އަންނަ މަހުގެ 9 ވަނަ ދުވަހު އޮންނަ ރިޔާސީ އިންތިޚާބުގައި ދިވެހިންގެ މިނިވަންކަމާއި ސިޔާސަތާއި އިސްތިގުލާލާއި، ދިވެހި ރައްޔިތުންގެ ހިތްތަކުގެ ރައީސް ޔާމީން މިނިވަންކުރައްވާނީ ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒުކަމަށް ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވެއްޖެއެވެ.
ރިޔާސީ ކެމްޕޭންގައި ރ.ދުވާފަރުުގައި ބޭއްވި ޖަލްސާ ފޯރިގަދަކޮށްލައި ޖަލްސާގައި ބައިވެރި އެތައް ރައްޔިތުން ކައްކުވާލީ ޝިޔާމް ދެއްކެވި ފޯރިގަދަ ވާހަކަތަކުންނެވެ. ޝިޔާމް ވަނީ ދުވާފަރަކީ ރައީސް ޔާމީނަށް ވަފާތެރި ރައީސް ޔާމީންގެ ތާއީދު ބޮޑު ރަށެއްކަން މިއަދު އެކަނިވެސް ހާމަވެގެން ގޮސްފިކަމަށެވެ. ދުވާފަރު ރައްޔިތުންނާއި ރާއްޖޭގެ އެންމެހާ ރައްޔިތުން އެދެނީ ރައީސް ޔާމީން މިނިވަން ވުންކަމަށާއިި އެކަން ކުރައްވާނީ އިންތިޚާބު ބޮޑުތަނުން ކާމިޔާބުކޮށް ޑރ.މުއިއްޒު ކަމަށް ޝިޔާމް ވިދާޅުވިއެވެ.
ރައިސް ޔާމީން މިނިވަން ކުރެއްވުމަށް ކުރެވޭ މަސައްކަތާއިއެކު ރާއްޖެ މިއަދު އޮތް އަޅުވެތި ހާލަތުން ގައުމުގެ ހާލަތު ބަދަލު ކުރުމަކީވެސް ޑރ.މުއިއްޒު ކުރައްވާނެ މުހިންމު މަސައްކަތެއްކަމަށް ޝިޔާމް ވިދާޅުވިއެވެ. އިންޑިއާގެ އަޅުވެތިކަމުން މިޤައުމު ސަލާމަތްކޮށް ހަދާފައިވާ ގޮތްނޭގޭ އެގްރީމަންޓުތަކުން ދިވެހި ޤައުމު ސަލާމަތް ކުރާނެ މީހަކީވެސް ޑރ.މުއިއްޒުކަމަށް ޝިޔާމް ވިދާޅުވިއެވެ.
ރައްޔިތުން ހުސް ގޮޅިއަކަށް ދުއްވާލަން ކުރި މަސައްކަތް ނާކާމިޔާބު ކޮށްލީ ރައީސް ޔާމީން. އެމަނިކުފާނު ދެއްކެވީ އެމަނިކުފާނުގެ ސްކޫލުން ތަރުބިއްޔަތުވި ޑރ.މުއިއްޒު. ސްލޯލިހުހެން ސްލޯއެއް ނުވާނެ. ތަރައްޤީ ބާރު ސްޕީޑުގައި ކުރައްވާނެ.
– ޝިޔާމް ވިދާޅުވިއެވެ.
ޝިޔާމް ވަނީ ދައުލަތުގެ މީޑިއާއިން އެންމެ ދެދުވަހަށް ވެފައި ވަނިކޮށް ރިޔާސީ ބަހުސް ރައީސް ޞާލިހަށް ބައިވެރި ނުވެވޭތީ އެހެން ހުރިހާ ކެންޑިޑޭޓުންގެ ހައްގުތަކަށް އަރައިގަނެ ނުބާއްވަން ނިންމި ނިންމުން އަލުން އިޔާދަ ކުރުމަށް ގޮވާލާފައެވެ. ރިޔާސީ ބަހުސްގައި މިހާތަނަށް ރައީސް ޞާލިހަކީ ބައިވެރިވި ބޭފުޅަކަށްނުވާއިރު އެބޭފުޅާއަށް ބައިވެރި ނުވެެވުމަމީ ބަހުސް ކެންސަލް ކުރަންޖެހޭ ސަބަބެއް ނޫންކަމށް ޝިޔާމް ވިދާޅުވިއެވެ.
މިކަމުން ދައުލަތުގެ މީޑިއާއަށް މިސަރުކާރުގެ ސިޔާސީ ނުފޫޒު ވަދެފައިވާ މިންވަރު ހާމަވާކަމަށް ޝިޔާމް ވިދާޅުވިއެވެ. ސީދާ ރައީސް އޮފީހުން އަންގައިގެން ވަކި ގޮތަކަށް ކަންކަން ކުރަން ބުނުމުން އެގޮތަކަށް އެކަމެއް ކުރައްވާތަން ފެންނަކަމީ މިއަދު ހިތާމަ ކުރަންޖެހޭ ކަމެއްކަމަށް ޝިޔާމް ވިދާޅުވިއެވެ. ޝިޔާމް ވިދާޅުވީ ރައީސް ޞާލިހަށް ފަސޭހަފުޅު ދުވަހެއްގައި ބަހުސް ބޭއްވިޔަސް ޑރ.މުއިއްޒު ބަހުސަށް އަރަން ފަސް ނުޖެހޭނެކަމަށެވެ.
