މިސަރުކާރުން ވެރިކަމަށް ވަޑައިގެން ދިވެހި ޒުވާނުން ވަނީ ވަރަށް ބޮޑަށް އެކަހެރިކޮށް ބާކީ ކޮށްފައި ކަމަށާއި، ނަމަވެސް ދެން އުފެދޭ ޕީޕީއެމް/ޕީއެންސީގެ ސަރުކާރެއްގައި އެންމެ އިސްކަންދޭނެ އެއް ބަޔަކީ ޒުވާނުންކަމަށް ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި ލ.ގަމުގައި މިރޭ ބޭއްވި ފޯރިގަދަ ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ ދިވެހި ޒުވާނުންނަށް އެންމެ ފަހި ފުރުސަތުތަކެއް ލިބިގެންދިޔައީ ރައީސް ޔާމީންގެ ވެރިކަމުގައި ކަމަށެވެ. އެމަނިކުފާނަކީ ދިވެހި ޒުވާނުން ކުރިއަށްނެރެ ޤައުމުގެ މުހިންމު ކަންކަމުގައި ޒުވާނުންގެ ހިއްސާ ބޮޑުކުރި ރައީސް ކަމަށެވެ. ރައީސް ޔާމީންގެ ޒުވާނުންގެ ތަސައްވަރާއިއެކު ޒުވާނުންނަށް ކުރިއަށް ވެރިކަމުގައި އެކަން އިޔާދަކޮށް ޒުވާނުންނަށް ފަހި ފުރުސަތުތަކެއް ތަނަވަސް ކޮށް ދެއްވާނެ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ރައީސް ޔާމީންގެ ވެރިކަމުގައި ދިވެހި ޒުވާނުންނަށް އެއްލައްކައަށް ވުރެ ގިނަ ވަޒީފާ ތަނަސް ކޮށްދެއްވި ކަމަށެވެ. ނަމަވެސް މިސަރުކާރުން ޒުވާނުން ކުރީ ބާކީ ކަމަށެވެ. ޒުވާނުން ބޭނުންވާ ކުޅިވަރު ވަސީލަތްތަކާއި ވަޒީފާ ތަކާއި، އެނޫންވެސް ފުރުސަތު ހުޅުވާލުމުގެ ބަދަލުގައި މިސަރުކާރުން ހުރިހާ ފުރުސަތެއް ބަންދު ކުރީކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ވެރިކަމަށް ވަޑައިގެން ލ.އަތޮޅުގެ ގަމުގެ ޒުވާނުންނާއި، ގަމުގެ ރައްޔިތުން އެދޭ ކަންކަން ހާސިލް ކޮށްދެއްވާނެކަމަށެވެ. އެކަންކަން ހާސިލް ކޮށްދިނުމުގައި ދައްކާނެ ބަހަނާއެއް ކުރާނެ އެއްވެސް ޝަކުވާއެއް ނޯންނާނެކަމަށް މުއިއްޒު ވިދާޅުވިއެވެ.
ލ.ގަން ހިމެނޭހެން އަތޮޅަށް ވެވަޑައިގެންނެވި ބައެއް ވައުދުތައް:
– ބަރެސްދޫގެ ޓޫރިޒަމް ހަގީގަތަކަށް ހަދާދޭން
– ގަން ފޮނަދޫ ހުރިހާ މަގެއްގައި ތާރު އަޅާދޭނަން
– ލުއި ލޯނުތައް ލިބޭނެ ގޮތް ހަމަޖައްސާ ބޯހިޔާ ވަހިކަން ކަށަވަރު ކޮށްދޭނަން
– ނަރުދަމާގެ މައްސަލަ ހައްލު ކޮށްދޭނަން
– ހޮސްޕިޓަލް ޓާޝަރީ ހޮސްޕިޓަލަކަށް ބަދަލުކޮށް ހުރިހާ ފެސިލިޓީއެއް ޤާއިމް ކޮށްދޭނަން
– ނެޝަނަލް މެންޓަލް ހެލްތު ހޮސްޕިޓަލް އަޅާނީ ގަން ފޮނަދޫގަ
– ސްޕޯޓްސް އެރީނާ ގާއިމް ކޮށްދޭނަން
މުއިއްޒު ވަނީ ޒުވާނުންނަށާއި، އެންމެހާ ރައްޔިތުންނަށް ޤައުމުގެ މިހާރުގެ ހާލަތާއި ގުޅޭގޮތުން ވަރަށް އާދޭހާއާއިއެކު މިނިވަންކަން ނެގެހެއްޓުމަށް މިސަރުކާރަށް ނޫނެކޭ ބުނުމަށް ދަންނަވާފައެވެ. ރާއްޖޭގެ މިނިވަން ކަމަކީ އިތުރު ދައުރެއް މިސަރުކާރަށް ދީފިނަމަ އޮތުމާއިމެދު ސުވާލުތަކެއް އޮތް ކަމެއްކަމަށް މުއިއްޒު ވިދާޅުވިއެވެ.
މުއިއްޒު ވަނީ އަންނަ ހޮނިހިރު ދުވަހު ޤައުމުގެ މިނިވަންކަން ދިފާއުކޮށް ދިވެހިންގެ ރާއްޖެ ދިވެހިންނަށް ހޯދުމުގައި ލ.އަތޮޅުގެ ބޮޑު މެޖޯރިޓީ ލިބިގެންދާނެ ކަމަށް އުންމީދު ކުރާކަމަށް ވިދާޅުވެފައެވެ.
