ކުރީގެ ރައީސް އަދި ޕީޕީއެމްގެ ރައީސް ޔާމީނާއި ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒާ ދެމެދު ފިތުނަ އުފައްދައިގެން އިދިކޮޅު ކޯލިޝަން ބައިބައިކޮށް ނުލެވޭނެ ކަމަށް ޕީއެންސީގެ ރައިސް އަބްދުއްރަހީމް (އަދުރޭ) ވިދާޅުވެއްޖެއެވެ.
ސަރުކާރަށް ތާއީދުކޮށް ޚަބަރު ގެންދޭ ބައެއް އޮންލައޮިން ނޫސްތަކުގައި ގެންދަނީ ޚިޔާލީ ވާހަކަތެއްގެ ސިފައިގައި ޑރ.މުއިއްޒުއަށް ރައީސް ޔާމީންގެ ތާއީދު ނެތް ސިފައެއްގައި ޚަބަރުތައް ޝާއިރު ކުރަމުންނެވެ. ޚަބަރުތަކުގެ އެއްވެސް ސައްޚަކަމެއް ނެތި ލިޔަމުންދާ މިފަދަ ޚަބަރުތަކާއި ގުޅިގެން ޕްރޮގްރެސިވް ކޮންގްރެސް ކޯލިޝަން ހިނެގެވުމާއި ހަވާލުވެ ހުންނެވި އަބްދުއްރަހީމް ވިދާޅުވީ ރައީސް ޔާމީން ވިދާޅުވާ ވާހަކަފުޅުތަކާއި، އެމަނިކުފާ ދަންނަވާ ދެންނެވުން އެނގޭނީ ސަރުކާރަށާއި، ސަރުކާރު ޕްރޮމޯޓްކުރާ ފަރާތްތަކަށް ނޫންކަމަށެވެ.
ކުރިއަށް އޮތް 7 ދުވަހަކީ މިސަރުކާރުން މިފަދަ އެތައް ވާހަކަތަކެއ ތިލަކޮށް ޕީޕީއެމް/ޕީއެންސީ ބައިބައި ކޮށްލުމަށް މަސައްކަތް ކުރާނެ ދުވަސްތަކެއް ކަމަށާއި ނަމަވެސް ކިތަންމެ ވަރަކަށް މިމަސައްކަތް ކުރި ނަމަވެސް ލީޑަރޝިޕް ބައިބައިކޮށް އާންމު މެމްބަރުން މާޔޫސްކޮށް ނުލެވޭނެކަމަށް އަދުރޭ ވިދާޅުވިއެވެ.
ދެން މި ކުރާ ކަމަކީ އެކި ނަންނަމުގައި ނޫސްތަކުގައި އާޓިކަލް ޖައްސަވައިގެން އެކި ވާހަކަތައް ދައްކަނީ. ރައީސް ޔާމީން ވިދާޅުވެއްޖޭ ޑރ. މުއިއްޒު އެއީ ތިމަންނާ ތާއިދުކުރާ ކެންޑިޑޭޓެއް ނޫނޭ. ރައީސް ޔާމީން ވިދާޅުވެއްޖޭ ޑރ. މުއިއްޒު މިހާރު ތިމަންނާގެ ވާހަކައެެއް ނުދައްކައޭ.
– އަބްދުއްރަހީމް ވިދާޅުވިއެވެ.
އޭނާ ވިދާޅުވީ ރައީސް ޔާމީން އަންގަވާފައިވަނީ ޕީޕީއެމް/ޕީއެންސީގެ ހުރިހާ ކަމެއް ހުއްޓާނުލަށްފަހު، އެންމެން ކެމްޕެއިންގައި ބުރަކޮށް މަސައްކަތް ކުރުމަށް ކަމަށެވެ. ކޯލިޝަންގެ މުޅި ލީޑަޝިޕް މުއިއްޒުގެ ކެމްޕެއިނަށް ނުކުމެ ތިއްބެވީ ވެސް އެ އިރުޝާދުގެ ދަށުން ކަމަށް އަބްދުއްރަހީމް ވިދާޅުވިއެވެ. ރައީސް ޔާމީން އެންމެފަހުން ހައި ކޯޓުގެ އަޑުއެހުމުން ދިމާވި ދުވަހު ވެސް އެ މަނިކުފާނު، މުއިއްޒު ކުރެން އަދި ދެން ތިއްބެވި ލީޑަޝިޕްގެ ބޭފުޅުން ގާތު ވެސް އެއްސެވީ ކޯޓުގައި ކީއްކުރަނީތޯ ކަމާއި ކެމްޕެއިންނަށް ވަޑައިގެންނެވުމަށް އެންގެވި ކަމަށް އަބްދުއްރަހީމް ވިދާޅުވިއެވެ.
އެންމެ ފަހުން އަޅުގަނޑުމެންނާ ކޯޓުން ބައްދަލުވި ދުވަހު ވެސް ކޯޓަށް ވަދެވަޑައިގެން ގޮނޑިކޮޅުގައި އިށީންނެވުމުގެ ކުރިން ވިދާޅުވީ މުއިއްޒު ކީއްކުރަނީހޭ މިތާ. ޝިޔާމް ކީއްކުރަނީހޭ މިތާ. އަބްދުއްރަހީމް ކީއްކުރަނީހޭ މިތާންގައި. މިތާނގައި ތިބޭނެ ކަމެއް ނެތޭ ކެމްޕޭނަށް ދާށޭ. މި އިންތިހާބު ކާމިޔާބުކުރަން އެބަޖެހެޔޭ. ޑރ. މުއިއްޒު ހޮވަން އެބަޖެހެޔޭ.
– އަދުރޭ ވިދާޅުވިއެވެ.
އޭނާ ތަކުރާރުކޮށް ވިދާޅުވީ އެކި ގޮތްގޮތުން އެކި ވާހަކަތައް ފަތުރައިގެން ޑރ. މުއިއްޒަށް ތާއީދު ކުޑަކުރުމަށް ޓަކައި ސަރުކާރުން މަސައްކަތްކުރަމުންދާ ކަމަށެވެ. އަދުރޭ ވިދާޅުވީ މިއީ ބަލިވެ ގޮތް ހުސްވުމުން ކުރާނެ ކަންތައްތައް ކަމަށެވެ.
