ޕީޕީއެމް/ޕީއެންސީގެ ލީޑަރޝިޕްގައި ތިއްބެވި ބޭފުޅުންނަކީ ވަރަށް ޤާބިލް މާދަމާ ސަރުކާރާއި ހަވާލުވާން ޖެހުނަސް އެކަމަށް ފަރިތަ ޤާބިލް ބޭފުޅުން ކަމުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިޚާބު ކާމިޔާބުކޮށް ސަރުކާރެއް އެކުލަވާލުމަށް އެއްވެސް ގޮންޖެހުމެއް އޮތްތޯ ދެންނެވުމުން މުއިއްޒު ވިދާޅުވީ ސަރުކާރެެއް އެކުލަވާލައި ކެބިނެޓެއް އެލުމަކީ ކުރަން ފަސޭހަ ކަމެއްކަމަށެވެ. ރައީސް ޔާމީންގެ ކާމިޔާބު ވެރިކަމުގައި ދިވެހި ރައްޔިތުންނަށް ޚިދުމަތް ދެއްވި ބޭފުޅުންނާއި، ޤައުމަށް އެތަކެއް ޚިދުމަތްތަކެއް ކޮށްދެއްވާފައިވާ އަދި ޒުވާން ތައުލީމީ ޤާބިލް އެތައް ބޭފުޅުނެއް މިހާރުވެސް ޕީޕީއެމް/ޕީއެންސީގެ ލީޑަރޝިޕްގައި ތިއްބެވިކަމަށް މުއިއްޒު ވިދާޅުވިއެވެ.
އަޅުގަނޑަށް އެއްވެސް ކަންބޮޑުވުމެއް އޮތް ކަމެއްނޫން ކެބިނެޓެއް އެކުލަވާލުން. ސަރުކާރެއް އެކުލަވާލުމަކީ. ޕީޕީއެމް/ޕީއެންސީގެ ފަރާތުން މިހާތަނަށްވެސް ރައީސް ޔަމީންގެ ލީޑަރޝިޕްގައި އެއްދައުރު ހޭދަކޮށްފި. އަދި މިހާރު އާމޫނުތައްވެސް އެބަތިބި. ހަމަ ވަރަށް ޕްރޮމިސިން ވަރަށް ރަނގަޅު ކިޔަވައިގެންތިބި ތަޖުރިބާ ހުރި އަޅުގަނޑު މިބޭނުންވާ ގޮތަށް ރެއާއި ދުވާލު މަސައްކަތް ކުރަން ކެރޭ ހީވާގި ބޭފުޅުން އެބަތިއްބެވި.
– މުއިއްޒު ވިދާޅުވިއެވެ.
މުއިއްޒު ވިދާޅުވީ ޤައުމުގެ ހިންގުމާއި ހަވާލުވުމަށް ކުރާ މަސައްކަތުގައި މާދަމާ ދިވެހި ރައްޔިތުން ދެއްވާ ވޯޓަކީ ޤައުމުގެ މިނިވަންކަމާއި ސިޔާސަތު އިސްކޮށް ދެވޭ ވޯޓަކަށް ހަދަންޖެހޭ ކަމަށެވެ. ރާއްޖޭގެ މިނިވަންކަން ކަށަވަރު ކުރުމަށް ވެރިކަމުގެ ފުރަތަމަ ދުވަހުވެސް މަސައްކަތް ކުރައްވާނެ ކަމަށާއި، އެއާއިއެކު ދިވެހިން އެދޭ ތަރައްޤީއާއު ކުުރިއެރުން ހޯދުމުގައި މުޅި ސަރުކާރު 24 ގަޑިއިރު މަސައްކަތް ކުރަމުން ދާނެކަމަށް މުއިއްޒު ވިދާޅުވިއެވެ.
އަޅުގަނޑު ދިވެހި ލޮބުވެތި ރައްޔިތުންނަށް ދަންނަވާލަން ބޭނުންވަނީ އަޅުގަނޑަށް ކެންޑިޑޭޓް ނަންބަރު 4 އަކަށް އިތުބާރު ކުރައްވާ ވޯޓު ދެއްވުމަށޭ. އޭރުން ޔަގީންކަން އަޅުގަނޑު މިދެނީ އިދާރަ ކުރެއްވިއްޔާ ދިވެހި ޤައުމުގެ މިނިވަންކަން އަޅުގަނޑު ޔަގީންކޮށްދޭނަން. އަޅުގަނޑުމެންގެ ދިވެހި ބަހާއި އިސްލާމްދީން ހިމާޔަތްކޮށްދޭނަމޭ. ތަރައްގީ ޔަގީންކޮށް ދޭނަމޭ. ނަތީޖާ ނެރެދޭނަމޭ. އިރާދަ ކުރެއްވިއްޔާ ދިވެހި އެދޭފަދަ ވެރިކަމެއް އަޅުގަނޑުގެ ފަރާރުން ކޮށްދޭނަމޭ.
– މުއިއްޒު ވިދާޅުވިއެވެ.
ރިޔާސީ އިންތިޚާބުގެ ވޯޓުލުން މާދަމާ އޮންނައިރު ވީހާވެސް ހެނދުނާ ވަޑައިގެން ވޯޓުލުމުގެ ކަންކަން ނިންމެވުމަށް މުއިއްޒު ވަނީ އެދިވަޑައިގެންފައެވެ. އަދި ވޯޓަށް މަކަރު ހަދައި އޮޅުވާލަން މިސަރުކާރުން ކުރާ އެއްވެސް މަސައްކަތަކަށް ޖާގަ ނުދީ އިންތިޚާބުގައި ބޮޑު ތަނުން މިސަރުކާރު ބަލިކުރުމަށް ރައްޔިތުންގެ ކިބައިން މުއިއްޒު ވަނީ އެދިވަޑައިގެންފައެވެ.
