އަހަރީ ޗުއްޓީގެ އިތުރުން، އޮފްޑޭތައް އެއްކޮށްލައިގެން ރިސޯޓް މުވައްޒިފުންނަށް ޗުއްޓީ ލިބޭނެ ގޮތް ހަދާ މުހިމު ވަޢުދުތަކެއް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ހުށަހަޅުއްވައިފިއެވެ.
ރޭ ލ. ގަމުގައި ބޭއްވި ފޯރިގަދަ ޖަލްސާގައި ވާހަކަ ދައްކަމުން މުއިއްޒު ވިދާޅުވީ މަސައްކަތް ކުރައްވަމުން ގެންދަވަނީ ހުރިހާ ދާއިރާއެއްގައި ހުރި މައްސަލަތައް ހައްލުކޮށް އެދެވޭ ނަތީޖާއެއް ނެރެ ދިނުމަށް ކަމަށެވެ. އެގޮތުން ރިސޯޓް ދާއިރާގައި މަސައްކަތް ކުރާ މުވައްޒިފުންނަށް ހެޔޮ ބަދަލުތަކެއް ގެނައުމަށްޓަކައި، އެދާއިރާގެ މުވައްޒިފުންނާއި، އިސް ބޭފުޅުންނާއިއެކު މަޝްވަރާ ކުރަމުންދާކަމަށެވެ.
ޗުއްޓީތަކަށް ބޮޑު ލުޔެއް ހޯދުމުގައި ޤާނޫނީ ބާރުވެރިކަން:
މުއިއްޒު ވިދާޅުވީ ރިސޯޓްތަކުގައި މަސައްކަތް ކުރާ ފަރާތްތަކަކީ ވަރަށް ބުރަކޮށް، ވަރަށް ގިނަ ވަގުތު ޢާއިލާއާއި ދުރުގައި ތިބެގެން ޤައުމުގެ އިޤްތިޞާދުގެ އެންމެ މުހިންމު މަސައްކަތް ކުރަމުންދާ ފަރާތްތައް ކަމަށެވެ. މިބޭފުޅުންނަށް ޢައިލާއާއިއެކު ހޭދަކޮށްލަން ލިބޭ ވަގުތުތައް އެކަށީގެންވާ ވަގުތު ނުލިބޭ އެކަން ބޮޑުވުން ހިއްސާ ކުރާކަމަށް މުއިއްޒު ވިދާޅުވިއެވެ. މުއިއްޒު ހުށަހަޅުއްވީ ރިސޯޓް މުވައްޒިފުންނަށް އޮފްޑޭތައް އެއްކޮށްލައިގެން އަހަރީ ޗުއްޓީގެ އިތުރުން ނެގޭ ޗުއްޓީއެއް ހެދުމަށެވެ. މިކަމުގައި ޓޫރިޒަމް އިންޑްސްޓްރީގެ ބޭފުޅުންނާއި މަޝްވަރާ ކުރަމުންދާއިރު މިއީ ޗުއްޓީ ދެވިދާނެ ގޮތެއްކަމަށް އެބޭފުޅުންވެސް ދެކޭ ކަމުގައި މުއިއްޒު ވިދާޅުވިއެވެ.
މިގޮތަށް ޤާނޫނާއި، ގަވާއިދަށާއި އަދި އުސޫލުތަކަށް ބަދަލު ގެނެސްގެން އޮފްޑޭ ޗުއްޓީތައް ނަގަން ބޭނުންވާ މުވައްފިޒު މިސާލަކަށް 3 މަސް ދުވަހުގެ އޮފް އެއްކޮށްލައިގެން ޗުއްޓީ ނަގާނަމަ އޭނާއަށް 8 ދުވަހާއި 12 ދުވަހާއި ދޭތެރޭގެ ދުވަސްތަކެއް ލިބިގެންދާނެކަމަށެވެ. މިޗުއްޓީގެ އިތުރުން އަހަރަކު ދެފަހަރު ޗުއްޓީ ލިބޭ ގޮތަށް އޮތް އޮތުން ކުރިއަށްދާނެކަމަށް މުއިއްޒު ވިދާޅުވިއެވެ.
ރިސޯޓްތަކުގައި ކޮންޓްރެކްޓް އުސޫލުން މަސައްކަތް ކުރާ ފަރާތްތަކަށް ހެޔޮ ގޮތްތަކެއް:
ޓޫރިޒަމް ދާއިރާގައި މަސައްކަތް ކުރާ މުވައްޒިފުންގެ އިތުރުން ރިސޯޓްތަކުގައި ކޮންޓްރެކްޓުކޮށް މަސައްކަތް ކޮށްދޭ ގިނަ ބަޔަކު ތިބިކަމަށް މުއިއްޒު ވިދާޅުވިއެވެ. އެމީހުންގެ ޝަކުވާއަކީ ކުރަންޖެހޭ މަސައްކަތުގެ ގޮތުން ކޮންޓްރެކްޓް ކުރެވޭ މިންވަރަކީ ކުރަންޖެހޭ މަސައްކަތާއި ހޭދަކުރަންޖެހޭ ވަގުތަށް ބަލާއިރު އެކަށީގެންވާ މިންވަރެއް ނޫންކަމަށެވެ. މިއީ ބަލައި ގަންނަ ކަންބޮޑުވުމެއްކަން ފާހަގަކޮށް މުއިއްޒު ވިދާޅުވީ އެފަރާތްތަކަށް އެލިބެންޖެހޭ އުޖޫރައަކީ އެކަށީގެންވާ އުޖޫރައަކަށް ހެދުމަށް ޤާނޫނަށް ގެންނަން ޖެހޭ އިސްލާހުތައް ގެނެސް އެކަން އެފަރާތްތަކަށް ކަށަވަރު ކޮށްދެއްވާނެކަމަށެވެ.
މީގެ ސަބަބުން ފޮޓޯ ގްރަފީއާއި، މޫދު ކުޅިވަރާއި، އެނޫންވެސް އެކި މަސައްކަތް ކޮންޓްރެކްޓް ކޮސް ކޮސްދޭ ފަރާތްތަކަށް ހެޔޮގޮތްތަކެއް ވެގެންދާނެކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ މީގެ އިތުރުންވެސް ރިސޯޓްތަކުގައި ވަޒީފާ އަދާކުރައްވާ ފަރާތްތަކަށް ޚާއްސަކޮށްގެން ވަކި ޚާއްސަ ހައުސިން ސްކީމެއް ތަޢާރަފް ކުރައްވާނެކަމަށެވެ. އެ ސްކީމުގެ ދަށުން ހުޅުމާލޭގެ އިތުރުން ރާއްޖޭގެ ހުރިހާ ހިސާބެއްގައި އަޅާ ހައުސިން މަޝްރޫޢުތަކުން ޓުވަރިޒަމް ދާއިރާގައި މަސައްކަތް ކުރާ މުވައްޒިފުންނަށް ޚާއްސަ ޖާގަތަކެއް ތަނަވަސް ވެގެން ދާނެކަމަށެވެ. މީގެ އިތުރުން ރިޓަޔާމަންޓް ސްކީމާއި، ހޮޓެލްސް ކޫލު ފަދަ ކަންކަމަކީ ރިސޯޓްތަކުގެ މަސައްކަތް ކުރާ މުވައްޒިފުންގެ ކުރިއެރުމަށް ގެންނާނެ ހެޔޮ ބަދަލުތަކެއްކަމަށް މުއިއްޒު ވިދާޅުވިއެވެ.
