ދީނީ އިލްމުވެރިޔާ ޑރ.މުހައްމަދު އިޔާޒުގެ ބައްޕާފުޅު ކަޅުބެ ޢަބްދުއްލަތީފްގެ ކުރިއަށް އޮތް ރިޔާސީ އިންތިޚާބުގައި ޕީޕީއެމް/ޕީއެންސީގެ ކެންޑިޑޭޓް ޑރ.މުހައްމަދު މުއިއްޒުއަށް ތާއީދު ކުރުމަށް ނިންމައިފިއެވެ.

ރިޔާސީ އިންތިޚާބުގައި ޑރ. މުއިއްޒަށް ތާއީދު ކުރުމަށް ނިންމީ މިއަދު ޤައުމު އޮތް ހާލަތުން ޤައުމު ސަލާމަތްކޮށް އަމާން އައްސޭރިއަކަށް ގެންދަން ކަމަށް ޢަބްދުއްލަތީފް ވިދާޅުވިއެވެ. އޭނާ ވިދާޅުވީ މިފަހަރު ވާދަކުރައްވާ ކެންޑިޑޭޓުންގެ ތެރެއިނން އެކަން ކުރެވޭނެ ކަމަށް ފެންނަނީ ޕީޕީއެމް/ޕީއެންސީގެ ކެންޑިޑޭޓް ޑރ.މުއިއްޒުއަށް ކަމަށްވާތީ މުއިއްޒުއަށް މިއިންތިޚާބުގައި ތާއީދު ކުރުމަށް ނިންމާފައި ވާމަށެވެ.

ޢަބްދުއްލަތީފް ވިދާޅުވީ އޭނާ މުއިއްޒަށް ތާއީދު ކުރަނީ ރައީސް ޔާމީން މިނިވަން ކުރަން ނޫންކަމަށެވެ. އޭނާ ވިދާޅުވި ގޮތުގައި ރައީސް ޔާމީނަށް ތާއީދު ނުކުރަނީ ޝަރީއަތުގައި އެމަނިކުފާނުގެ މައްސަލަ އޮތުމުންނެވެ. އެ މައްސަލަތަކުން ބަރީއަތް ވުމުން ރައީސް ޔާމީނަށް ތާއީދު ކުރައްވަން ވެސް އޭނާ ހުންނެވީ ތައްޔާރަށެވެ.

ޢަބްދުއްލަތީފް ފާގަހަ ކުރެއްވީ މިއިންތިޚާބުގައި ރައީސް ޞާލިހަށް ތާއީދު ނުކުރަން ނިންމީ ދީނާއި ޚިލާފް ބައެއް ތުހުމަތުތައް ރައީސަށް ކުރެވޭތީ ކަމަށެވެ. އަދި އިސްލާމްދީނަށް ފުރައްސާރަކުރާ މީހުންނަށް ފިޔަވަޅު ނޭޅުމާއި، އިންޑިއާއަށް ގައުމުގެ މިނިވަންކަން ގެއްލޭތީއެވެ.

އޭނާ ވިދާޅުވީ މިފަދަ ސިފައެއް ޑރ.މުއިއްޒުގެ ކިބައިން ނުފެންނަ ކަމަށެވެ. އެސަބަބުތަކަށްޓަކައި މިފަހަރުގެ އިންތިޚާބުގައި ޑރ.މުއިއްޒު ހޮއްވެވުމަށް މަސައްކަތް ކުރައްވާނެކަމަށް އޭނާ ވިދާޅުވިއެވެ.