އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހު އެމްޑީޕީގެ ޤައުމީ މަޖިލީހުގެ މެމްބަރުންނާއި ބައްދަލު ކުރައްވައިފިއެވެ.
ރިޔާސީ އިންތިޚާބުގެ ފުރަތަމަ ބުރުގައި ދެވަނައިގައި އޮވެ އިންތިޚާބު ނިންމާލުމުން ދެވަނަ ބުރުގައި ވާދަކުރުމުގެ ފުރުސަތު ރައީސް ޞާލިހަށް ވަނީ ލިބިފައެވެ. އިންތިޚާބުގެ ދެވަނަ ބުރުގައި މަސައްކަތްތައް ރާވާލާނެ ގޮތަކާއި އަދި ފުރަތަމަ ބުރުގައި ހެދުނު މިސްޓޭކްސްތަކާއި ގުޅޭގޮތުން މަޝްވަރާ ކުރުމަށް ބާއްވާ މިބައްދަލުވުމުގައި ޤައުމީ މަޖިލީހުގެ ގިނަ މެމްބަރުން ވަނީ ބައިވެރި ވެފައެވެ.
އެމްޑީޕީގެ ގައުމީ މަޖިލީހުން މީގެކުރިން ފާސްކޮށްފައިވާ ގަރާރެއްގެ ދަށުން ކޯލިޝަން ހެދުމުގެ ބާރު އޮތީ ރިޔާސީ ކެންޑިޑޭޓަށް ދީފައެވެ. ފުރަތަމަ ބުރުގައި ރައީސް ސޯލިހަށް ލިބިވަޑައިގަތީ 39 އިންސައްތަ ވޯޓެވެ. އެއީ, 86،151 ވޯޓެވެ އެންމެ ގިނަ ވޯޓު ލިބުނީ އިދިކޮޅު ޕީއެންސީގެ ކެންޑިޑޭޓު ޑރ. މުހައްމަދު މުއިއްޒަށެވެ. އޭނާއަށް ވޯޓުލީ މީހުންގެ 101،613 ލިބުނުއިރު އެއީ 46 އިންސައްތައެވެ.
އިބްރާޙިމް މުޙައްމަދު ޞާލިޙު ބައިވެރިވެ ވަޑައިގަންނަވާ ޤައުމީ މަޖިލިހުގެ ބައްދަލުވުމެއް ކުރިއަށްދަނީ pic.twitter.com/DFaywpENoV
— MDP Secretariat (@MDPSecretariat) September 11, 2023
އިންތިޚާބުގެ ދެވަނަ ބުރަކަށް ދާއިރު ރައީސް ޞާލިހު ވިދާޅުވީ ފުރަތަމަ ބުރުގައި ވަރަށް ގިނަ މިސްޓޭކްތައް ހެދިފައިވާކަމަށާއި، ފުރަތަމަ ބުރު ދިޔައީ އުންމީދު ކުރި ގޮތަކަށް ނޫންކަމަށެވެ.
ރައީސް ވިދާޅުވީ މިހެން ދިމާވީ ބައެއް މީހުން ވޯޓުލާ ގަޑި އިތުރު ކުރާނެކަމަށް ބަލައިގެންވެސް ތިބުމުންކަމަށެވެ. އަދި ބައެއް ތަންތަނުގައި މީހުން ނެރުމަށް ކުރަންޖެހޭ މަސައްކަތްވެސް ކުރެވިފައި ނުވާކަން ފާހަގަވާކަމަށް ރައީސް ވިދާޅުވިއެވެ. އަދި މަސައްކަތް ކުރަނީ ދެވަނަ ބުރުގައި އެކަންކަން ރަނގަޅުކޮށް ނަތީޖާ ނެރުމަށް ކަމަށް ރައީސް ވިދާޅުވެފައިވެއެވެ.
