ގަންޖިފަރާސް ލިޔަސް، ޓީޝާޓް ލިޔަސް އިންޑިޔާ ސިފައިން ވާނީ އިންޑިޔާ ސިފައިންނަށް ކަމަށާއި، އެމީހުންނަށް މިފަސްގަނޑުގައި ނުތިބެވޭނެކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި މިއަދު ހަވީރު ވިލިމާލެއަށް ވަޑައިިގެން ވާހަކަ ދައްކަވަމުން މުއިއްޒު ވިދާޅުވީ ހޮނިހިރު ދުވަހު ވޯޓުލާއިރު ރައްޔިތުން އެންމެ ބޮޑަށް ސަމާލުކަން ދޭންވީ ދިވެހިންގެ މިނިވަންކަން ހިމާޔަތް ކުރުމަށް ކަމަށެވެ. ރާއްޖޭގައި އެއްވެސް ޤައުމުގެ ސިފައިންނަށް ތިބެވި، އަޑިނޭގޭ އެއްބަސްވުންތައް ހަދައިގެން އުޅުމަކީ ޖާގަ ދޭނެ ކަންކަމެއް ނޫންކަމަށް މުއިއްޒު ވިދާޅުވިއެވެ.
ރާއްޖޭގައި އިންޑިއާގެ ސިފައިން ތިބިކަން ރައީސް ޞާލިހުވެސް ގަބޫލު ކުރައްވާ ކަން އެންމެ ފަހުން ބޭއްވި ބަސްހުގައިވެސް ވިދާޅުވިކަމަށް މުއިއްޒު ވިދާޅުވިއެވެ. ނަމަވެސް ރައީސް ޞާލިހަށް އެމީހުން މިޤައުމުން ބާލަން އަދި ވެފައިވާ ސިއްރު އެއްބަސްވުންތައް ހާމަ ކުރަން ނުކެރޭކަމަށް މުއިއްޒު ވިދާޅުވިއެވެ. އަދި އެމީހުންނަށް ރާއްޖޭގައި އޮތް މިނިވަން ކަމަކާއި ކުރާ ކަމެއްވެސް މިސަރުކާރަށް ހާމަ ނުކުރެވޭކަމަށް މުއިއްޒު ވިދާޅުވިއެވެ.
ގަންޖިފަރާސް ލިޔަސް، ޓީޝާޓް ލިޔަސް އިންޑިޔާ ސިފައިން ވާނީ އިންޑިޔާ ސިފައިންނަށް. އެމީހުންނަށް މިތާކު ނުތިބެވޭނެ. އަޅުގަނޑު ތިޔަބޭފުޅުންގެ މިޤައުމުގެ މިނިވަންކަން ދަމަހައްޓައި މިނިވަންކަން ގާއިމް ކުރާނަން.
– ޑރ.މުއިއްޒު ވިދާޅުވިއެވެ.
މުއިއްޒު ވިދާޅުވީ ދިވެހި މިހާރުވެސް އަޑު އުވެނީ އިންޑިއާއަށް އައްޑޫއާއި، ހަނިމާދޫ އިންޓަރ ނޭޝަނަލް އެއާޕޯޓް ތަރައްޤީ ކުރާ މަތިން އުމުރު ދުވަހަށް ބޮޑު ބިމެއް ދޭން އުޅޭކަމުގެ ވާހަކަ ކަމަށެވެ. މިއީ ސީދާ މިނިވަން ކަމަށް އޮތް ބޮޑު ނުރައްކަލެއް ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ އުތުރު ތިލަފަޅު އެއްބަސްވުމާއި އެނޫންވެސް މިނިވަންކަމަށް ބުރޫއަރާ އެތައްކަމެއްގެ ވާހަކަ މިސަރުކާރުން ފޮރުވައި ސިއްރު ކުރަމުންދާކަމަށެވެ. މިކަންމަށް ނޫނެކޭބުނެ ދިވެހި ފަސްގަނޑުގެ ހައްގުގައިޖިހާދު ކުރި އަބުތާލުންގެ ހައްގުގައިވެސް މިވެރިކަން ބަދަލު ކުރަންޖެހޭ ކަމަށް މުއިއްޒު ވިދާޅުވިއެވެ. އެހެން ނޫނީ އެއީ އެބޭފުޅުންނަށް ވެވޭ ބޮޑު ބޭއިންސާފެއް ކަމަށް މުއިއްޒު ވިދާޅުވިއެވެ.
