބުނީމާ، ދެވަނަ ބުރުގައި އެއްވެސް ކެންޑިޑޭޓެއްގެ ފަހަތަށް އަރަންޖެހޭ ކަމަށް ގަބޫލު ނުކުރައްވާކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެެއްޖެއެވެ.
ރިޔާސީ އިންތިޚާބުގެ ދެވަނަ ބުރުގައި އެއްވެސް ކެންޑިޑޭޓަކަށް ތާއީދު ނުކުރަން ނިންމައި ބޭއްވި ކައުންސިލް ބައްދަލުވުމަށްފަހު ޤާސިިމް ވިދާޅުވީ މިއިންތިޚާބުގައި ދިވެހި ރައްޔިތުންގެ ކައިރިއަށް ގޮސް ވަރަށް ގިނަ ކަންކަން ހިއްސާ ކުރެއްވި ކަމަށެވެ. ކަންކަން ދާގޮތުގެ މައުލޫމާތު ހިއްސާ ކުރެއްވި ކަމަށެވެ. ނަމަވެސް ރައްޔިތުން ނިންމީ އެވާހަކަތައް ގަބޫލުނުކޮށް ޖޭޕީއަށް މިއިންތިޚާބުގައި ފުރުސަތެއް ނެތްކަމަށެވެ.
ޤާސިމް ވިދާޅުވީ އިންތިޚާބުގެ ފުރަތަމަ ބުރުގައި މިނިވަން ކެންޑިޑޭޓް އުމަރު ނަސީރަށްވުރެއް މަދުން ވޯޓު ލިބުމުން އިތުރަށް ދެވަނަ ބުރުގައި ވަކި މީހަކަށް ތާއީދުކޮށްގެން ކުރަންޖެހޭ ކަމެއް އޮތްކަމަށް ނުދެކޭ ކަމަށެވެ. އަދި ދެވަނަ ބުރުގައި ޕާޓީގެ ޢާންމު މެމްބަރުން ކޮންމެ މީހަކަށް ވޯޓު ދެއްވިޔަސް އެއީ މައްސަލައެއް އޮތްކަމެއް ނޫންކަމަށް ޤާސިމް ވިދާޅުވިއެވެ.
ޤާސިމާއި ނުލައި ރައީސް ޞާލިހަށް ދެން އިންތިޚާބުގައި ކާމިޔާބު ވެދާނެތޯ ކުރެވުނު ސުވާލުގައި ޤާސިމް ވިދާޅުވީ އެކަން އެންމެ ރަނގަޅަށް އެނގޭނީ ހެއްދެވި ފަރާތަށް ކަމަށެވެ. ޤާސިމް ވަނީ އިންތިޚާބުގައި ލިބުނު 5،000 އެއްހާ ވޯޓަކީ އިންތިޚާބުގެ ނަތީޖާ މާބޮޑަށް އަނބުރާލެވޭނެ ވޯޓު ކޮޅެއްކަމަށް ނުދެކޭކަމަށެވެ.
އިންތިޚާބުގެ ނަތީޖާ ދައްކާގޮތުން ރާއްޖޭގެ އެންމެ ބޮޑު ވިޔަފާރިވެރިޔާ އަދި އަމިއްލަ ޕާޓީގެ ދަފްތަރުގައި 22607 މެމްބަރުން ތިބި ޖުމްހޫރީ ޕާޓީގެ ކެންޑިޑޭޓް ޤާސިމް ފަހަތަށް ޖައްސާލައި އުމަރު ވަނީ އިންތިޚާބުގެ 4 ވަނަ އަށް އެންމެ ވޯޓު ހޯދި ކެންޑިޑޭޓަށް ވެފައެވެ. އުމަރު ވަނީ މިއިންތިޚާބުގައި 6،343 ވޯޓު ހޯއްދަވާފައެވެ. ޤާސިމަށް ލިބުނީ 5،460 ވޯޓެވެ. އުމަރަކީ މިއިންތިޚާބުގައި އެންމެ ކެމްޕޭން ހަރަކާތްތައް މަދު އެއް ކެންޑިޑޭޓެވެ.
