ކުރިޔަށް އޮތް ރިޔާސީ އިންތިޚާބުގައި، ވޯޓު ބައިބައި ކޮށްގެން، ރިޔާސީ އިންތިޚާބު ދެވަނަ ބުރަކަށް ގެންދިއުމުގެ މަގުސަދުގައި ރިޔާސީ އިންތިޚާބަށް ކުރިމަތި ލައްވައިގެން ތިއްބެވި ކެނޑިޑޭޓުން އެބަ ތިއްބެވިކަމުގައި ރައީސް ސާލިހު ވިދާޅުވެއްޖެއެވެ.
ރައީސް ސާލިހު މިހެން ވިދާޅުވީ ކުރިޔަށް އޮތް ރިޔާސީ އިންތިޚާބުގެ ކެމްޕޭނަށް، ތ. އަތޮޅަށް އެމަނިކުފާނު މިހާރު ކުރައްވަމުން ގެންދަވާ ދަތުރުފުޅުގައި ތ. ތިމަރަފުށީގައި މިރޭ ކުރިޔަށްދިޔަ ޖަލްސާގައި ވާހަކަ ދައްކަވަމުންނެވެ.
މި ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ، ފުރަތަމަ ބުރުގައި ވޯޓު ބައިބައި ކޮށްގެން، ދެވަނަ ބުރަކަށް ގެންދިއުމަށް ބައެއް ކެނޑިޑޭޓުން މަސައްކަތް ކުރައްވަނީ ދެވަނަ ބުރަކަށް ގޮސްގެން އެ ކެނޑިޑޭޓުން ބޭނުންވާ މަންފާތަކެއް ހާސިލް ކުރުމުގެ މަގުސަދުގައި ކަމުގައެވެ.
އެހެންކަމުން ރައީސް ސާލިހު ވިދާޅުވީ، ރައްޔިތުން އެފުރުސަތު އެއްވެސް ކެނޑިޑޭޓަކަށް ދީގެން ނުވާނެކަމަށާއި، ރިޔާސީ އިންތިޚާބު ނިންމަން ވާނީ އެއްބުރުން ކަމުގައެވެ. އަދި ރައީސް ސާލިހު ވިދާޅުވީ އެމަނިކުފާނު ކުރިޔަށް އޮތް ރިޔާސީ އިންތިޚާބު ކާމިޔާބު ކުރައްވާނީ އެއްބުރުން ކަމުގައެވެ.
މިރޭ ތ. ތިމަރަފުށީގައި ބޭއްވި ޖަލްސާގައި ރައީސް ސާލިހުވަނީ ތ. ތިމަރަފުށީގައި އެމަނިކުފާނުގެ ދެވަނަ ދައުރެއްގައި ކޮށްދެއްވާނެ ގިނަ ކަންކަމުގެ ތަފްސީލުތައް ހާމަކުރައްވާފައެވެ. އޭގެ ތެރޭގައި ތިމަރަފުށި ދާއިރާއަށް ފަތުރުވެރިކަން ކުރިއެރުވުމުގެ ގޮތުން އެ ދާއިރާގައި އާ ރިސޯޓުތައް ހުޅުވުމުގެ އިތުރުން، ތިމަރަފުށީ ޒުވާނުން ބޭނުންވާ އެކިއެކި ކަންކަމުގެ އިތުރުން ތިމަރަފުށީގައި މިނީ ހޮސްޕިޓަލެއް ބިނާ ކުރައްވާނެ ކަމުގައިވެސް ރައީސް ސާލިހު ވިދާޅުވިއެވެ.
ކޮމެންޓު ފޮނުވާ