ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މާދަމާ ޕީޕީއެމްގެ ރައީސް، ރައީސް ޔާމީނާއި ބައްދަލު ކުރުމަށް މަސައްކަތް ކުރަމުންދާކަމަށް އެމަނިކުފާނު ވިދާޅުވެއްޖެއެވެ.
ރާއްޖޭގެ މިހާރު އޮތް ވެރިކަމުގެ ނިޒާމު ބަދަލު ކުުރުމާއި ގުޅޭގޮތުން ރައީސް ނަޝީދު މާދަމާ މާފުއްށީ ޖަލަށް ވަޑައިގެން ރައީސް ޔާމީނާއި ބައްދަލު ކުރެވޭނެ އިންތިޒާމު ހަމަޖެއްސުމަށް މަޖިލީހުގެ އަމީން އާންމު އަރިހުން އެދިފައިވާނެކަމަށް ރައީސް ނަޝީދު ވިދާޅުވިއެވެ.
ދަ ޑިމޮކްރެޓްސްގެ މެމްބަރުންނާއި މިއަދު މެންދު ބޭއްވި ބައްދަލުވުމެއްގައި ވާހަކަ ދައްކަވަމުން ރައީސް ނަޝީދު ވިދާޅުވީ މިއީ ވަރަށް ޚައްސާސް ދަނޑިވަޅެއްކަމަށެވެ. އިންތިޚާބުގެ ފުރަތަމަ ބުރުގެ ނަތީޖާ ލިބިފައިވާ ގޮތުން ދެވަނަ ބުރަކަށް އޮތީ ދާން ޖެހިފައިކަމަށެވެ. އަނެއްކާވެސް މިވަނީ ކުރިއެކޭވެސް އެއްގޮތަށް ބަލިވި ޕާޓީތަކާއި ލީޑަރުންނާއި ބައިއަތު ހިފައި ކޯލިޝަން ހަދައިގެން ވެރިކަން ހޯދަން ކަމަށެވެ. މިއީ ޤާނޫނު އަސާސީ ދަންނަ ރޫހެއް ނޫންކަމަށާއި، މިކަން މިގޮތަށް ކުރުމުން ޕާޓީތަކަށާއި، ޢާންމު މެމްބަރުންނަށް ފަހުން ލިބޭ ގެއްލުން މާބޮޑުކަމަށެވެ.
ރައީސް ނަޝީދު ވިދާޅުވީ ވެރިކަމުގެ ނިޒާމު ބަދަލު ކުރުމަށްޓަކައި ރައްޔިތުންގެ ފެންނަ ނުފެންނަ ވޯޓެއް ނެގުމަށް މިވަގުތަކީ އެންމެ މުނާސަބު ވަގުތު ކަމަށެވެ. އެކަން މިމަހުގެ 25 ވަނަ ދުވަހުގެ ކުރިން ކުރުމަށް ދެވަނަ ބުރުގައި އޮތް ދެޕާޓީއަށްވެސް ހުށަހަޅާފައިވާކަަމަށެވެ. އޭގެ ތެރެއިން ޕީޕީއެމްއިން މިކަންކަމަށް އަގަބަހުން އެއްބަސްވި ނަމަވެސް ލިޔުމުން ސޮއި އަޅަން ބޭނުން ނުވާކަމަށެވެ. އަދި އެމްޑީޕީއާއި މިމަޝްވަރާ ކުރަމުންދާއިރު މާބޮޑު ކުރިއެރުމެއް ލިބިފައި ނުވާކަމަށެވެ.
މިކަން ކުރުމަށްޓަކައި ރައީސް ޔާމީންގެ މަޝްވަރާ ހޯދުމަކީ ކޮންމެހެން މުހިންމު ކަމެއްކަަމަށް ދެކޭ ކަމުގައި ރައީސް ނަޝީދު ވިދާޅުވިއެވެ. އެގޮތުން މާދަމާ ރައީސް ޔާމީނާއި ބައްދަލު ކުރުމަށް މާފުށީ ޖަލަށް ވަޑައިގަންނަވަން އިންތިޒާމު ހަމަޖެއްސުމަށް މަޖިލިސް އަމީން އާންމަށް ދަންނަވާފައިވާނެކަމަށް ރައީސް ނަޝީދު ވިދާޅުވިއެވެ.
ވެރިކަމުގެ ނިޒާމަށް ބަދަލެއް ގެންނައިރު، ރައީސް ޔާމީނާވެސް މިކަމުގައި މަޝްވަރާކުރުން ކޮންމެހެން ބޭނުންތެރި. އަޅުގަނޑު މަޖިލީހުގެ އަމީން އާންމު އަރިހުގައި ދަންނަވާފައިވާނެ، މާދަމާ މާފުއްޓަށް ދެވޭތޯ، މާދަމާ އަޅުގަނޑު މާފުއްޓަށް ދިއުމަށް. ރައީސް ޔާމީންގެ އަރިހުގައި ދަންނަވަން ބޭނުމީ ވެރިކަމުގެ ނިޒާމަށް ބަދަލެއް ގެންނަން 25 ވަނަ ދުވަހުގެ ކުރީގައި އެވޯޓު ނެގުމުގައި އެމަނިކުފާނު ދެކެވަޑައި ގަންނަވާ ގޮތަކާއި އަަދި އަޅުގަނޑުމްނަށް އެހީތެރިވެދެން އޮތްނަމަ އެވާހަކައެއް.
– ރައީސް ނަޝީދު ވިދާޅުވިއެވެ.
ރައީސް ނަޝީދަކީ ދައުލަތުގެ ތިން ބާރުގެ ތެރެއިން އެއްބާރުގެ ވެރިޔާއަށް ވުމުން ރައީސް ނަޝީދަށް މިބައްދަލުވުން ކުރިއަށް ގެންދިއުމަށް އެއްވެސް ހުރަހެއް ނޯންނާނެއެވެ.
ރައީސް ނަޝީދު ވިދާޅުވީ ވެރިކަމުގެ ނިޒާމާއިގުޅޭގޮތުން ރައްޔިތުން ނިންމާ ނިންމުމެއް ބެލުމަކީ ކޮންމެހެން ކުރަންޖެހޭ ކަމެއް ކަމަށެވެ. އެކަން ނުކޮށް ދެން ރާއްޖެއަށް ހޯދޭނެ މޮޅެއް ކުރިއެެރުމެއް އޮތްކަމަށް ނުދެކޭކަމަށް ރައީސް ނަޝީދު ވަނީ ވިދާޅުވެފައެވެ. ޑިމޮކްރެޓްސް އިން ޕީޕީއެމް/ޕީއޭންސީއަށާއި، އެމްޑީޕީއަށް ހުށަހަޅާފައިވަނީ މިމަހުގެ 25 ވަނަ ދުވަހު ނިޒާމީ ވޯޓު ނެގުމަށެވެ. ނަމަވެސް މިހާތަނަށް އަދި ދެވަނަ ބުރުގައި ވާދަކުރާ ޕާޓީތަކުން މިކަމަށް ގޮތެއް ނިންމާފައި ނުވެއެވެ.
